خرم شہزاد خرم

امپائرز کا فیصلہ اٹل نہیں،کھلاڑیوں کو تین اپیلوں کا حق دے دیا گیا



دبئی (جنگ نیوز) کرکٹ میں متنازعہ فیصلوں کو کم کرنے کے لئے آئی سی سی نے ایک اور اہم قدم اٹھاتے ہوئے کھلاڑی کو ٹی وی امپائرز سے رجوع کرنے کا اختیار دینے کا فیصلہ کیاہے جس پر آزمائشی طور پر عملدرآمد پاکستان میں ہونے والے چیمپئنز ٹرافی ٹورنامنٹ سے ہو گا۔ آئی سی سی کے فیصلے کے مطابق ون ڈے میچز کے دوران اگر کسی کھلاڑی کو فیلڈ امپائر کے فیصلے پر اعتراض ہو تو اننگز کے دوران تین مرتبہ ٹی وی امپائرز سے اپیل کر سکتا ہے، اس قانون پر آزمائشی طور پر عملدرآمد پاکستان میں ستمبر میں ہونے والے چیمپئنز ٹرافی ٹورنامنٹ میں کیا جائے گا ٹی وی امپائر ری پلے کی مدد سے حتمی فیصلہ دے گا جبکہ اسے Hawkeye اور Snikometer کے استعمال کا اختیار نہیں ہوگا۔دوسرے الفاظ میں کہا جاسکتا ہے کہ گورننگ باڈی نے اس فیصلے سے قراردیا ہے کہ امپائرز کا فیصلہ حتمی اور اٹل نہیں،کھلاڑی ایک دو نہیں بلکہ تین بار اس پر اعتراض کرسکتاہے،اور ممکن ہے کہ فیصلہ اپنے حق میں بھی حاصل کرلے۔ کھلاڑیوں کو اپیل کا اختیار دینے کی یہ تجویز 2005 ء میں میلکم اسپیڈ اور آئی سی سی کے جنرل منیجر کرکٹ ڈیوڈ رچرڈسن نے دی تھی جس کو کرکٹ کمیٹی اور ایگزیکٹو کمیٹی میں منظور کر لیا گیا تھا لیکن آئی سی سی کے فل ممبران کے اجلاس میں اس کی منظوری نہیں مل سکی تھی، پانچ ووٹ اس قانون کی مخالفت اور پانچ حمایت میں تھے، فل ممبران کے اجلاس میں پاکستان اور آسٹریلیا نے اس کی مخالفت کی تھی، آئی سی سی کے چیف ایگزیکٹیو میلکم اسپیڈ کے مطابق یہ قانون ٹیسٹ کرکٹ کے لئے نہیں جبکہ گزشتہ سال انگلش کاوٴنٹی کرکٹ میں اس کو پہلی مرتبہ متعارف کرایا گیا تھا۔ دوسری جانب آئی سی سی نے فیصلہ کیا ہے کہ ٹیسٹ میچز کے دوران امپائرنگ کے فرائض چونکہ الیٹ پینل میں شامل دنیا کے بہترین امپائرز کرتے ہیں اس لیے ان سے غلطیاں سرزد ہونے کے امکانات کم ہوتے ہیں، لہٰذا ٹیسٹ میچز کے دوران کھلاڑیوں کو یہ حق نہیں دیا جائے گا۔