خرم شہزاد خرم

گوالیار،بھارت(عبدالماجدبھ� �ی،نمائندہ خصوصی)پانچ ایک روزہ میچوں کی سیریز میں بھارت کو دو ایک سے سبقت حاصل ہے ۔ چوتھا میچ گوالیار میں کھیلا جائے گا۔میچ میں پاکستانی ٹیم کیلیے وکٹ کیپنگ کے فرائض کون انجام دے گا۔ یہ بات معمہ بنتی جارہی ہے ۔ شعیب ملک کانپور ون ڈے کے بعد کامران اکمل پر مکمل اعتماد کا اظہار کرتے ہوئے کہہ چکے ہیں، وہ پاکستان کے نمبر ون وکٹ کیپر ہیں، جبکہ دوسری جانب پاکستان سے نوجوان وکٹ کیپر سرفرازاحمد کو بھی طلب کرلیا گیا، وہ بدھ کو بھارت پہنچیں گے۔ جبکہ پاکستانی ٹیم کے میڈیا منیجر احسن حمید ملک نے کہا کہ کامران اکمل چوتھے ون ڈے کے اسکواڈ سے مکمل طور پر آؤٹ نہیں ہوئے۔ ان کے بائیں ہاتھ کی انگلی کا علاج جاری ہے اور اگر وہ فٹ ہوگئے تو گوالیار کے میچ میں شرکت کریں گے ۔ سرفراز احمد کو حفظ ماتقدم کے طور پر طلب کیا گیا ہے۔ ایک تجویز ہے کہ ٹیسٹ سیریز سے قبل کامران کو آرام دے کر ان کی جگہ یاسر حمید یا یونس خان سے وکٹ کیپنگ کرائی جائے ۔ پاکستانی ٹیم کے کپتان شعیب ملک کا کہنا ہے کہ پاکستانی ٹیم کے لئے سیریز میں واپس آنے کے لئے یہ آخری موقع ہے ۔ ہم دونوں میچ جیت کر سیریز جیتنا چاہتے ہیں ۔ پاکستان ٹیم جیت کے لئے آخری دم تک مقابلہ کرے گی لیکن جیت کی ضمانت کوئی نہیں دے سکتا ۔ میں اور میرے کھلاڑی لڑیں گے ۔ کان پور میں میچ کھیلنے کے بعد پاکستانی ٹیم یوپی کے دارالحکومت لکھنئو میں قیام پذیر ہے ۔ پیر کو پاکستانی کھلاڑیوں نے لکھنئوکے سہارا سٹی میں دوگھنٹے پریکٹس کی جبکہ کھلاڑیوں نے ہوٹل میں پول اور جم سیشن میں حصہ لیا ۔ پاکستان کی طرح بھارتی کھلاڑیوں نے بھی سہارا سٹی میں پریکٹس کی ۔ بعدازاں پاکستانی ٹیم کے تھنک ٹینک نے لکھنئو میں میٹنگ میں حصہ لیا ۔جس میں کپتان شعیب ملک ، نائب کپتان یونس خان ، کوچ جیف لاسن اور منیجر طلعت علی نے شرکت کی ۔ احسن حمید ملک نے کہا کہ شکست کے بعد ڈریسنگ روم میں کھلاڑیوں سے کپتان نے بات کی جبکہ تھنک ٹینک کی میٹنگ میں چوتھے ون ڈے کے لئے حکمت عملی بنائی گئی ۔ شعیب ملک نے کہا کہ پاکستان اگلے دونوں میچ جیت کر سیریز جیتنا چاہتا ہے ۔ ہمیں جیت کے لئے سر دھڑ کی بازی لگانا ہوگی ۔ پاکستان اور بھارت کی ٹیمیں منگل کو خصوصی فلائٹ سے لکھنئو سے گوالیار پہنچیں گی ۔ بھارت نے ایک روزہ سیریز میں برتری حاصل کی ہوئی ہے اس لئے سیریز میں مقامی شائقین کی دلچسپی بڑھ گئی ہے۔ منگل کو بھارت کے صف اوّل کے اخبارات نے جیت کی خبر کو لیڈ اسٹوری کے طور پر شائع کیا ہے اور یووراج سنگھ کو زبردست خراج تحسین پیش کیا ۔ پاکستانی ٹیم گوالیار کے میچ سے قبل بدھ کو یہاں پریکٹس کرے گی ۔ پاکستان ٹیم میچ سے قبل اپنی حکمت عملی بنا کر ٹیم کو حتمی شکل دے گی۔ بھارتی کپتان مہندر سنگھ دھونی نے کہا ہے کہ ہمارے کھلاڑی اس میچ کو جیت کر سیریز پر نظریں جمائے ہوئے ہیں ۔ ہم چاہتے ہیں کہ گوالیار میں میچ جیت کر سیریز اپنے نام کریں ۔ تاہم انہوں نے کہا کہ ہم پاکستان کو کسی بھی طرح کمزور حریف تصور نہیں کرتے۔ یہ ٹیم کسی وقت بھی اپ سیٹ کرسکتی ہے۔

__________________