عبدالقدوس

ورجینا کامن ویلتھ یونیورسٹی آف آرٹ قطر کے ڈائریکٹر معمر قذافی نے کہا ہے کہ پاکستان میں چھٹے سالانہ ڈیزائن کمپیٹیشن کا آغاز کیا جا رہا ہے۔ اس کمپیٹیشن کا عنوان فارمولا فار سکسس The Formula For Success تجویز کیا گیا ہے جس میں پاکستان میں واقع تمام ہائی اسکول کے سینئر کلاسوں کے طلبہ حصہ لے سکتے ہیں۔ پاکستان میں یہ دوسری مرتبہ منعقد کئے جا رہے ہیں۔ قبل ازیں عرب امارات، عمان، کویت، سعودی عرب، بحرین، لبنان، مصر، شام، فلسطین اور یمن میں ہو چکے ہیں۔ 2007 میں پاکستان کی خدیجہ نے ڈیزائن کمپیٹیشن میں کامیابی حاصل کی تھی۔ یہ بات انہوں نے یہاں مقابلے کے آغاز پر اپنی پریس کانفرنس میں کہی۔ معمر قذافی نے مزید کہا کہ اس مقابلے آرٹ میں گرافک ڈیزائن، انٹیریئر ڈیزائن اور فیشن ڈیزائن شریک کئے جائیں گے۔ انہوں نے کہا کہ قطر کمپلیکس میں تربیت اور شریک ہونے والوں کو جو ڈگری ملتی ہے ورجینا کامن ویلتھ یونیورسٹی کے مساوی اہمیت کی حامل ہوتی ہے۔ اس مقابلے میں شرکت کے لئے درخواستیں 31 مارچ تک ہمیں مل جانا چاہئیں، جس کے بعد یکم جون 2008 کو شرکاء کا باقاعدہ اعلان کر دیا جائے گا۔ اس مقابلے میں منتخب طلبہ کو چار سال کا خصوصی اسکالر شپ بھی دیا جاتا ہے۔ انہوں نے کہا کہ ورجینا کامن ویلتھ اسکول آف آرٹ قطر کے تحت 4 نومبر سے 6 نومبر تک اسلامک آرٹ سمپوریم کا بھی اہتمام کیا جائے گا جس میں دنیا بھر کے ممتاز اسکالرز کو مدعو کیا گیا ہے۔ انہوں نے مزید کہا کہ ورجینا اسکول آف آرٹ قطر میں طلبہ کو بہترین اور معیاری تربیت فراہم کی جاتی ہے۔ ایک سوال کے جواب میں معمر قذافی نے کہا کہ پاکستان میں آرٹ کا اچھا ٹیلنٹ موجود ہے لیکن انہیں پرفارمنس کے بھرپور مواقع میسر نہیں آتے تاہم ہمارے ادارے سے انہیں یہ سہولت میسر آئے گی۔ انہوں نے بتایا کہ فی الوقت قطر میں 5 پاکستانی طلبہ کام کر رہے ہیں۔

__________________