محمدعدنان

ٹرینیڈاڈ میں بارش سے متاثر ہونے والے دوسرے ایک روزہ میچ میں ویسٹ انڈیز نے سری لنکا کو سات وکٹ سے شکست دے کر تین ایک روزہ میچوں کی سیریز میں دو صفر کی فیصلہ کن برتری حاصل کر لی ہے۔
ویسٹ انڈیز نے ٹاس جیت کر سری لنکا کو پہلے کھیلنے کی دعوت دی تھی اور جب سری لنکا کا سکور تین وکٹ کے نقصان پر بیاسی تک پہنچا تو بارش کی وجہ سے کھیل روکنا پڑا۔

ایک گھنٹے کی تاخیر سے میچ دوبارہ شروع ہوا تو میچ سنتالیس اوور تک محدود کر دیا گیا تاہم اکتیسویں اوور میں دوبارہ بارش شروع ہو گئی۔ اس وقت سری لنکا نے پانچ وکٹ کے نقصان پر ایک سو بارہ رہ بنائے تھے۔

بارش تھمنے کے بعد ڈک ورتھ لوئیس نظام کے تحت ویسٹ انڈیز کو فتح کے لیے پچیس اوور میں ایک سو پچیس رن بنانے کا ہدف ملا۔ ویسٹ انڈیز کا آغاز اچھا نہ تھا اور اٹھارہ کے مجموعی سکور پر اس کے تین کھلاڑی پویلین لوٹ چکے تھے۔

تاہم اس کے بعد پہلے ون ڈے کے ہیرو شیو نرائن چندر پال اور مارلن سیموئلز کی عمدہ بیٹنگ کی بدولت ویسٹ انڈیز نے مطلوبہ ہدف اکیسویں اوور میں تین وکٹ کے نقصان پر حاصل کر لیا۔چندر پال بیالیس گیندوں پر باون جبکہ سیموئلز انچاس گیندوں پر چّون رن بنا کر ناٹ آؤٹ رہے۔

پہلے ایک روزہ میچ میں ویسٹ انڈیز نے ایک سنسنی خیز مقابلے کے بعد سری لنکا کو ایک وکٹ سے شکست دی تھی۔ اس میچ میں آخری بال پر ویسٹ انڈیز کو فتح کے لیے چھ رن درکار تھے اور شیو نرائن چندرپال نے چمندا واس کی فل ٹاس گیند میدان سے باہر پھینک کر اپنی ٹیم کو فتح سے ہمکنار کیا تھا۔

تین میچوں کی سیریز کا آخری میچ جمعرات کو سینٹ لوسیا میں کھیلا جائے گا۔

__________________