محمدعدنان

جان شیر سکواش کملپیکس ایبٹ آباد میں 13 سے 16 مئی تک ہونے والا پریزیڈنٹ پی ایس ایف انٹرنیشنل سکواش ٹورنامنٹ فرسٹ سیڈ کھلاڑی فرحان محبوب نے جیت لیا ہے۔
اس ٹورنامنٹ کا فائنل فرسٹ سیڈ فرحان محبوب اور تھرڈ سیڈ یاسر بٹ کے درمیان تھا۔ یاسر بٹ نے پہلا گیم با آسانی 5/11 کے سکور سے جیت لیا تاہم دوسرے گیم میں فرحان محبوب نے نسبتاً اچھے کھیل کامظاہرہ کیا۔ دوسرے گیم میں بہت سخت مقابلہ ہوا اور فرحان محبوب نے یہ گیم 10/ 11 کے سکور سے جیتا۔

تیسرے گیم میں فرحان محبوب نے زبردست شارٹس کھیلیں لیکن یاسر بٹ نے بھی خوب مزاحمت کی تاہم فرحان محبوب 7/11 سے تیسرا گیم بھی جیت گئے۔ چوتھا گیم فرحان محبوب نے آسانی سے5 /11 کے سکور سے جیت لیا اور یوں انہوں نے بارہ ہزار امریکی ڈالر انعامی رقم کا یہ بین الاقوامی سکواش ٹورنامنٹ اپنے نام کر لیا۔

اس ٹورنامنٹ کا مین ڈرا سولہ کھلاڑیوں پر مشتمل تھا۔ ان سولہ کھلاڑیوں میں سے تین غیر ملکی تھے جن میں انگلینڈ کے نیل ہچنز، ویلز سے تعلق رکھنے والے لوئیس ہرسٹ اور ہمسایہ ملک بھارت سے آئے نریش کمار شامل تھے۔

اس چمپئن شپ کی خاص بات کواٹر فائنل میں کوالیفائنگ راؤنڈ سے جیت کر آنے والے کھلاڑی وقار محبوب کا سیکنڈ سیڈ کھلاڑی شاہد زمان کو شکست دینا تھا۔ یہ اپ سیٹ کرنے والے وقار محبوب عالمی رینکنگ میں 207 ویں نمبر پر ہیں جبکہ شاہد زمان کی عالمی رینکنگ 57 ہے۔شاہد زمان کہ جو کبھی عالمی رینکنگ میں ٹاپ بیس کھلاڑیوں میں شامل تھے اب ان کی رینکنگ کافی نیچے آ چکی ہے اور پاکستان کی سکواش میں امیدیں فرحان محبوب اور عامر اطلس جیسے ابھرتے ہوئے نوجوان کھلاڑیوں سے بندھی ہیں۔

__________________