عبدالقدوس

کراچی (اسٹاف رپورٹر) ممتاز اداکارہ زارا شیخ نے کہا ہے کہ اہم موضوعات اور مقصدیت کی حامل فلموں کی کامیابی سے اب مزید شہرہ آفاق موضوعات پر اہم فلموں کا آغاز ہو رہا ہے۔ جو فلمی صنعت کی احیاء کی کاوشوں کے حوالے سے حوصلہ افزا ہے۔ یہ بات انہوں نے یہاں فلمساز ندیم شاہ اور ہدایتکار اقبال کاشمیری کی نئی فلم ”دیوداس“ کے سیٹ پر جنگ کی غیر رسمی گفتگو میں کہی۔ زارا شیخ نے بتایا کہ قبل ازیں دیو داس پر کئی فلمیں بن چکی ہیں لیکن اقبال کاشمیری اسے زیادہ بھرپور اور مکمل انداز میں بنا رہے ہیں اس طرح نئی نسل دیو داس کی اصل کہانی اور واقعات سے آگاہ ہو سکے گی۔ اپنے کردار کے حوالے سے زارا شیخ نے کہا کہ میری صلاحیتوں کے مطابق دیوداس میں جیسا رول میں پر فارم کررہی ہوں، قبل ازیں بر صغیر میں کسی اور ہیروئن نے اس انداز میں پرفارم نہیں کیا ہوگا، یہ رول میرے لئے بڑے چیلنج کی طرح تھا، فلم ساز و ہدایتکار نے اس کے لئے مجھے ہی موزوں سمجھا ”دیو داس“ کسی طرح بھی پاکستان کی ایک بین الاقوامی فلم ہوگی انہوں نے بتایا کہ میرے مقابل معمر رانا اور میرا بھی ہیں۔ زارا شیخ نے بڑے دعویٰ کے ساتھ کہا کہ فلمی صنعت میں اس وقت مجھ سے زیادہ ذہین اداکارہ کوئی نہیں اس لئے اکثر فلموں میں مجھے ہی کاسٹ کیا جارہا ہے، انہوں نے بتایا کہ ان کی فلم ”کبھی پیار نہ کرنا“ بھی ریلیز کیلئے تیار ہے۔ ایک سوال کے جواب میں زارا شیخ نے کہا کہ فلمی صنعت کو اس بحران سے باصلاحیت فن کار کہانی نویس اور مکمل ہدایتکار ہی نکالنے کی موٴثر اور کامیاب کوشش کرسکتے ہیں، مجھے یقین ہے کہ ماضی کی طرح مستقبل بھی تمام تر تابنا کی کے ساتھ میرا منتظر ہے۔

__________________