خرم شہزاد خرم

پاکستان کمزور حریف نہیں، ہرانے کے لیے سخت محنت کرنا ہوگی، کمبلے



بنگلور (نمائندہ خصوصی) بھارتی کپتان انیل کمبلے نے کہا ہے کہ بنگلور سے میں نے کرکٹ شروع کی یہاں ہونے والا ٹیسٹ میرے لیے خصوصی اہمیت کا حامل ہے ۔ہم کوشش کریں گے کہ بنگلور ٹیسٹ جیت کر سیریز دو صفر سے اپنے نام کریں ۔وہ جمعے کو چنا سوامی اسٹیڈیم میں پریس کانفرنس سے خطاب کرر ہے تھے ۔انہوں نے کہا کہ ہوم گراؤنڈ پر جب ٹاس کے لیے میدان میں اتروں گا تو یقینی طور میرے لیے یہ جذباتی لمحہ ہوگا میری خواہش ہے کہ ہم بنگلور کا ٹیسٹ جیت کر سیریز دو صفر سے جیتیں ۔ سچن اور دھونی کی فٹنس ہمارے لیے تشویش کا باعث ہے جبکہ ہمارے فاسٹ بولر بھی تجربہ کار نہیں ہیں ۔مجھے یقین ہے کہ فاسٹ بولر اس موقع سے فائدہ اٹھائیں گے ۔انہوں نے کہا کہ موسم میرے کنٹرول میں نہیں ہے لیکن پر امید ہوں کہ میچ میں ہمیں کامیابی ملے گا اس بات سے کوئی فرق نہیں پڑتا کہ پاکستان یہاں دو ٹیسٹ جیتا ہوا ہے ریکارڈ کسی بھی وقت تبدیل ہوسکتے ہیں ۔ ہم نے2005ء میں کول کتہ میں ٹیسٹ جیتا تھا اس بار میچ ڈرا رہا ریکارڈ وقت کے ساتھ ساتھ تبدیل ہوتے رہتے ہیں مجھے اپنی ٹیم کی کارکردگی کی فکر ہے ریکارڈ کی نہیں ۔انیل کمبلے نے کہا کہ بھارتی ٹیم تیسرے اسپنرز کو کھلانے کا فیصلہ میچ سے قبل کیا جائے گا ۔وکٹ پر زیادہ تر کور رہا ہے اس لیے میں نے اسے نہیں دیکھا ہے ۔انہوں نے کہا کہ میچ جیتنے کے لیے کیچ کرنا بے حداہم ہے ہاف چانس کو کیچ میں تبدیل کرنا ضروری ہے ۔انیل کمبلے نے کہا کہ نئی دہلی ٹیسٹ ہارنے کے بعد پاکستانی ٹیم سخت جاں حریف کے طور پر سامنے آئی ہے۔ہمیں یہ یقین کر لینا چاہیے کہ پاکستانی ٹیم کمزور نہیں ہے اور اسے ہرانے کے لیے سخت محنت کرنا ہوگی۔ابھی سے یہ کہنا مشکل ہے کہ ٹاس جیت کر میرا فیصلہ کیا ہوگا ۔ابھی اس بارے میں کچھ طے نہیں کیا ۔انہوں نے کہا کہ سچن کی جگہ یووراج کھیلیں گے اگر دھونی بھی نہ کھیلے تو دنیش کارتک وکٹ کیپنگ کریں گے ۔اس سوال کے جواب میں بھارتی ٹیم تین ہفتے میں تین ٹیسٹ کھیل رہی ہے انیل کمبلے نے کہا کہ یہ انٹر نیشنل کرکٹ کی ڈیمانڈ ہے۔ہم پاکستان سے میچ کھیلنے کے چار دن بعد آسٹریلیا روانہ ہوجائیں گے اس قسم کی صورتحال ہمارے لیے نہیں دنیا کی تمام ٹیموں کے لیے ہے ۔