خرم شہزاد خرم

ملتان(نمائندہ خصوصی)جنوبی افریقی کرکٹ ٹیم کے کوچ مکی آرتھر نے کہا ہے کہ کراچی میں بے نظیر بھٹو کی ریلی پر ہونے والے بم دھماکے سے ہماری ٹیم کی کارکردگی پر کوئی اثر نہیں پڑا ہے۔پاکستان ٹیم اچھا کھیل کر جیتی ہے۔وہ جمعرات کو ملتان اسٹیڈیم میں پریس کانفرنس سے خطاب کررہے تھے۔انہوں نے کہا کہ پاکستان میں سکیورٹی کوئی مسئلہ نہیں ہے۔کراچی میں ہونے والے دھماکے کے بعد جو طریقہ کار اختیار کیا گیا وہ ہماری نظر میں صحیح ہے۔کیوں کہ یہی درست طریقہ کار تھا کہ میچ لاہور کرایا جائے۔اتفاق سے لاہور کے پہلے ون ڈے کے بعد دھماکہ ہوا لیکن بم دھماکے کی وجہ سے ہماری کارکردگی پر کوئی اثر نہیں پڑا ہے۔ دھماکے کو ہماری شکست کاجواز نہیں بنایا جاسکتانہ ہی اس وجہ سے ہماری توجہ ہٹی ہے۔کیلس کی بیٹنگ فارم ہمارے لئے تشویش کی بات نہیں ہے۔وہ ٹیسٹ سیریز میں تین سنچریاں بنا چکے ہیں اور ہمیں امید ہے کہ وہ ون ڈے سیریز میں ہمارے لئے کارآمد اننگز کھیلیں گے۔مکی آرتھر نے کہا کہ اس وقت پوری ٹیم ون ڈے سیریز پر فوکس کئے ہوئے ہے۔اور ہم ملتان کا میچ جیت کر سیریز میں واپس آنا چاہتے ہیں۔یہ میچ ہمارے لئے زندگی اور موت کے مترادف ہے۔انہوں نے کہا کہ مڈل آرڈر بیٹنگ کی کارکردگی تشویش ناک حد تک خراب ہے۔پاکستان نے دونوں میچوں میں اچھی کارکردگی دکھا کر ہمیں آؤٹ کلاس کیا۔انہوں نے بیٹنگ اور بولنگ میں اچھے کھیل کا مظاہرہ کیا اور بہتر پلان کے ساتھ میدان میں آئے۔انہوں نے کہا کہ رات کو اوس گرنے سے فیلڈنگ متاثر ہوسکتی ہے اگر پہلے بیٹنگ کا موقع ملے تو اس سے فرق پڑے گا۔مکی آرتھر نے کہا کہ پاکستان نے اپنی کنڈیشن کا بھرپور فائد اٹھایا اور وہ بہت اچھا کھیلے۔ماضی میں پاکستان کی وکٹیں اس قسم کی نہیں ہوتی تھیں ۔اس بار سلو اور ٹرننگ وکٹیں بنائی گئی ہیں۔جس سے پاکستان کو فائدہ ہورہا ہے۔اس سے قبل پاکستان کی وکٹیں بیٹنگ کے لئے آئیڈیل ہوتی تھیں اور اس پر بال برابر آتا تھا۔لیکن جو وکٹیں بنائی گئیں ہیں اس سے پاکستان ٹیم کو فائدہ پہنچ رہا ہے۔

__________________