عبدالقدوس

مصوروں کو صدارتی ایوارڈ سے نوازنا حوصلہ افزا اقدام ہے، رابعہ زبیری

ممتاز مصورہ رابعہ زبیری نے کہا ہے کہ دیگر شعبوں کی طرح بہتر کارکردگی پر مصوروں کو صدارتی اعزازات سے نوازنا ایک حوصلہ افزا اقدام ہے جس سے تخلیق کاروں میں بہتر کام کا جذبہ تیز ہوتا ہے۔ مشکور رضا بلاشبہ فن کی دنیا میں اپنی بھر پور صلاحیتوں کے باعث ملک اور بیرون ملک امتیازی حیثیت رکھتے ہیں۔ یہ بات انہوں نے مشکور رضا کو ستارہ امتیاز ملنے کی خوشی میں دیے گئے عشائیہ میں جنگ سے گفتگو میں کہی جس کا اہتمام مصور مشکور رضا نے کیا تھا۔ عشائیہ میں ملک کے ممتاز مصور اور مجسمہ ساز شریک تھے جن میں اسماعیل گل جی، حاجرہ منصور، منصور راہی، ناہید رضا، اسلام آباد کی ناہید خان ، مہتاب علی، شاہد رسام، ناہید فرخی، مسز حسین، رفعت علوی، شہناز امام، میر افروز، منصور اے، وہاب جعفر، مارجرین حسین، ابو شمیم عارف اور دیگر شامل تھے۔ بین الاقوامی شہرت کے حامل مصور اسمٰعیل گل جی نے کہا کہ مشکور رضا بہت ٹیلنٹڈ آرٹسٹ ہیں ان کے کام کو بین الاقوامی سطح پر بھی تسلیم کیا جاتا ہے۔

__________________