shafresha

انسان کی ذندگی میں آنے والے تین ادوار بچپن، جوانی اور بڑھاپے میں سے بچپن ہی وہ دور ہے جس کے پلٹ آنے کی سب تمنا کرتے ہیں۔یہ وہ دور ہوتا ہے جس میں کوئی فکر کوئی اندیشہ نہیں ہوتا۔ بے فکری کا یہ عالم دُنیا و مافیھا اور فزکس کے سب مشکل مسئلے "وقت" کی قید سےآٓزاد ہوتا ہے۔ بچپن میں وقت کا پتہ ہی نہیں چلتا تھا، ابھی سو کر اُٹھے ناشتہ کیا، اسکول گئے، اسکول سے واپس آکر ہوم ورک کیا، سپارہ پڑھا، پھر باہر گلی میں کھیلنے چلے گئے۔ گلی کی حدود میں اس کائنات کو کوئی اصول کام نہیں کرتا تھا، مختلف کھیلوں کو کھیلتے کھلیتے شام ہوجاتی،جسم تھک کر چور ہوجاتے، پسینہ سر کے بالوں سے بہتا ہوا پیروں میں پہنی ہوئی چپلوں تک جا پہنچتامگر جب تک گھروں سے ایک دوسرے کے نام نا پکارے جاتے کوئی واپس جانے کا نام ہی نا لیتا۔
آہ! کیا زمانہ تھا وہ!

آج یونہی بیٹھے بیٹھے خیال آیا کے کیوں نہ اپنے بچپن کی یادوں میں آپ لوگوں کو بھی شریک کروں؟
یہی خیال اس پوسٹ کے لکھنے کا سبب بنا۔آپ اس پر اپنی رائے دیجیئے گا اور اگر آپ نے اِن یادوں کو پسند کیا تو اس سلسلے پر مذید لکھوں گا، شکریہ و السلام علیکم!

مجھے اپنے بچپن کی سب سے پہلی بات جو یاد ہے وہ ایک بوڑھی لنگڑی خاتون کا چہرہ ہے۔وہ اُس مکان کی مالکہ تھیں جہاں پر ہم کرائے پر رہتے تھے۔ وہ ہر وقت ایک لکڑی تھامے رہا کرتی تھیں یہ لکڑی ہی دراصل ان کی ٹانگ تھی۔وہ بہت اچھی خاتون تھیں محلے کے سارے بچے اُن کے گھر میں سیپارہ پڑھنے کے لیے آتے تھے۔ کرائے دار ہونے کے ناتے ہمارا اُن کے گھر میں آنا جانا کچھ ذیادہ ہی تھا۔ مجھے یاد ہے کے وہ نیاز کی لیئے آئی ہوئی شیرینی میں سے مجھے کچھ نا کچھ دیتی رہتی تھیں۔

کرائے کے اُس گھر کے سامنے ایک پارک تھا "صابر پارک" نام کا۔ اس باغ کی سب سے اہم بات یہ تھی کے یہ پارک محلے کے ایک صاحب جن کا نام "صابر" تھا ،نے خود بنا کر عوام کے لیئے دان کردیا تھا۔ اس باغ کے چاروں کونوں میں چاربڑے بڑے درخت نما پودے تھے (میں اُن پودوں کا نام نہیں جانتا مگر صرف یہ یاد ہے کے اُن میں گلاب جیسے پھول لگتے تھے مگر اُن پھولوں کی خوشبو میں کڑواہٹ ہوتی تھی) یہ درخت نما پودے اتنے گھنے تھے کے "چُھپم چُھپائی" کھلیتے ہوئے ہم اُس کے اندر چھپ جاتے تھے۔ پارک کے چاروں طرف "ڈم ڈم" نامی پودے کی باڑھ تھی۔ محلے کے بڑے بچے آپس میں اس باڑھ کو کود کے پار کرنے کی شرطیں لگایا کرتے تھے۔

