ابو عمار

السلام و علیکم،

ہم لوگ کافی عرصے سے پاکستان ٹور کا پروگرام بنا رہے تھے مگر ہر دفعہ کوئی نا کوئی مسئلہ ہوجاتا اور ہمارا یہ پروگرام دھرا کا دھرا رہ جاتا۔ اس رمضان میں ہم گھر والوں نے پھر سے پروگرام بنانا شروع کیا اور میں نے اپنے آفس میں سالانہ چھٹیوں کے لیے اپلائی بھی کردیا۔ جب چھٹیاں مل گئیں تو ہم نے یہ عید لاہور میں منانے کا پروگرام بنایا اور اس کے بعد راولپنڈی جانے کا بھی ارادہ تھا۔ چونکہ ہمارے فورم کے بہت سے ساتھی راولپنڈی اور لاہور میں رہتے ہیں تو میں نے سب کو ڈھونڈا اور ان سے ملنے کا پروگرام بھی بنایا، جس کی تفصیلات میں اگلی پوسٹ میں دوں گا۔ میرے اس ٹرپ کو منتظمین بھائی نے ‘کاروان پاک۔نیٹ‘ کا نام دیا اور حکم دیا کہ میں اپنے ساتھ کیمرہ لے جائوں اور تصاویر کھینچ کر آپ لوگوں کے ساتھ شئیر کروں۔ یہ پوری تھریڈ کاروان پاک۔نیٹ کے پاکستان ٹور کی ہے۔

تو جناب ہمارا پروگرام یہ بنا کہ ہم اپنی مہران پرعید سے دو دن پہلے کراچی سے لاہور کے لیے چلیں گے۔ ایک رات صادق آباد میں گزار کے دوسرے دن لاہور پہنچ جائیں گے۔ پھر لاہور سے عید کے دوسرے دن راولپنڈی کے لیے چلیں گے اور وہاں دو دن ٹھہر کر مری اور مظفرآباد کے لیے نکل جائیں گے۔ وہاں سے واپس راولپنڈی اور پھر لاہور اور پھر کراچی۔ ان شہروں کے درمیان جو بھی اہم مقامات آئیں گے وہاں بھی جانے کا ارادہ تھا اور جہاں کی جو بھی مشہور چیز ہیں وہ سب بھی کھانے کا ارادہ تھا۔

تو جناب ہم نے اللہ کے کرم سے اپنی توقعات سے کافی زیادہ جگہوں کی سیر کی اور خوب انجوائے کیا۔ یہ تھریڈ شروع کرنے کا میرا ایک مقصد تو یہ ہے کہ اپنے اس ٹرپ کو آپ لوگوں کے ساتھ بھی شئیر کروں اور اس سفر میں ہونے والے اچھے برے تجربات بھی آپ لوگوں کے ساتھ شئیر کروں تاکہ آپ لوگ بھی ان سے مستفید ہوسکیں۔

اس سفر کا خلاصہ کچھ یوں ہے کہ اس پورے سفر میں ہماری گاڑی نے 4105 کلومیٹر سفر کیا۔ پورے سفر میں ہمیں 34 دفعہ سی این جی اور 6 مرتبہ پیٹرول ڈلوانا پڑا۔ سی ان جی 7401 روپے اور پیٹرول 3000 کا خرچ ہوا۔ اس طرح ہماری گاڑی نے ایک کلومیٹر تقریباً ڈھائی روپے میں کیا، جو کہ میرے حساب سے بہت اچھی ایوریج رہی۔ بلکہ میں یہ کہوں گا کہ اتنے لمبے ٹرپ پر یہ ہمیں ٹرین، بس اور ٹیکسیوں سے بہت سستا پڑا۔ پورے سفر میں ہمیں 38 مرتبہ 755 روپے کا ٹول ٹیکس دینا پڑا جو ہمیں اس وجہ سے بہت برا لگا کہ ہمیں ہر جگہ گاڑی روکنی پڑتی تھی۔

اس سفر میں ہم جن بڑے بڑے شہروں میں گئے ان میں لاہور، کھیوڑہ، راولپنڈی، اسلام آباد، مظفرآباد، مری، منگلا ڈیم، میرپور (آزاد کشمیر) اور بہاولپور شامل ہیں۔ اپنی اگلی پوسٹ میں، میں ان سب شہروں کی تفصیل اور تصاویر بھی آپ لوگوں کے ساتھ شئیر کروں گا۔ ایک چیز جس کا ہمیں بہت افسوس رہا، وہ یہ کہ ہر شہر میں ہم سے کوئی نا کوئی جگہ گھومنے سے رہ گئی۔ کئی مرتبہ اپنے بجٹ یا گاڑی یا معلومات کی کمی یا پھر وقت کی کمی کی وجہ سے کسی بھی شہر کو ہم پورا نہیں دیکھ سکے۔ اب انشاءاللہ اگلی مرتبہ ان سب جگہوں کو بھی اپنے پروگرام میں شامل کریں گے۔

