قضا روزہ ہوا تو کیا ، نہ افطاری قضا ہو گی
یہی عزمِ مصمم لے کے روزہ دار بیٹھے ہیں

کہاں ہے شہر میں افطار ، آخر کھوج ہی لیں گے
اسی خاطر تو صبح سے لیے اخبار بیٹھے ہیں

یہ درجن ڈیڑھ بچے بھی شریکِ کارِ خیر ہوں گے
بہت سے جا چکے ، باقی جو ہیں تیار بیٹھے ہیں

ثواب اُڑتا ہے اُڑ جائے ، سموسہ اُڑنے نہ پائے
اسی دُھن میں لگائے گھات روزہ دار بیٹھے ہیں

جھپٹنے کو ، پلٹنے کو ، پلٹ کر پھر جھپٹنے کو
لئے خونِ گرم اقبال کے شاہکار بیٹھے ہیں

وہ اِک شاہیں بچہ مُرغے کی پوری قاب لے بھاگا
یہ حضرت رس گُلوں کی ساری سینی مار بیٹھے ہیں

حلق تک ٹھونسنے کے بعد ہے اب نیم بے ہوشی
نہیں ہلنے کی طاقت ، کیا کریں ، لاچار بیٹھے ہیں

بھلا کیسے پہنچ پائیں کسی ڈونگے تک انجم جی
وہ خالی ہاتھ کونے میں زبون و خوار بیٹھے ہیں

محمد اجمل انجم/