صابر صاحب کی ذاتی کوششوں کی وجہ سے صابر پارک کی حالت باقی پارکوں کی طرح نہیں تھی۔ا س پارک میں موسم کی تبدیلی کے ساتھ ہی پودوں کی تبدیلی کا عمل شروع ہوجاتا۔ ایک مرتبہ جب مالی پرانے پودوں کی اُکھاڑ کر نئے ننھے منے پودے لگا رہا تھا میں نے دوسرے بچوں کی طرح پرانے پودوں کا "جن پر ابھی پھول کھلے ہوئے تھے" ایک ڈھیر جمع کرلیا اور اپنے بڑے بھائی کی مدد سے گھر لے آیااور گھر کے دلان میں اُن کا ڈھیر لگادیا۔ اماں "میری دادی" نے جب دیکھا تو بہت ناراض ہوئیں اور میری پٹائی کی ، میری سمجھ میں نہیں آ رہا تھا کے مجھے شاباشی کے بجائے ڈانٹ کیوں پڑ رہی ہے۔ اُس رات امی نے مجھے اپنے پاس لٹایا اور پیار سے سمجھایا کے اب ان پودوں کا وقت ختم ہو چکا ہے اور یہ کچھ ہی دنوں میں مرجھا جائیں گے۔ کیوں کے اب نیا موسم آرہا ہے۔ صبح سو کر اُٹھا تو معلوم ہوا کے میرے ناشتے میں "حلوا پوری"رکھی ہوئی تھی۔ یہ "اماں" کی طرف سے پٹائی کی تلافی تھی۔ حلوا پوری کھاتے ہوئے اماں کی طرف کن آنکھیوں سے دیکھا وہ چارپائی پر بیٹھی تسبیح پڑھ رہیں تھیں، میں دوڑ کر گیا اور اماں کے گلے لگ گیا۔ وہ مجھے دیکھ کر رونے لگیںمجھے سمجھ نہیں آرہا تھا کے وہ کیوں رو رہیں ہیں؟
وہ روتی جا رہیں تھیں اور مجھ پیٹھ پر ہاتھ پھیرتی جارہیں تھیں، آہ! اُن کے ہاتھوں کا وہ لمس!

صابر پارک محلے کا کمیونٹی سینٹر بھی تھا۔ چھوٹی موٹی تقریبات بھی یہیں ہوا کرتی تھیں۔ ایک مرتبہ سُنا کے صابر پارک میں فلم دیکھائی جائے گی۔مُحلے کا کوئی گھر ایسا نہیں تھا جہاں اس بارے میں گفتگو نہ کی جارہی ہو، ہم سب دوست آپس میں ایک دوسرے سے پوچھ رہے تھے کے یہ "فلم" کیا ہوتی ہے؟ بلآخر جمعے کا دن آ پہنچا ، آج شام کو ہم سب پہلی مرتبہ فلم دیکھنے والے تھے۔ جمعے کے نماز سے واپسی پر گھر آتے ہوئے میں نے دیکھا کے کچھ لوگ کے برابر والی دیوار پر ایک بڑا سا سفید پردہ ٹانگ رہے ہیں، اس دیوار پر نیلے رنگ سے لکھا ہوا صابر پارک اس پردے کے پیچھے چھپ گیا تھا۔شام کو پارک میں تِل دھرنے کو جگہ نہیں تھی۔ آس پاس کے علاقے کے لوگ بھی یہاں آئے ہوئے تھے۔ پورے پارک میں دریاں بچھیں ہوئیں تھیں، آگے والی دریوں پر سفید چاندیاں بچھیں ہوئیں تھیں، محلے کے معززین آگے گاﺅ تکیئے سے ٹیک لگائے بیٹھے ہوئے تھے۔ پارک کے قریبی رہائشی ہونے کے ناطے ہم لوگ اگلی صفوں کے پیچھے بیٹھے ہوئے تھے۔ پاک کے ایک حصے میں خواتین اور دوسرے میں مرد حضرات بیٹھے ہوئے تھے۔ پارک کے بیچ میں ایک تین ٹانگوں والاعجبیب سا اسٹینڈ لگا ہوا تھا اور ایک شخص عجیب سی گول گول پہیے جیسی چیز اُٹھا کے ایک مشین"پروجیکٹر" میں فٹ کررہا تھا۔ پارک میں اضطراب بڑھتا جا رہا تھا ، بچوں کی خوشی قابل دیدنی تھی۔
پارک کے قریبی گھروں کو ہدایت کی گئی تھی کے وہ گھروں کے باہر کی روشنیاں نہ جلائیں۔پھر اچانک اُس مشین میں سے روشنی نکل کر سامنے کی دیوار پر پڑھنے لگی اور میںنے دیکھا کے سفید پردہ مذید دودھیا ہو گیا ہے۔ پھر اچانک اُس پردے پر کچھ نمبر لکھے ہوئے آنے لگے، بچے خوشی سے چیخنے لگے، محلے کے بڑوں نے ہمیں ڈانٹا شروع کردیا۔ پھر اچانک پردے پر ایک انسان نمودار ہوا ، میری آنکھیں حیرت سے پھٹی پڑ رہیں تھیں میں نے مڑکر اُس مشین کی طرف دیکھا اُس میں سے روشنی نکل کر دیوار پرلگے پردے پر پڑ رہے تھی اور وہاں پردے پر ایک خوب صورت انسان نظر آرہا تھا۔میں کبھی پردے اور کبھی مشین کو دیکھ رہا تھا۔ وہ انسان کس طرح اس مشین سے نکل کر پردے پر آگیا تھامیری سمجھ میں نہیں آ رہا تھا۔ پارک میں موجود لوگ دم سادھے بیٹھے پردے کو خوشی اور استعجاب سے دیکھے جا رہے تھے۔ میں نے خواتین والے حصے میں بیٹھی اپنی امی اور اماں کو دیکھا اماں کی تسبیح مسلسل گردش میں تھی۔پردے پر کبھی ایک اور کبھی بہت سارے انسان نمودار ہوتے اور غایب ہوجاتے ۔ قریب ایک گھنٹے کے بعد یہ ایڈونچر ختم ہوگیا اور پارک میں موجود لوگ اپنے اپنے گھروں کو لوٹے لگے۔ میں نے عورتوں کی بھیڑ میں موجود اماں کی دیکھا اور اُن کی طرف دوڑ لگا دی ۔ میں نے اُن کی انگلی پکڑی اور ان سے پوچھا اماں وہ آدمی کون تھا ، ارے پاگل وہ "محمد علی تھا" ہمارے محلے کی ایک خاتون بولیں۔ اماں وہ آدمی اُس مشین میں رہتا ہے؟ میں نے انگلی سے پروجیکٹر کی طرف اشارہ کیا، مگر اماں نے سختی سے میرا ہاتھ تھاما اور منہ سے کچھ نہیں بولیں اور گھر کی طرف چل دیں۔