تو جناب یہ تو تھا ہمارے سفر کا خلاصہ، اب اگلی آنے والی پوسٹ میں، میں ہر شہر کی الگ سے تفصیلات دوں گا اور اس کے ساتھ تصاویر اور ویڈیو کلپ بھی آپ لوگوں کے ساتھ شئیر کروں گا۔ امید ہے آپ لوگ بھی ہمارے تجربات سے لطف اندوز ہوں گے۔

جاری ہے۔

حیدر

بتا کر آئیں گے تو پھر تو نہیں پڑے گی ۔اب ویسے قسمت خراب ہوئی تو الگ بات ہے

راجہ اکرام

ویسے آپ نے خود ہی ذکر کیا تھا کہ میری طرح آپ منہ پر بہت عمدہ انداز سے جھوٹ بول سکتے ہیں۔۔۔۔۔۔۔۔۔ تو بس انکار کر دیجئے گا پہچاننے سے

__________________
محتاج اصلاح و دعا

ابو عمار

لاہور میں ہم نے گوگل میپ میں سارے علاقے کھنگال لیے کے ہمارے رستے میں کون کونسے قابل دید علاقے آتے ہیں۔ ہم نے یہ بھی دیکھا کہ موٹر وے پر تھوڑا سا اندر جا کر کھیوڑہ آتا ہے۔ فاصلہ دیکھا تو تقریباً 30 کلومیٹر بنتا تھا۔ ہمارا اندازہ تھا کہ ہمیں آدھا گھنٹہ کھیوڑہ جانے میں اور آدھا گھنٹہ وہاں سے آنے میں لگے گا اور ہم وہاں ایک گھنٹہ گزاریں گے۔ اس طرح ہم شام تک راولپنڈی پہنچ سکتے ہیں۔ لاہور پہنچنے تک میں نے اتنا ہارن بجایا کہ وہ بیچارہ اب گونگا ہوچکا تھا۔

عید کے تیسرے دن 23 اکتوبر 2009 کو ہم لاہور سے صبح 10:30 پر راولپنڈی کے لیے نکلے۔ چونکہ عید کا تیسرا دن تھا اس لیے ہمیں کہیں بھی کوئی گاڑیوں کے پارٹس کی دکان نہیں مل رہی تھی جہاں سے میں گاڑی کا ہارن خرید سکوں۔ اسی تلاش میں تھا کہ میرے موبائل پر اپنے پاک نیٹ کے ایک ممبر 'مرزا قاروق' کی کال آئی کہ سرمد بھائی آپ راولپنڈی میں کہاں ملیں گے ہم آپ سے ملنے کے لیے اپنے شہر سے نکل چکے ہیں۔ مجھے بھی ایک جھٹکا لگا اور میں نے ان کو بتایا بھی کہ بھائی ہمارا تو یہ پروگرام تھا کہ ہم سب پاک نیٹ والوں نے 24 اکتوبر کو دوپہر ایک بجے راجہ اکرام کے گھر اکٹھا ہونا تھا اور یہ پوری تفصیل میں نے سب کو ای میل بھی کردی تھی اور ابھی تو میں لاہور سے نکلا ہوں راولپنڈی کے لیے۔ وہ تھوڑا سا پریشان ہوگئے اور کہنے لگے کہ میں اورخلیل آپ سے ملنے کے لیے اپنے شہروں سے نکل چکے ہیں‌ اور ہم نے تو کھاریاں بھی کراس کر لیا ہے۔ مجھے بہت شرمندگی بھی ہوئی اور میں نے ان کو سمجھایا بھی کہ بھائی شروع سے ہی عید کے چوتھے دن ملنے کا پروگرام تھا اور آج تو عید کا تیسرا دن ہے۔ اس کے بعد میں نے ان سے ریکوسٹ کی کہ آپ کل کا پروگرام بنا لیں۔ میں خلیل اور فاروق کا مشکور ہوں کہ انہوں نے میرے لیے اتنا کیا۔

دوپہر 11 بجے ہم موٹروے پر چڑہ چکے تھے۔ موٹروے پر گاڑی چلانے کا یہ میرا پہلا تجربہ تھا۔ موٹروے ہمیں بہت اچھا لگا سوائے کچھ چیزوں کے۔ مثال کے طور پر موٹروے پر آپ کو سی این جی صرف 3 جگہ پر ملتی ہے اور وہاں بھی اتنی لمبی لائن لگی ہوتی ہے کہ آپ کو آدھے سے پونا گھنٹہ تک لگ جاتا ہے، جس سے آپ کے سفر میں بہت حرج ہوتا ہے۔ اس کے علاوہ موٹروے بہت ہی عمدہ ہے اس میں کوئی ایک گڑھا نہیں ہے، ایک ہی روڈ آخر تک چلا جا رہا ہے، بہت ہی عمدہ ہے۔ پر میں اپنی طبیعت کا کیا کروں کہ مجھ جیسے پینڈو ڈرائیور کو ایڈونچر چاہئیے۔ جب روڈ بھی بالکل بہترین ہو اور گاڑی بھی بہترین ہو تو مجھے بوریت ہونے لگتی ہے، کچھ کام ہی نہیں ہوتا کرنے کو بلکہ مجھے تو نیند آنے لگتی ہے۔ یہاں بہت سے لوگ مجھ سے اختلاف کریں گے مگر میں کیا کروں کہ میں ہوں ہی ایسا۔ اس کے مقابلے میں واپسی پر میں جی ٹی روڈ سے آیا اور بہت مزہ آیا، کبھی آپ بھینس کے روڈ کراس کرنے کا انتظار کررہے ہیں اور کبھی اپ گدھا گاڑی والے کی منتیں کررہے ہیں کہ بھائی آپ روڈ کراس کرلیں تو میں گاڑی آگے بڑھائوں۔ میرے وطن کی دھول ہے مٹی ہے جو پھانکنے کو ملتی ہے، شہروں سے گزریں تو دیواروں پر اوپلے لگے ہوئے ہوتے ہیں، ان کی بو آتی ہے۔ جی ٹی روڈ مکمل پاکستانی روڈ ہے جبکہ موٹروے مکمل انگریز روڈ لگتا ہے۔ میں یہ کہتا ہوں کہ اگر آپ کو جلدی جانا ہے تو موٹروے سے جائیے اور اگر لطف اندوز ہونا ہے تو جی ٹی روڈ سے۔

