shafresha

گورا رنگ، کشادہ پیشانی، سفید بال، بھاری بھرکم جسم اور چہرے پر پڑی جھریاں جس میں نہ جانے کتنی الف لیلہ جیسی کہانیاں چُھی ہوئیں تھیں۔ یہ تھیں "اماں" میری دادی۔
ہم نے اپنے بچپن ہی سے اُنھیں محنت مشقت کرتے دیکھا تھا۔ آنکھ کھولی تو گھر میں دودھ کا کاروبار ہوتے ہوئے پایا اور اس سارے کاروبار کی روح رواں تھیں "امّاں" ۔ کوئی اُنہیں "موٹی خالہ" کہتا تو کوئی "دودھ والی امّاں" مگر مشہور وہ "اماں" ہی کے نام سے تھیں۔
محلے بھر کی خواتین مختلف قسم کے طبّی مشوروں کے لیئے اُن سے رجوع کرتیں مثلاً کسی بچے کی ہنسلی اُترجائے، کسی بچے کو "گلے آ جائیں" خصوصاً "ناف بیٹھانے" میں اُنہیں کمال حاصل تھا۔ "ناف " چڑھوانے والی خواتین نہار منہ ہمارے گھر آتیں اور اُس عمل کے بعد ہمارے گھر سے ناشتہ کر کے خوشی خوشی اپنے گھروں کو روانہ ہوجاتیں۔
دودھ کے کاروبار کی وجہ سے گھر میں دودھ، دہی، اصلی گھی اور مکھن جیسی نعمتوں کی بھرمار تھی، مگر ہم جیسے ناشکُرے انہیں ہاتھ بھی نہیں لگاتے تھے۔ امّاں خود ہی بالائی کو بِلو کر مکھن نکالا کرتیں تھیں۔ گھر میں ایک الماری تھی جسے "نعمت خانہ" کہہ کر پکارا جاتا تھا ۔ لکڑی کی اس الماری کے چاروں طرف مہین سی جالی لگی ہوئی تھی فروخت کے لیئے دودھ اسی الماری میں رکھا جاتا تھا۔ ویسے تو امّاں گھروں میں دودھ سپلائی کرتی تھیں مگر کچھ لوگ ہمارے گھر آ کر بھی دودھ خریدا کرتے تھے۔میں اکثر دودھ بیچ کر پیسے رکھ لیا کرتا تھااور اماں کو نہیں بتاتا تھا۔ یہ میری اُوپر کی کمائی تھی۔

میری بچپن کی یادوں میں یہ یاد بھی شامل ہے کے میں نے اپنے گھر میں اکثر نئے چہرے دیکھا کرتا۔ ہم ان چہروں کو تائی، ماما، چچا، پھوپھو وغیرہ کے نام سے پکارتے تھے یہ چہرے جس تیزی سے آتے تھے اُتنی ہی تیزی سے غائب ہوجاتے تھے۔ مجھے بہت بعد میں معلوم ہوا کے یہ دراصل وہ لوگ تھے جو بنگلہ دیش سے پاکستان آتے تھے اور اپنی رہائش کا بندبست ہونے تک ہمارے گھر میں بطور مہمان ٹہرتے تھے۔ میں نے اپنی شفیق ماں کو ہمیشہ اتنے بڑے کنبے کے لیئے کھانا پکاتے دیکھا مگر کبھی بھی اُن کی زبان پر حرف شکایت نہیں آیا۔یہ سب کچھ محض امّاں کے دم سے تھا۔ میرے ماموں نے مجھے بتایا کے میرے دادا "ریڈ کراس " کے عہدے دار تھے تو اُن کے ذمے بنگالی مہاجرین کی ذمہ داری تھی، اُن کی یہ ڈیوٹی امّاں اُن کی موت کے 15 سال بھی نبھا رہی تھیں۔

ایک مرتبہ اماں کے ایک پرانے سے بکس کے تالے کی چابی گم ہوگئی، میں چابی بنانے والے کو بُلا کر لایا، جب اُس نے تالا کھولا تو اُس میں سے بہت سارے کارڈ نکلے جن پر چابی کا نشان بنا ہوا تھا۔ یہ ووٹ تھے تب مجھے پتہ چلا کے میرے داد مرحوم (نور محمد خانصاحب) قومی اسمبلی کے الیکشن میں محترمہ فاطمہ جناح کی جانب سے کھڑے ہوئے تھے اور حسب توقع ھار گئے تھے یہاں تک کے اُن کی ضمانت بھی ضبط ہوگئی تھی۔ اُن کارڈز کو دیکھ کے دادی کی خوبصورت آنکھوں میں بہتی گنگا جمنا مجھے ابھی تک یاد ہے۔میں نے اُنکی آنکھ بچا کر کچھ کارڈز اپنی جیب میں ڈال لیا اوربعد اپنے دوستوں کے ساتھ ان سے تاش تاش کھیلتا تھا۔

