محمدعدنان

کراچی پولیس نے عالمی شہرت یافتہ پاکستانی مصور اسماعیل گل جی کی گاڑی برآمد کرلی ہے جس میں خون کے دھبے پائے گئے ہیں۔
پولیس کے مطابق گل جی کی گمشدہ کار جمعرات کو کھڈہ مارکیٹ کے علاقے سے برآمد ہوئی ہے۔ علاقے کے لوگوں کے مطابق گاڑی تین دنوں سے وہاں لاوارث حالت میں کھڑی تھی۔

گزشتہ روز گل جی، ان کی اہلیہ اور گھریلو ملازمہ کی پراسرار اموات کے ساتھ ہی اس بات کا بھی انکشاف ہوا تھا کہ ان کی کار گھر سے غائب ہے۔

گل جی کے بیٹے امین اپنے والد کی رہائشگاہ سے متصل مکان میں رہتے ہیں۔ پولیس کے مطابق انہوں نے گزشتہ روز بتایا تھا کہ وہ پانچ دن سے اس بات سے پریشان تھے کہ ان کے والدین کے گھر کو تالا لگا ہوا ہے اور ان کی گاڑی بھی گھر سے غائب ہے۔
بوٹ بیسن تھانے میں نامعلوم افراد کے خلاف مقدمہ درج کیا گیا ہے جس میں مدعی امین گل جی بنے ہیں۔ پولیس کا کہنا ہے کہ تہرے قتل کی یہ واردات اب تک معمہ بنی ہوئی ہے اور اس کی محرکات فی الوقت واضح نہیں ہوپائی ہیں۔

دریں اثناء گل جی اور ان کی اہلیہ کو جمعرات کی شام اسماعیلی برادری کے مقامی قبرستان میں سپردخاک کردیا گیا۔ تدفین میں عزیز و اقارب اور احباب نے شرکت کی۔

گل جی کے تین ملازموں کی تلاش شروع کردی گئی ہے جو لاپتہ ہیں۔ ان میں ڈرائیور اور دو چوکیدار شامل ہے۔ حکام نے اب تک ان ملازموں کے نام ظاہر نہیں کیے ہیں۔

کراچی پولیس کے سربراہ اظہر فاروقی کا کہنا ہے کہ اگر ضرورت پڑی تو واقعے کی تفتیش کے سلسلے میں امین گل سے بھی پوچھ گچھ کی جاسکتی ہے۔

’جس سے بھی ضروری ہوا، جو بھی ان کے رشتے دار ہیں، لواحقین ہیں، بشمول ان کے بیٹے کے، تو ان سے پوچھ گچھ ضرور کی جائے گی تاکہ واقعے کی تہہ تک پہنچا جائے۔‘

گل جی اپنی اہلیہ اور ملازمہ سمیت گزشتہ روز کلفٹن میں واقع اپنی رہائشگاہ پر مردہ پائے گئے تھے۔ پوسٹ مارٹم رپورٹ کے مطابق تینوں کے سروں کے پچھلے حصوں پر تیز دھار آلے سے ضربیں لگائی گئی تھیں اور اس کے بعد ان کا کپڑے کی مدد سے گلا گھونٹا گیا تھا۔ پولیس کے مطابق لاشیں تین سے پانچ دن پرانی لگتی تھیں۔

__________________