چاچا کمال

محکمہ صحت کے ایک اعلا افسر دماغی امراض کے اسپتال کے معائنے کے دوران ایک مریض کے کمرے میں جھانک رہے تھے۔۔انہوں نے دیکھا کے مریض نے اچانک چھلانگ لگا کر پوزیشن لی اور اپنی انگلیوں کو پستول کے انداز میں ڈاکٹر پر تان لیا۔۔پھر اس نے منہ سے آواز نکالی۔۔‘‘ٹھاہ‘‘ ڈاکٹر زمین پر گر کر بے حس و حرکت ہو گیا اور مریض بڑے اطمینان کے ساتھ اپنے بستر پر جا کر لیٹ گیا۔۔
تھوڑی ہی دیر گزری تھی کہ مریض نے پھر فائرنگ شروع کر دی اور ڈاکٹر صاحب پھر مر گئے۔۔افسر نے دیکھا کہ پندرہ بیس منٹ کے دوران بے چارے ڈاکٹر کو پانچ چھ دفعہ مرنا پڑا۔۔بعد میں ان کی ملاقات ڈاکٹر سے ہوئی۔۔افسر نے‌ڈاکٹر سے کہا۔۔
آپ کو اتنی دفعہ مرنا پڑتا ہے آپ اپنا کام کیا خاک کر پاتے ہوں گے۔۔اس کو فائرنگ کرنے دیا کریں اور آپ اپنا کام کرتے رہا کریں۔۔
‘‘نہیں جناب! ‘‘ ڈاکٹر نے بے چارگی سے کہا۔۔
‘‘آپ کو معلوم نہیں اگر میں نہ مروں تو وہ کہتا ہے۔۔اوہو پستول خراب ہے۔۔پھر وہ جوڈو کراٹے کے داؤ آزمانے لگتا ہے۔۔‘‘