ہم سب بہن بھائیوں کو اُن سے ایک خاص لگاؤ تھا یہ لگاؤ اس محبت جیسا نہیں تھا جو عموماً دادی اور پوتے پوتیوں کے درمیان ہوتی ہے۔ ہم امّاں کو اپنا سب کچھ سمجھتے تھے۔ کوئی خوشی ہو یا غم ، کوئی دکھ ہو یا تکلیف پہلا لفظ جو نکلتا وہ "امّاں" تھا۔ اُن کے بستر کی دائیں جانب کی جگہ پر بڑے بھائی کا دائمی قبضہ تھا۔ ہم میں سے ہر ایک اُنہی کے بستر میں سونے کی ضد کرتا مگر اکثر میری جیت ہوتی۔ ہمیں کبھی یہ خیال ہی نہیں آیا کے امّاں ہماری ماں نہیں بلکے دادی ہیں ۔ہماری امّی بھی شاید گھر میں موجود بچوں میں سب سے بڑی "بچی" تھیں۔

اماں کو مختلف قسم کے کھانے پکانے اور مٹھائیاں بنانے میں ملکہ حاصل تھا ۔ میں اُن کے ھاتھ سے بنے ہوئے بادامی قورمے، کھوپرے کا پلاؤ، پسندے، بریانی، سموسوں، مٹھائیوں کے ایک خاص ذائقے کو اب تک بھول نہیں پایا۔ وہ محض کھانے کی بو سونگھ کر ہی اُس کے عیوب و خصوصیات بتا دیا کرتیں تھی۔ دادی جس چیز کوبھی پکاتیں وہ مزیدار ہوتی یہ شاید اُن کی ہاتھ کی کرامت تھی۔ کھانے میں سبزیوں کو پسند کرتیں اورگوشت سے انہیں پرہیز تھا۔ ہمیں ایک مرتبہ اُنہوں نے بتایا وہ چونکے انڈیا میں ہندؤں کے گاؤں میں رہا کرتی تھی لہذا اُنھیں بھی گوشت کھانا پسند نہیں۔اُنکے بقول اُنکے گاؤں کے پنڈت محض اُن کے ہاتھ کا کھانا کھاتے تھے اور کہتے تھے "تُو تو برھمن ہے"۔

رات کو سونے سے پہلے ہم سب کو کہانی سنانا شاید اُن کی خود ساختہ ذمہ داریوں میں شامل تھا۔ ہم کہانیوں کے ذریعے ہندوستان کے قدیم کھیلوں، رسم و رواجوں، افسانوی داستانوں،خوفناک شیروں ، اژدھوں، بھوت پریت، آگیا بیتال، راکھشسوں ، وغیرہ سے واقف ہوچکے تھے۔ درجنوں مرتبہ کی سنی ہوئی کہانی کو بھی اُن کی زبان سے بار بار سُننا اچھا لگتا تھا۔ اُن کی داستانوں کے کردار گاؤں، دیہاتوں، دریاؤں، تالابوں، جنگلوں میں پائے جاتے تھے۔ اب سوچتا ہوں تو ایسا لگتا ہے کے وہ ہمارے ساتھ رہ تو رہی تھیں مگر اُن کی روح ہندوستان کے کسی دور اُفتادہ گاؤں میں بھٹک رہی تھی۔

امّاں نماز روزے کی بڑی پابند تھیں سخت سردیوں میں بھی ٹھنڈے پانی سے وضو کرنا اُنکا معمول تھا۔ نماز پڑھنے کے بعد دیر تک کلمہ طیبہ اور درود شریف پڑھنا اُن کا معمول تھا۔ ایک بات کا اُنھیں افسوس تھا کے وہ قرآن نہیں پڑھ سکتی تھیں، ایک مرتبہ کسی نے اُنھیں کہہ دیا کے اگر آپ قرآن کھول کرہر سطر پر صرف بسم اللہ ہی پڑھتی رہیں تو آپ کو قرآن پڑھنے کا ثواب مل جائے گا۔ تو اس طرح امّاں نے درجنوں قرآن شریف "ختم" کیئے۔وہ کلمہ اور درود پڑھ کر ہم لوگوں سے ایک ڈائری میں اُس کی تعداد لکھوا لیا کرتیں تاکہ انہیں بخشوانے کے موقعے پر گننے میں آسانی ہو۔