کچھ تصاویر موٹروے کی:



یہ فیصل آباد انٹرچینج ہے:



راستے میں ایک جگہ 'بھیرہ' آتی ہے، وہاں ہم نے کھانا کھایا اور گاڑی میں سی این جی بھی بھرائی۔

تھوڑا آگے چلیں تو دریائے جہلم آتا ہے۔ اسے بھی دیکھ کر ہمیں بہت افسوس ہوا کہ اس میں بھی پانی بہت کم تھا:


دریائے جہلم سے تھوڑا آگے چلیں تو 'لِلٰی انٹرچینج' آتا ہے۔ اگر آپ کو کھیوڑہ جانا ہو تو یہاں سے 'پنڈ دادن خان' کی طرف جانا پڑتا ہے۔ یہاں سے کھیوڑہ تقریبا 30 کلومیٹر دور ہے۔ روڈ چھوٹا سا ہے مگر ہے صحیح حالت میں۔

یہ ہے پنڈ دادن - جہلم روڈ کی تصویر:



دوپہر 3:15 پر ہم کھیوڑہ شہر پہنچ چکے تھے:



اور یہ ہے کھیوڑہ کا ریلوے اسٹیشن:





آج کی پوسٹ میں یہیں ختم کرتا ہوں۔ کل آپ سے کھیوڑہ کان کے تجربات، تصاویر اور کچھ ویڈیو کلپ شئیر کروں گا، انشاءاللہ۔

خرم شہزاد خرم

جاری کرتے رہیں بہت اچھا لگ رہا ہے پڑھ کر اور ساتھ تصویریں بھی

محمدعدنان

سرمد بھائی بہت اچھا لگا آپ کے سفر کا حال پڑھ کر اور آپ رپورٹنگ بھی بہت اچھی کررہے ہو ماشاء اللہ ایسا لگتا ہے کہ جیسے ہم بھی آپ کے ساتھ ساتھ سفر کررہے ہیں ۔
بھائی ایک تو آپ سے نہ ملنے کا بہت افسوس ہے اور دوسرا آپ کو ممبرز کی فوٹو بنانی چاہئیے تھیں اسی بہانے ہم بھی یاروں کا دیدار کرلیتے

__________________

راجہ اکرام

عدنان بھائی
مفت میں‌ دیدار نہیں ہوتا
کچھ خرچہ کرو۔۔ پھر دیدار بھی ہو جائے گا

محمدعدنان

اچھا یار !
دیکھتے ہیں

راجہ اکرام

دیکھتے ہی رہ جائیں گے

شاہ جی 90

واقعی ایسا لگتا ہے کہ ہم بھی سرمد بھائی کے ساتھ سفر کر رہے ہیں اور ہاں سفر کی تھکاوٹ بھی ایسے ہی محسوس کر رہے ہیں جیسی سرمد بھائی نے کی ہو گی

راجہ اکرام

شاہ جی ابھی سے تھک گئے ہہیں
ابھی تو پنڈی بھی نہیں پہنچے

شاہ جی 90

راجہ جی کیا کریں معاملہ کچھہ ایسا ہے کہ سفر ہمیں ہمیشہ تھکا دیتا ہے ، ہاں سفر کے بعد کچھہ دیر آرام کر لیں تو پھر فریش ہوتے ہیں ، اور یہ سفر تو ہم 15/15 گھنٹے دفتر میں کام کرنے کے ساتھہ ساتھہ کر رہے ہیں

مسافر

تھوڑا سا آرام خود بھی کرو اور ہم کو بھی کرنے دو بھائی
آخر ہم بھی ساتھ ساتھ ہیں

شاہ جی 90

ارے نہیں یہ سفر تو اتنا پیارا ہے کہ تھکن کی انتہا پر بھی جاری رکھنے کو دل چاہتا ہے

shafresha

سرمد جانی السلام علیکم،
بندہ آپ کی مدد کے لیئے حاضر ہے!

shafresha

اس معاملے میں سرمد بہت "ٹچی" ہے!