عبدالقدوس

لاہور(کلچرل رپورٹر) اداکارہ ریشم نے کہا ہے کہ فلمی دنیا میں ایک نئے دور کا آغاز ہوگیا، اب فلمساز معیاری اور انٹرنیشنل معیار کی ایسی فلمیں بنا رہے ہیں جنہیں ہم پورے اعتماد اور فخر کے ساتھ بھارتی فلموں کے مقابلے میں پیش کرسکتے ہیں۔ ریشم نے کہا کہ فلم اور سینما انڈسٹری میں تبدیلیوں کا سلسلہ چل نکلا ہے ، نت نئے موضوعات تلاش کئے جارہے ہیں۔ اب فن کاروں کا اولین فرض یہ ہے کہ وہ فارمولا اور لچر فلموں میں کام کرنے سے گریز کریں اور صرف پیسہ کمانے کو ہی مقصد نہ بنائیں۔ انہوں نے کہا کہ میں خود بھی گزشتہ پندرہ برسوں کے دوران منتخب فلموں میں ہی کام کررہی ہوں کیونکہ میرے نزدیک پیسہ کمانے سے زیادہ اہم اپنا امیج برقرار رکھنا ہے جو میں نے سنگم، جیوا اور دوپٹہ جل رہا ہے میں کام کرکے حاصل کیا کیونکہ شائقین بھی ہمیں نئے نئے کرداروں میں دیکھنا چاہتے ہیں۔ ایک سوال کے جواب میں ریشم نے کہا کہ یہ درست ہے کہ میں ٹی وی پر بہت زیادہ کام کررہی ہوں تاہم فلموں سے دور کبھی نہیں ہونگی تاہم وہی فلمیں کروں گی جن میں کام کرکے شائقین میں مزید پسندیدگی ہوگی۔ انہوں نے کہا کہ جیو نے فلمی دنیا کی بحالی میں اضافہ کرنے کیلئے گرانقدر خدمات انجام دی ہیں۔ میں اس سلسلے میں اس ادارے کی کارکردگی کو سیلوٹ کرتی ہوں۔ ایک اور سوال کے جواب میں ریشم نے کہا کہ ایسی فلمسازی کے میدان میں اترنے کا فیصلہ نہیں کیا تاہم سال رواں کے آخر تک ذاتی فلم شروع کرسکتی ہوں جس دن بھی ذاتی فلم شروع کی سب سے پہلے منفرد اور چونکا دینے والا موضوع تلاش کروں گی۔ انہوں نے کہا کہ میں سٹیج ڈراموں میں کبھی کام نہیں کرونگی۔ انہوں نے کہا کہ فلمسازی کے میدان میں مزید لوگوں کے آنے کی ضرورت ہے کیونکہ قطرہ قطرہ دریا بنتا ہے۔ انہوں نے یہ بھی کہا کہ میوزیکل اور حقیقت سے قریب تر موضوعات کی حامل فلمیں کامیابی سے ہمکنار ہونگی کیونکہ کسی بھی فلم کی کامیابی کے لئے سب سے اہم چیز کہانی ہوتی ہے جب ہم سکرپٹ پر توجہ دینا شروع کردیں گے تو بحران سے باہرنکل جائیں گے۔

__________________