پھر ایک دن اُن کی طبیعت خراب ہوئی، ہسپتال لے جانے پر معلوم ہوا کے اُنھیں دل کا عارضہ لاحق ہے۔ وہ دل جس نے سینکڑوں لوگوں کی دل جوئی کی اُسی دل کے دو والو بند تھے۔ ڈاکٹر حیران تھے کے اُنھیں ابھی تک دل کی تکلیف کی شکایت تک کیوں نہ ہوئی؟
میں اُن کے پاس ہسپتال میں تین دن رُکا، اور ا ن تین دنوںمیں نے ایک عہد کو ختم ہوتے ہوئے دیکھا۔ امّاں بہت کمزور ہو گئیں تھیں۔ بظاہر صحت مند نظر آنے والے جسم نے ہمت ہار دی تھی۔ ہسپتال سے واپسی پہ امّاں کے سامان میں ایک لاٹھی (عصا) کا اضافہ ہوچکا تھا۔ اب اُن کا اکثر وقت گھر ہی میں گذرتا۔ دودھ کے کاروبار کو محدودکردیا گیا تھا۔ وہ اپنے بستر پر ہی نماز ادا کرتیں، تسبیح پڑھتیں یا رلّی بناتی رہتیں۔

ایک رات امّاں کا موڈ بہت اچھا تھا ہم سب رات کے کھانے سے فارغ ہو کر ٹی وی کے گرد جمع تھے۔ امّاں اپنی چارپائی پر بیٹھی "رلّی" بنا رہی تھیں۔اچانک بجلی چلی گئی امّاں نے مونگ پھلی منگوائی ہم مونگ پھلی کھاتے جارہے تھے اور امّاں کی کہانی سنتے جا رہے تھے، مجھے یاد ہے امّاں لمبی کہانیاں نہیں سناتی تھی مگر اُس رات کہانی قدرے لمبی تھی۔

اُس رات انہوں نے مجھے کچھ نصیحت کیں ، اُن کی کچھ باتیں مجھے آج بھی یاد ہیں، مگر اُس رات مجھے نیند آ رہی تھی۔ اُسی رات مجھے اُن کے خوفناک خرانٹوں نے جگا دیا ۔ میں نے اُٹھ کردیکھا تو مجھے لگا کے جیسے اُن کی ناک میں کچھ پھنس سا گیا ہو ۔ اُن کی سانسیں رُک سی رہیں تھیں۔ میں نے دوڑ کر ابو کو جگایا، جلدی سی گاڑی نکال کر میں ، امّی اور ابو انھیں لے کر جناح ہسپتال کی طرف بھاگے۔ میں نے اُن کے سر کو اپنے کاندھے پر ٹکایا ہوا تھا، میرے کان اُن کی مدھم پڑتی سانسوں کو سُن رہے تھے۔ اُن کا ایک ہاتھ میرے ہاتھ میں اور دوسرا امّی کے ہاتھ میں تھا۔ میں اُن کے گالوں پر بتحاشہ پیار کررہا تھا، کیونکہ میرا ایسا کرنا اُنہیں پسند تھا، مگر آج وہ کوئی جواب ہی نہیں دے رہی تھیں۔
پھر مجھے ایسا لگا جیسے سب کچھ تھم سا گیا ہو، ہر طرف خاموشی سی پھیل گئی تھی۔ میرے کان کسی بھی آواز کو سُن نہیں پا رہے تھے۔ امّی نے میری طرف دیکھا، میں نے دیکھا کے اُن کی آنکھوں سے بارش کا ایک قطر گرا اور آکاش میں کہیں گم ہوگیا۔

