روس اور یورپ کے خلاء بازوں کو خلاء میں لے جانے والے خلائی جہاز کی پہلی سرکاری تصویر جاری کر دی گئی ہے۔یہ خلائی جہاز سویُز نامی خلائی جہاز کی جگہ لے گا جو آج کل روسی خلائی ادارے کے زیر استعمال ہے اور یورپ کو براہِ راست اپنے خلاء باز خلاء میں بھیجنے کا موقع فراہم کرے گا۔ایک سے زائد مرتبہ استعمال کیے جانے کے قابل یہ جہاز چار خلاء بازوں کو چاندتک لے جا سکتا ہے اور اس میدان میں اس کا مقابلے امریکی خلائی جہاز اورے اورین سسٹم سے کیا جاتا ہے۔روس کے ایروسپیس رائٹر اور گرافِک ڈیزائنر اناطولی زاک نے خلائی جہاز کے روسی مینوفیکچرر آر کے کے انرجیا کی طرف جاری شدہ ڈیزائن کی بنیاد پر ایک فنکارانہ شبیہ تیار کی ہے۔کچھ پہلوؤں سے روسی جہاز امریکہ کے جدید ترین خلائی جہاز اورین سے ملتا ہے۔ اٹھارہ سے بیس ٹن وزنی روسی یورپی خلائی جہاز چھ افراد کو زمینی مدار جبکہ چار افراد کو چاند کے مدار میں لے جانے کی صلاحیت رکھتا ہے۔خلائی جہاز کی سب سے غیر معمولی خصوصیت اس کا ثانوی انجن اور اس کے نچلے حصے میں لگا ہوا لینڈنگ گئیر ہے۔ مسٹر زاک کے مطابق جہاز کے ثانوی انجن زمین پر اس کی سافٹ لینڈنگ کے لیے استعمال کیے جائیں گے۔
یورپی سپیس ایجنسی روسی خلائی ادارے روس کوموس کے ساتھ کریو سپیس ٹرانسپورٹیشن سسٹم کے بنانے میں تعاون پر سن دو ہزار چھ سے بات چیت کر رہا تھا۔