::: معشوق جو ٹھگنا ہے تو عاشق بھی ہے ناٹا :::

معشوق جو ٹھگنا ہے تو عاشق بھی ہے ناٹا
اس کا کوئی نقصان نہ اس کو کوئی گھاٹا

تری تو نوازش ہے کہ تو آگیا ہے لیکن
اے دوست مرے گھر میں نہ چاول ہے نہ آٹا

لڈن تو ہنی مون منانے گئے لندن
چل ہم بھی کلفٹن پہ کریں سیر سپاٹا

تم نے تو کہا تھا کہ چلو ڈوب مریں ہم
اب ساحلِ دریا پہ کھڑے کرتے ہو ٹاٹا

عشاق رہِ عشق میں محتاط رہیں گے
سیکھا ہے حسینوں نے بھی اب جوڈو کراٹا

کالا نہ سہی لال سہی تل تو بنا ہے
اچھا ہوا مچھر نے ترے گال پہ کاٹا

اس روز سے میں نے اس کو چھیڑا تو نہیں تھا
جس روز سے ظالم نے جمایا ہے چماٹا

جب اس نے بلایا تو ضیاء چل دئیے گھر سے
بستر کو رکھا سر پہ لپیٹا نہ لپاٹا

::: ضیاء الحق قاسمی :::