اُس رات اماں نے ہمیں قیامت کی نشانیوں کے بارے میں بتایا۔ بقول اماں کے یہ مشین بھی قیامت کی ایک نشانی ہے۔ میں نے اُن سے وعدہ کیا میں اب اُس مشین کے بارے میں کچھ نہیں پوچھوں گا، مگر رات بھر خواب میں مجھے وہ آدمی اور وہ مشین نظر آتے رہے ۔

نوٹ:کورنگی نمبر ایک پر واقع یہ پارک آج بھی موجود ہے مگر اُس کے چاروں طرف لگے پودے آج وہاں نہیں ہیں۔ ڈم ڈم ہٹا کر گرل لگا دی گئی ہے اور پارک کے ایک کونے میں ایک سیاسی جماعت کا آفس بنادیا گیا ہے۔ اب محلے کے لوگ وہاں نہیں آتے اور نا ہی بچے وہاں کھیلتے ہیں۔ مجھے یقین ہے اگر صابر صاحب زندہ ہوتے تو یہ سب کچھ نہیں ہوتا ۔
پاک کی قریبی دیوار پر لکھا "صابر پارک" اب بہت دھندلا گیا ہے اور اگر آپ یہ نا جانتے ہوں کے یہاں کیا لکھا ہوا تھا تو آپ اُسے پڑھ بھی نہیں پائیں گے، البتہ اُس سیاسی جماعت کا آفس اور اُس پر بنی اُن کے قائد کی تصویر آج بھی بہت چمک رہی ہے۔

میری یادوں کے اس سلسلے کا دوسرا حصہ پڑھنے کے لیئے نیچے دیئے گئے لنک پر کلک کریں۔
وہ کاغذ کی کشتی! "دوسرا حصہ"

منتظمین

سترہ اپریل کے لیے شیڈول کر دی گئی ہے۔

shafresha

شکریہ جناب!
کیا مجھے اپنی یادوں کا یہ سلسلہ جاری رکھنا چاھیئے؟
آپ سب کی رائے کا منتظر!
شاہد علی صدیقی

