عبدالقدوس

کراچی (رپورٹ/ ج ر) بھارت کے چار فلم اسٹوڈیو بالی وڈ‘ راموجی فلم سٹی‘ مالے گاؤن فلم سٹی‘ ہندو فلم اسٹوڈیو نے سال 2007ء میں 4 سو 50 فلمیں شائقین کیلئے سنیماؤں میں پیش کی ہیں۔ بتایا گیا ہے کہ بالی وڈ ممبئی فلم سٹی بھارت کی سب سے بڑے بجٹ والی فلمیں بناتا ہے۔ اس نے سال 2007ء میں 3 سو 40 فلمیں مارکیٹ میں پیش کی ہیں۔ ہندی کے علاوہ علاقائی زبانوں کی فلمیں بھی اس میں شامل ہیں۔ کہا جارہا ہے چند فلموں کے علاوہ تقریباً سب فلموں نے بڑا بزنس کیا ہے۔ بتایا جارہا ہے سال 2007ء میں بننے والی بالی وڈ کی فلموں سے ریاستی اور مرکزی حکومت کو 7 ارب روپے سے زائد کا ٹیکس وصول ہوا ہے۔ بالی وڈ کی فلموں نے 2007ء میں 80 ارب روپے کا بزنس کیا ہے۔ دوسری جانب بھارت کے دوسرے نمبر کی فلم انڈسٹری راموجی فلم سٹی حیدرآباد دکن میں ہے اور بالی وڈ سے زیادہ خوبصورت ہے جہاں ہر قسم کے فلمی سیٹ باقاعدہ اصلی شکلوں میں بنائے گئے ہیں۔ 70 سے زائد فلمیں راموجی سے بن کر مارکیٹ میں آئی ہیں۔ ان میں زیادہ تر فلمیں علاقائی زبانوں میں ہیں۔ راموجی فلم سٹی فلم سازوں سے خود ٹیکس وصول کرکے مرکزی حکومت کو ادا کرتی ہے۔ راموجی فلم سٹی کا بجٹ بہت بڑا ہے ادھر ممبئی نگر میں اسمال مالے گاؤں فلم سٹی ہے جہاں مراٹھی فلمیں اور اشتہاری فلمیں ٹی وی سیریل کے مقبول ڈرامے تیار ہوتے ہیں۔کہا جاتا ہے کہ مالے گاؤں فلم سٹی کی آمدنی اس کے اخراجات سے بھی کئی گنا زیادہ ہے۔ سال 2007ء میں مالے گاؤں فلم سٹی نے چھوٹی اسکرین کی 22 فلمیں مراٹھی‘ کولہا پوری‘ ملباری زبانوں میں تیار کی ہیں۔ ادھر ہندو فلم اسٹوڈیو نے بھی ہندو دیوتاؤں اور ہندو بادشاہوں سے متعلق مذہبی فلمیں تیار کی ہیں جن کی تعداد 18 کے لگ بھگ بتائی گئی ہیں۔ ہندو فلم اسٹوڈیو رقبے کے لحاظ سے بالی وڈ سے بڑا ہے جو آر ایس ایس کے تحت چلتا ہے۔

__________________