عزم ، مسلسل محنت اور منزل


انسانی شخصیت کو تباہ و برباد کرنے یا کامیابی سے ہمکنار کرنے میں انسان کے اندر بسے خوف کا کردار نہایت اہمیت کا حامل ہوتا ہے۔اگر انسان اپنے خوف سے صحیح راستے کا تعین کرنے میں کامیاب ہو جائے تو یہ اس کو کامیاب لوگوں کی صف میں لا کھڑا کر سکتا ہے۔اور اگر اس کے برعکس وہ اپنی روشن مزاجی اور تخلیقی قوتوں کو دنیاوی قوتوں کی سرد مہری اور پیچیدگیوں کی نظر کردے تو وہ اپنے اردگرد تیزی سے بڑھتے ہوئے قدموں کی چاپ تو سن سکتا ہے مگر خود قوت کی دلدل میں پھنسا اپنے ہمنواؤں اور راہ گیروں سے بہت پیچھے رہ جاتا ہے۔
ضرورت اس امر کی ہے کہ آپ خود کو کتنا اور کس حد تک جانتے ہیں آج کے نوجوانوں نے خود کو محدود کر لیا ہے جس وجہ سے وہ دن بہ دن الجھنوں کا شکار ہوتے جا رہے ہیں اس کی مثال ایسے ہے کہ کہ جس طرح ایک طالب علم بچپن میں سوچ لیتا ہے کہ میں بڑا ہو کر ڈاکڑ ، انجینئر یا کمپیوٹر اکسپرٹ بنوں گا ان سوچوں میں گم وہ وقت کے دائرے میں پروان چڑھتا ہے۔ان میں سے کچھ خوش قسمت ہوتے ہیں جو وقت کی بنھور سے بغیر کسی امتحان کے اپنی منزل کی طرف گامزن ہو جاتے ہیں مگر کچھ وقت کی نزاکت کے پیش نظر اپنی تمام تر محنت اور کاوشوں کے باوجود خود کو وقت کی نذر کر دیتے ہیں ان کی مثال ایسے ہے کہ کلاس میں نمایاں ہونے کے باوجود معاشی اور معاشرتی مسائل ان کے راستے میں رکاوٹیں کھڑی کر دیتے ہیں۔مگر وہ پرسکون اپنی منزل کی جانب گامزن ہونے کی لئے پر عزم رہتے ہیں۔
مندرجہ بالا شخصیات کے حامل افراد کے کامیابی سے ہمکنار ہونے کے مواقع کافی مقدار میں ہوتے ہیں مگر ان کے برعکس کچھ لوگ ایسے ہوتے ہیں۔ کو اپنی منزل سے واقف ہوتے ہیں مگر وہ وقت کی کشمکش میں شک و شہبات کی زندگی گزارتے ہیں ایسے افراد سے کسی بھی طرح کی کوئی امید وابستہ نہیں کی جا سکتی یا دوسرے معنوں میں کوئی امید وابستہ ہو نہیں سکتی کیونکہ وہ کب کیا کر جائیں خواہ وہ غلط ہو یا درست ، یہ لوگ رسواہ ہو کر پیش منظر پر آئیں یا کامیاب ہو کر پس منظر کا حصہ بن جائیں کچھ کہا نہیں جا سکتا۔
ضرورت اس امر کی ہے کہ ہم خود سے اور اپنے اردگرد سے کس حد تک آشنا ہیں آج جب دنیا گلوبل ولیج کی شکل اختیار کر چکی ہے ہر چیز مختصر سے مختصر ہوتی چلی جا رہی ہے وقت تیزی سے گزرتا چلا جا رہا ہے ہر ایک وقت کے ہاتھوں عاجز نظر آتا ہے ۔ ایسے میں ہم کو دیکھنا ہوگا کہ ہم کیا کر رہے ہیں ہمیں کس رہ پر چلنا ہے اپنے راستے متعین کرنا ہوں گئے ۔ خودی کو جاننا ہوگا تاکہ ہم اپنے آج کو روشن بنا سکیں اور آنے والا کل ہمارا ہو۔