فیصل ناصر

آپ تو لکھاری ہیں ضرور لکھیں

خاص طور میں منتظر ہوں

ام غزل

یہ تحریر میری نظر سے آج ہی گزری ، بہت ہی عمدہ تحریر ہے جس میں بچپن کی اٹھکیلیوں کے علاوہ ، معصومیت اور نادانی بھی جھلکتی ہے اور انسانیت کا فرض نبھاتے صابر صاحب اور ذاتی فائدے میں لپٹی ہوئی سیاست بھی ۔
اس تحریر کو بالکل جاری رہنا چاہئیے ، مجھے تو بہت انتظار رہے گا اس کے اگلے باب کا۔
ایک اچھی تحریر پر میری طرف سے بہت بہت شکریہ۔

shafresha

پسندیدگی کا شکریہ!
انشاء اللہ جلد ہی اپنی یادوں کے اس سلسلے کا دوسرا حصہ بھی پیش کروں گا۔
آپ لوگوں کی تنقید اور آراءکا منتظر ہوں!

Zullu230

Shafresha جی بہت اچھی تحریر ہے ۔۔۔۔ میں تو پڑھتے پڑھتے اپنے بچپن کی یادوں میں کھو سا گیا تھا۔ کاش میرا بچپن لوٹ آتا۔

اور ام غزل جی میں نے آج پہلی بار محسوس کیا کہ آپ بھی بہت اچھا لکھ لیتی ہیں۔ کبھی کاغذ اورقلم اُٹھا کر لکھنے کی ہمت کیجیے نا! آپ کی تحریروں کا انتظار رہے گا۔ شکریہ

ام غزل

ذولو بھائی بھلا آپ نے اندازہ کیسے لگایا کہ میں‌بھی اچھا لکھ سکتی ہوں ویسے میری ایک دو اپنی تحریر ہیں پاک نیٹ پر۔
آپ کی آرا کا شکریہ ، کوشش کروں گی ۔

shafresha

اپنی تحریروں کا لنک ہی دے دو"Zullu230" کو

ام غزل

شاہد بھائی آجکل کافی مصروف ہوں ،بہت کم آرہی ہوں ضونہی ٹائم ملتا ہے کردوں گی۔

shafresha

تھینک یو اُمی!!!!!!!!!!!!11

رضی

سر بہت عمدہ۔ کمال کر دیا آپ نے آپ کی تحریر پڑھتے ھوئے میں تو گم ہی ہو گیا مجھے محسوس بھی نہیں ہوا کہ میں کہانی پڑھ رہا ہوں مجھے اس طرح لگ رہا تھا کہ میں اس بچے کے ساتھ ہی ہوں اور اس کے منہ سے سن رہا ہوں لیکن صرف ایڈونچر لفظ نے مجھے احساس دلوایا کہ میں کہ کہانی پڑھ رہا ہوں کیوں کہ صرف اس لفظ سے بچے کے منہ سے معصومیت کا احساس نہیں ہوا۔ باقی کمال کردیا آپ نے مجھے تو گم کردیا تھا آپ کی اس تحریر نے ۔ میں آپکا مشکور ہوں کہ آپ نے مجھے اسکا لنک بھیجا۔

__________________

اپنی ملت پر قیاس اقوام مغرب سے نہ تر
خاص ہے ترکیب میں قوم رسول ہاشمی

عدنان دانی

شاہد بھای تحریر کہ جتنی بھی تعریف کی جائے کم ہے
اللہ تعالی نے آپ کو خداداد صلاحیتوں سے نوازا ہے
اللہ تعالی آپ کی صلاحیتوں کوراہ حق میں استعمال کرنے کی توفیق عطا فرمایئں
ہماری درعاییں آپ کے ساتھ ہے۔۔۔۔۔۔۔۔۔۔۔۔ اسی طرح لکھتے رہیں۔۔۔ اور پاک نیٹ کی
خوبصرتی میں اور نکھار لایئں۔۔۔۔۔۔۔۔۔۔۔

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !

عدنان دانی

شاہد بھای تحریر کہ جتنی بھی تعریف کی جائے کم ہے
اللہ تعالی نے آپ کو خداداد صلاحیتوں سے نوازا ہے
اللہ تعالی آپ کی صلاحیتوں کو راہ حق میں استعمال کرنے کی توفیق عطا فرمایئں
ہماری درعاییں آپ کے ساتھ ہے۔۔۔۔۔۔۔۔۔۔۔۔ اسی طرح لکھتے رہیں۔۔۔ اور پاک نیٹ کی
خوبصرتی میں اور نکھار لایئں۔۔۔۔۔۔۔۔۔۔۔

The Great

بہت خوب۔۔۔۔۔۔۔۔۔۔۔۔۔۔۔۔۔۔۔۔۔۔ ۔