خرم شہزاد خرم

برسبین (جنگ نیوز)ناقابل تسخیر آسٹریلیا نے پہلے ٹیسٹ میں اپنی مکمل برتری ثابت کرتے ہوئے سری لنکا کو ایک اننگز اور40 رنز سے شکست دے دی ، فاسٹ بولر بریٹ لی کی تباہ کن بولنگ کا مہمان بیٹسمینوں کے پاس کوئی جواب نہ تھا، انہوں نے چار کھلاڑیوں کو میدان بدر کیا، سری لنکا کے آخری پانچ بیٹسمین اسکور میں صرف 72 رنز کا اضافہ کرسکے۔ دوٹیسٹ میچوں کی سیریز میں کینگروز کو ایک صفر کی برتری حاصل ہوگئی ہے ۔ برسبین میں کھیلے گئے پہلے ٹیسٹ میچ میں آسٹریلوی کھلاڑی ہر شعبے میں چھائے رہے۔آسٹریلیا نے پہلی اننگز میں4 وکٹ کے نقصان پر551 رنز پر اننگز ڈکلیئر کر دی تھی ۔ جواب میں سری لنکا پہلی اننگز میں فالو آن کے بعد دوسری اننگز میں300رنز پر ڈھیر ہو گئی، اس طرح مہمان ٹیم دونوں اننگز میں آسٹریلیا کی جانب سے دیا جانیوالاہدف حاصل نہ کرسکی ایک اننگز اور 40 رنز سے ہار گئی۔ کھیل کے پانچویں روز سری لنکا نے دوسری اننگز 218 رنز 5 کھلاڑی آؤٹ پر دوبارہ آغاز کی تو بریٹ لی نے کسی بھی لنکن بیٹسمین کو وکٹ پر سنبھلنے کا موقع نہیں دیا ۔پوری 300 رنز بناکر آؤٹ ہوگئی ۔ دوسری اننگز میں بریٹ لی نے 4 وکٹیں حاصل کیں۔ برسبین میں کھیلے گئے پہلے ٹیسٹ کا ٹاس سری لنکن کپتان مہیلا جے وردھنے نے جیتا اور پہلے فیلڈنگ کا فیصلہ کیا جو انہیں مہنگا پڑا۔ فل جیکس،مائیکل ہسی اور مائیکل کلارک کی شاندار سنچریوں کی بدولت آسٹریلیا نے551 رنز 4 کھلاڑی آؤٹ پر اپنی اننگز ڈکلئیر کردی۔ اس مرتبہ وینڈورٹ ، کپتان جے وردھنے اور بارش نے کچھ دیر شکست کو ٹالنے کی کوشش کی لیکن ان کی کوشش لاحاصل ثابت ہوئی ۔ بریٹ لی میچ میں 8 وکٹیں لیکر مین آف دی میچ قرار پائے ۔

__________________