ھارون اعظم

اپنی سالانہ چھٹی پر جاتے ہوئے دل کی عجیب حالت ہوتی ہے۔ اپنے وطن کا کیا حال ہوگا؟ بہت کچھ تبدیل ہوگیا ہوگا۔ خبروں میں تو دیکھتے ہی رہتے ہیں لیکن آنکھوں دیکھے حال کی طرح نہیں ہوتا۔ کچھ اس طرح کے خیالات دل میں لئے، میں پشاور ائیرپورٹ پر اترا۔

ائرپورٹ پر ہی باہر کے حالات کا اندازہ ہورہا تھا۔ ائرپورٹ کے اندر آنے کے لئے گاڑیوں کی لمبی قطار کھڑی ہوئی تھی۔ پولیس کی اضافی نفری تعینات تھی۔ باہر نکل کر شہر کی مختلف شاہراہوں پر سیکیورٹی اہلکار بنکر بنا کر کھڑے تھے۔ مختلف راستوں سے گزرتے ہوئے پہلے کے حالات کے بارے میں سوچ رہا تھا۔ کس کی نظر لگ گئی پشاور کو؟ جو روزانہ دھماکوں کی زد میں ہے۔ وہ شہر جو اپنی مہمان نوازی کے لئے مشہور تھا، آج مہمانوں کے لئے ترستا ہے۔

ڈیڑھ سال میں بہت کچھ بدل گیا ہے۔ جن سڑکوں پر گاڑی میں بیٹھ کر UAE گیا تھا، وہ سڑکیں آج کھنڈر بنے ہوئے تھے۔ بہت ترقی ہوئی ہے۔ ٹرانسپورٹ کے کرایوں میں اضافے سے ہی ظاہر ہے۔ کچھ دوست جو صوابی میں گدون انڈسٹریل اسٹیٹ میں کام کرتے ہیں، ان کے مطابق ان کی آدھی تنخواہ تو کرایوں کی نذر ہوجاتی ہے۔ اور بھی بہت فیلڈز میں ترقی ہوئی ہے۔ روٹی مہنگی اور ایس ایم ایس سستے ہوگئے ہیں۔ اس سے زیادہ کیا امید کرسکتے ہیں بہتری کی؟

آئے دن کے دھماکوں نے کاروبار کو بہت متاثر کیا ہے۔ لیکن یہ دیکھ کر بہت خوشی ہوئی کہ عام آدمی مایوس نہیں ہے۔ حالات خراب ضرور ہیں لیکن ہر رات کے بعد صبح ضرور طلوع ہوتی ہے۔ انشاء اللٰہ جلد ہی یہ آزمائشیں ختم ہوںگی۔ اور ملک میں امن وامان کی فضاء پھر سے بحال ہوگی۔

نیلم خان

انشاءاللہ ۔۔۔۔۔۔۔ بہت جلد تبدیل آئے گی

محمدعدنان

انشاءاللہ ۔۔۔۔۔۔۔ بہت جلد تبدیلی آئے گی