عبداللہ حیدر

محترم بھائیو! فورم کے ناظمین نے میرا تعارف کراتے وقت کچھ زیادہ ہی مبالغے سے کام لیا ہے۔ مجھے قرآن و حدیث سے کچھ واقفیت ضرور ہے لیکن اتنی نہیں کہ اپنے آپ کوعالم کہلا سکوں۔ مفتی اور عالم درحقیقت انبیاء کا وارث ہوتا ہے اور اس کے لیے جیسا کچھ علم و عمل درکار ہے اپنا دامن اس سے خالی نظر آتا ہے۔ شرعی مسئلے کا حل بتانا اتنی بڑی ذمے داری ہے جس کا تصور بھی نہیں کیا جا سکتا۔ اسی لیے صحابہ کرام رضوان اللہ علیہم اجمعین فتوٰی دینے میں جلدی کو ناپسند فرماتے تھے۔ ان میں سے ہر ایک کی خواہش ہوتی تھی کاش اس کے بجائے کوئی دوسرا شخص فتوٰی دے دے۔عبد اللہ بن مبارک رحمہ اللہ نے عبد الرحمٰن بن ابی یعلیٰ کا قول بیان کیا ہے کہ میں نے مسجد نبوی میں ایک سو بیس صحابہ کرام کے دیدار کا شرف حاصل کیا ان کی احتیاط کا عالم یہ تھا کہ ان میں سے ہر حدیث بیان کرنے والے کی خواہش ہوتی کہ کاش وہ اس ذمے داری سے بچ جائے اور کوئی دوسرا شخص اس کو بیان کر دے۔ وجہ یہ ہے ہے کہ شرعی مسئلہ بتانا حقیقت میں اللہ تعالیٰ کا قانون بتانا ہے اور اللہ تعالیٰ پر جھوٹ کی سزا جہنم ہے۔ فرمایا:
قل ان الذین یفترون علی اللہ الکذب لا یفلحون
" کہہ دیجیے، جو لوگ اللہ پر جھوٹ گھڑتے ہیں وہ کامیاب نہ ہوں گے۔"
مزید فرمایا
فویل للذین یکتبون الکتاب بایدیھم ثم یقولون ھذا من عند اللہ لیشتروا بہ ثمنًا قلیلا
" ان لوگوں کے لیے تباہی (ویل) ہے جو اپنے ہاتھوں سے کتاب لکھتے ہیں پھر کہتے ہیں یہ اللہ کی طرف سے ہے۔ ۔۔۔۔"
اور ارشاد باری تعالیٰ ہے۔
قل انما حرم ربی الفواحش۔۔۔۔۔۔۔۔و ان تقولوا علی اللہ ما لا تعلمون
" کہہ دیجیے میرے رب سے حرام کیا بے حیائی کی باتوں کو ۔۔۔۔۔۔۔۔۔۔۔اور یہ کہ تم اللہ پر وہ باتیں کہو جو تم نہیں جانتے۔"
ائمہ سلف اس بارے میں اس قدر محتاط تھے کہ امام مالک جب کوئی مسئلہ اپنے اجتہاد سے بیان کرتے تو ساتھ یہ آیت کہہ دیتے تھے۔" یہ محض ہمارا ظن ہے اور ہمیں یقین نہیں ہے۔ جو شخص اپنے آپ کو منصب افتاء پر فائز کرے اس کے لیے ضروری ہے کہ وہ وجوہ قرآن، اسانید صحیحۃ اور سنن کا عالم ہو۔ کتاب اللہ اور اس کے ناسخ و منسوخ، محکم و متشابہہ، تاویل و تنزیل، مکی و مدنی سورتوں اور ان کے معانی و مطالب سے آگاہ ہو۔ مختلف علاقوں کے اہل علم کے اختلاف کا بھی اس کو علم ہو۔ جو علماء کے اقوال کو جانتا ہو اور اسے معلوم ہو کہ ان اقوال کا ماخذ و مصدر کیا ہے۔ روایات کا حافظ، درایات سے واقف، طاعات کا محافظ اور شہوات و شبہات سے مجتنب ہو۔
اپنا حال تو یہ ہے کہ ان میں سے کسی شرط پر بھی میں پورا نہیں اترتا۔ مسئلہ بتانے کے لیے جس پائے کا علم و تقوٰی چاہیے میں اس سے تہی دامن ہوں۔ اور میں اس طرز عمل کو درست نہیں سمجھتا کہ نیم ملاؤں کی طرح خطرہ ایمان بنا جائے۔ جس چیز کا مجھےعلم ہو گا اس کے بتانے میں میں تامل نہیں کروں گا ان شاء اللہ اور کوشش ہو گی کہ اپنی طرف سے کوئی بات بتانے کی بجائے علماء اور پاک فورمز کے درمیان رابطے کا کردار ادا کروں۔