ہم نے آنکھوں ہی آنکھوں میں ایک فیصلہ کیا۔ جب اُنھیں اسٹریچر پر لٹا کر لےجایا جارہا تھا تو میں نے دیکھا کے آرمی کے ٹرینگ سینٹر میں اپنے ایک ہی مکے سے حریف کی بتیسی توڑ کر فرار ہونے والا شخص، میرے والد (عبدالرحمن صدیقی) ایک کٹے ہوئے تنے کی طرح زمین پر بیٹھے جارہے ہیں، اُن کا دایاں ہاتھ تیزی سے اُن کے سر پر چل رہا تھا جیسے وہ کسی نادیدہ مخلوق کو اپنے سر سے ہٹانے کی کوشش کر رہے ہوں۔ میں اُن کے پاس گیا اور اُن سے کہا "ڈاکٹر صاحب کہہ رہے ہیں کے معمولی ہارڈ اٹیک ہوا ہے ، دو چار گھنٹے میں ہوش آجائے گا"۔ آپ امی کو لے کر گھر جائیں میں امّاں کے پاس رُک جاؤں گا۔
امی نے نم آنکھوں سے میری طرف دیکھا وہ میرا مقصد سمجھ چکی تھیں۔ ابو کے گھر جانے کے بعد میں ICU کی طرف گیا، میں نے دیکھا کے کچھ لوگ اُن کے جسم پر جُھکے ہوئے اُن کو الیکٹرک شاک دے رہے تھے۔ میں نے اُن کے جسم کو جھٹکے سے اُٹھتے اور گرتے دیکھا۔ میں اُن کے قریب گیا اُن کے کے منہ سے جھاگ سے نکل رہے تھے۔ ڈاکٹر نے مجھ سے پوچھا کے کیا میں ان کے ساتھ ہوں میرے اثبات پر اُس نے اپنا ہاتھ میرے کاندھے پر رکھ دیا اور کچھ نہ بولا۔

ہسپتال کے باہر کھڑی ایدھی کی ایمبولینس میں اُن کی لاش کو لے کر میں گھر کی طرف روانہ ہوا۔ راستے میں میں نے دیکھا کے اُن کے چہرے پر قیامت کا نور تھا سفید چہرے پر سفید بال بکھرے ہوئے تھے، میں نے پیار سے ان کے بالوں کو تقدس سے سمیٹا اب شاید انہیں کنگی کی ضرورت نہیں تھی۔گھر پہنجنے پر میں نے بیل بجائی، پہلی ہی بیل پر بڑے بھائی نے دروازہ کھولا اور ایمبولینس دیکھ کر رونے لگا، پیجھے سے ابو کی آواز آئی "کیا ہوا امّاں کہاں ہیں؟"
"وہ واپس چلی گئیں ابو" میں نے چیخ کر جواب دیا!


نوٹ:مندرجہ بالا مضمون اپنی پیاری دادی مرحومہ کی یاد میں آج مورخہ یکم اپریل سن دوہزار نو کو ایک ہی نشت میں بیٹھ کر لکھا ہے ۔ پڑھنے والوں سے مرحومہ کے لیئے دُعا کی درخواست ہے۔
شاہد علی صدیقی

Attached Images

 

ام غزل

shafresha

شاہد صدیقی صاحب نے آپ کو "اُمی" کب کہا ہے؟؟؟

رضی

شاہد بھائی میں نے آج سوچا کیوں نہ میں سر ورق کے لیئے تجویز کردہ تمام تحاریر کو پڑھوں وہ تو سب اچھی تحاریر ہوں گی مگر آپ کی تحریر پڑھ کر تو مزید تحاریر پڑھنے کی ہمت ہی نہی ہو رہی
اللہ اماں کو جنت الفردوس میں جگہ دے ۔آمین

__________________

اپنی ملت پر قیاس اقوام مغرب سے نہ تر
خاص ہے ترکیب میں قوم رسول ہاشمی

طاھر

السلام علیکم،

جناب سب سے پہلے تو آپ کی اماں‌ کے درجات بلند ہونے کی دعا۔

واللہ ! کمال کی تحریر ہے، جس شخصیت کیلیئے تحریر کیا جانے والا مضمون اتنا عمدہ ہو تو وہ خود کتنی اچھی ہوں گی - اللہ انہیں جنت الفردوس کے اعلی مقام سرفراز کرے - آمین !

ان کے درجات میں‌مزید بلندی کے لیئے کچھ نہ کچھ کرتے رہنا اولاد کی ذمہ داری ہے۔

اللہ ہم سب پر بزرگوں اور والدین کے شجر سایہ دار کو سلامت رکھے۔ آمین !

والسلام

طاہر

__________________
ہمیں خبر ہے لٹیروں کے سب ٹھکانوں کی
شریک جرم نہ ہوتے تو مخبری کرتے

shafresha

Razi اور طاھرخلیل بھائی سلام،
میری تحریر کو پسند کرنے کا شکریہ!
دراصل یہ تحریر وارفتگی کے عالم میں لکھی گئی تھی اور بخدا مجھے خود نہیں پتہ کے کب اور کیسے میں یہ سب کچھ لکھتا چلا گیا؟
آپ سے میری دیگر یادیں پڑھنے کی درخواست ہے:

وہ کاغذ کی کشتی!

