محمدعدنان

دلی سے متصل ریاست اترپردیش کے علاقے نوئیڈا میں سنسی خيز آروشی قتل پر بالی وڈ میں فلم بننے جا رہی ہے۔’محبت عشق‘ نامی اس فلم میں آروشی کا کردار ریا سین یا رشتا بھٹ ادا کریں گیں۔
بالی وڈ میں ان دنوں سچی کہانیوں پر فلم بننے کا رجحان زور پکڑتا جا رہا ہے اور آروشی قتل پر فلم بننا اسی حقیقت کا غماز ہے۔

گزشتہ ہفتے ممبئی کے مشہور نرج گرور قتل پر فلمساز مہیش بھٹ کے ذریعہ فلم بنانے کی بات سامنے آئي تھی اور اب اس سلسلے میں پروڈیوسر کمال خان نے نوئیڈا کے آروشی قتل پر فلم بنانے کا اعلان کیا ہے۔

کمال خان نے بی بی سی کو بتایا کہ وہ اس سنسنی خیز قتل واقعہ سے کافی متاثر ہوئے ہيں اور اس موضوع کو بنیاد بنا کر فلم بنائيں گے۔

کمال کا کہنا ہے کہ فلم کی سکرپٹ تیار ہوچکی ہے اور فلم کی شوٹنگ دلی اور نوئیڈا میں کی جائے گي۔ ان کا کہنا ہے: ’ہماری پوری کوشش ہوگي کہ فلم کو بنانے میں شمالی ہندوستان کی ثقافت کا پورا خیال رکھا جائے گا۔‘

فلم میں آروشی کے کردار کے لیے کمال خان کی ریا سین اور رشتا بھٹ سے بات چیت چل رہی ہے اور بہت جلد ہی وہ اس بارے میں فیصلہ لے لیں گے۔
آروشی قتل پر بننے والی اس فلم کا اہم کردار خود کمال خان ادا کریں گے۔ جب ان سے سوال کیا گيا کہ آیا پوری فلم آروشی قتل کے سچے واقعات پر ہی مبنی ہوگی یا فِکشن کا استعمال کیا جائے گا تو ان کا کہنا تھا: ’فلم بناتے وقت تجارتی پہلوؤں کو بھی زیر غور لایا جائے گا۔‘

کمال خان نے اس سے قبل بعض بھوجپوری فلمیں بنائي ہيں۔ ان کی ہندی فلم’دیش دروہی‘ نمائش کے لیے تیار ہے۔ اس فلم میں کمال خان کے علاوہ گریسی سنگھ، کم شرما اور راجا مراد اہم کردار میں ہيں۔

واضح رہے کہ پندرہ مئی کی رات کو آروشی اور اس کے خادم کا قتل گلا کاٹ کر کیا گیا تھا۔ قتل کا یہ معاملہ گزشتہ بیس دنوں سے پورے ملک کے ذرائع ابلاغ میں بحث کا موضوع بنا ہوا ہے۔ اور اس کی تفتیش مرکزی تفتیش ادارے سی بی آئی کر رہی ہے۔

اس قتل معاملے میں پولیس کے اعلی افسران پر اس وقت شدید نکتہ چینی کی گئی جب ایک پریس کانفرنس میں انہوں نے چودہ سالہ بچی اور گھریلو خادم کے حوالے سے نازیبا باتیں کہیں۔ بعد میں پولیس نے آروشی کے والد راجیش تلوار کو اپنی بیٹی کے قتل کے لیے ذمہ دار ٹھہرایا اور انہیں جیل بھیج دیا۔ دوہرے قتل کا یہ معاملہ ابھی بھی پراسرار بنا ہوا ہے۔

__________________