وہ کاغذ کی کشتی! "دوسرا حصہ"

وہ کاغذ کی کشتی! "تیسرا حصہ"

وہ کاغذ کی کشتی! "چوتھا حصہ"

شکریہ،
شاہد علی صدیقی

سد ید مسعو د

شاھد بھائی، میں نے پاک نیٹ پر اپنی رائے دینا چھوڑ دیا ھے کیونکہ لوگ برا مناتے ھیں اور ایک عجیب بحث شروع ھو جاتی ھےاور ویسے بھی یہ گپ شپ کے لئے زیادہ استعمال ھوتا ھے۔ آپکا مضمون اماں اپنی جگہ پر ایک مکمل تحریر ھے اور مجھے اس میں کوئی غلطی نظر نہیں آ رھی، یہ مضموں آپکی زندگی کے بارے میں اچھی معلومات فراھم کرتا ھے اور آپکی سوچ کے بارے میں بھی لوگوں کو آگاھی ھوتی ھے اور یقینا آپکا مقصد و منشا بھی یہی ھے تو آپ اپنے مقصد میں کامیاب ھوئے سرکار، اللہ مرحومہ کو جوار رحمت میں جگہ عطا کرے۔

سدید مسعود

منتظمین

سدید بھائی ایسی کوئی بات نہیں ہے۔ اپ تنقید برائے تعمیر کر سکتے ہیں۔ اور اچھے اراکین ہمیشہ اس بات کے متمنی رہتے ہیں کہ اچھی اور معیاری تنقید ملتی رہے۔
ویسے اپ کافی دنوں‌کے بعد تشریف لائے ہیں میں اپکو مس کر رہا تھا۔

والسلام

__________________
تم سپاہی نہیں ہو پیشہ ور قاتلو!

shafresha

جناب سدید بھائی السلام علیکم،
مجھے بھی منتظمین صاھب کی اس بات سے اتفاق ہے۔ پاک نیٹ پر آپ کی کمی مجھے بھی شدت سے محسوس ہورہی ہے۔ پلیز آپ ہمیں دوبارہ جوائن کریں۔ آپ کی تعمیری تنقید میرے سر آنکھوں پر،
اور یار کیا اب آپ کو بھی منانا پڑے گا؟
شکریہ
آپ کی آمد کا منتظر!

سد ید مسعو د

شکریہ برادرم، آپکی وسعت نظری و قلبی ہر لکھنے والے کی میراث نہیں ھے، پاک نیٹ پر لوگ آبگینوں کی طرح ھیں ھوا کا ننھا سا جھونکا باعث ٹیس ھوتا ھے اور ھر کوئی اپنی جگہ علم کا ایک سمندر ھے اور رائے مخالف گویا کہ ایک تلوار ھے۔ بہر کیف میں آپ دوستوں کا مشکور ھوں جنہوں نے مجھے مس کیا اور کوشش کروں گا کہ کہیں نہ کہیں شمولیت کرتا رھوں۔

سدید مسعود

حیدر

میری دادی۔ یار رُلا دیا۔ واقعی رلا دیا۔ حالانکہ میں بڑا ڈھیٹ بندا ہوں۔ جب لوگ رو رہے ہوتے ہیں ۔ ۔ ۔ ۔میں ہنس رہا ہوتا ہوں۔ مگر دادی چلی گئیں

اخترحسین

ماں

یا اللہ اماں جی کے درجات بلند فرما
اماں جی کو جنت الفردوس میں مقام عطاء فرما
اور میری ماں کو سحت و تندرستی و عافیت والی زندگی عطاء فرما
اور میری ماں کو مجھ سے راضی فرمائے رکھ
آمین ثم آمین

طارق راحیل

میری امی
سب سے اچھی
سب سے پیاری
میری امی
_________________

Khali

اللہ آپ کی اماں کو جنت فردوس میں جگہ دے آمین

ابو عمار

شاہد بھائی اتنی خوبصورت تحریرکا کن الفاظ میں تعریف کروں۔ اتنی پیاری دادی کی اتنی پیاری تحریر۔ بس اتنا ہی کہوں گا کہ اللہ آپ کی دادی کو جنت الفردوس میں اعلٰی مقام عطا فرمائیں اور ہمیں اپنے بزرگوں کی خدمت کرنے کی توفیق عطا فرمائیں۔

آپ کی تحریر پڑھ کر مجھے میری دادی بہت یاد آئیں۔

shafresha

شکریہ جناب!

انشاء اللہ اس مضمون کی دوسری قسط لکھنے کا بھی ارادہ ہے!