عبدالقدوس

امریکہ میں ڈاکٹرز اس بات پر حیران ہیں کہ کس طرح ایک نرسنگ ہوم میں رہنے والی ایک بلی یہ محسوس کر لیتی ہے کہ وہاں موجود مریضوں میں سے کون مرنے والا ہے۔

آسکر نامی بلی روڈھ آئی لینڈ میں پروویڈنس کے مقام پر واقع ایک نرسنگ ہوم میں ہر اس مریض کے پاس جا کر بیٹھ جاتی ہے جو مرنے کے قریب ہوتا ہے۔

دو سالہ آسکر کی یہ حس ابتک 25 مرتبہ درست ثابت ہوئی ہے اور جب بھی وہ کسی مریض کے پاس جا کر بیٹھ جاتی ہے تو نرسنگ ہوم کا عملہ اس کے رشتہ داروں کو فون کر دیتا ہے۔

نیو انگلینڈ جرنل آف میڈیسن کے تازہ شمارے میں اس بلی کے متعلق بات کی گئی ہے۔

ڈاکٹروں کے مطابق بلی جب کسی کے پاس بیٹھ جاتی ہے تو اس کا مطلب ہے کہ اس مرد یا عورت کے پاس زیادہ سے زیادہ دو گھنٹے رہ گئے ہیں۔

براؤن یونیورسٹی کے پروفیسر ڈیوڈ براؤن نے، جنہوں نے یہ تحقیق کی ہے، بتایا کہ ’بلی کوئی غلطی نہیں کرتی۔ ایسا لگتا ہے کہ اسے پتہ چل جاتا ہے کہ کب کوئی مریض مرنے والا ہے۔‘

سٹیر ہاؤس نرسنگ ہوم اینڈ ریہبیلیٹیشن سینٹر میں آسکر کو چھوٹے بلی کے بچے کے طور پر لایا گیا تھا اور تب سے یہ یہیں رہ رہی ہے
بلی اسی طرح ہی نرسنگ ہوم کے وارڈز کا دورہ کرتی ہے جس طرح ڈاکٹرز یا نرسز کرتی ہیں۔ تاہم وہ مریضوں سے اتنی بے تکلف نہیں ہوتی۔

اگرچہ مریضوں کے زیادہ تر رشتہ دار آسکر کے خبردار کرنے سے اس کے مشکور ہوتے ہیں لیکن کچھ رشتہ دار یہ بھی کہتے کہ بلی کو یہاں سے لے جایا جائے تاکہ وہ اپنے رشتہ دار کو آخری الوداع کہہ سکیں۔

جب آسکر کو کمرے سے باہر نکلا دیا جاتا ہے تو وہ ادھر ادھر مضطرب چلتی پھرتی میاؤں میاؤں کرتی رہتی ہے۔

الینوئس یونیورسٹی میں پالتو جانوروں کے ماہر تھامس گریوز نے بی بی سی کو بتایا کہ ’بلیاں اکثر محسوس کر لیتی ہیں کہ کب ان کے مالک یا دوسرے جانور بیمار ہوتے ہیں۔‘

’وہ یہ بھی محسوس کر لیتی ہیں کہ کب موسم بدلے گا، وہ اس بات پر بھی مشہور ہیں کہ وہ آنے والے زلزلے کو محسوس کر سکتی ہیں۔‘

نرسنگ ہوم میں مریضوں کا علاج کرنے والے ڈاکٹر کا کہنا ہے کہ اس کی شاید کوئی بائیوکیمیکل وجہ ہو سکتی ہے نا کہ یہ کہنا کہ بلی غیب کا علم جانتی ہے۔

__________________

پاکستانی لڑکی

پاکستانی

ارے بھائی پہلے بلیوں سے کم ڈر لگتا ہے اور ابھی یہ خبر

ایم اے راجا

بلیاں کتے اور کچھ پرندے آنے والی آفتوں کے بارے میں کچھ دیر پہلے جان جاتے ہیں اللہ نے انھیں ایسی حس عطا کی ہے، لیکن انکے اس جاننے کو سمجھنے کے لیئے بھی ایک حس چاہئیے، جب پاکستان میں زلزلہ آیا تھا( اللہ دوبارہ اس سے محفوظ رکھے) تو زلزلہ سے کچھ پہلے پرندوں اور کچھ جگہوں پر جانوروں کو بے اضطرابی سے ادھر ادھر بھاگتے ہوئے پایا گیا تھا اور یہ خبریں اخباروں میں بھی آئی تھیں۔اس بارے میں بہت کچھ لکھا اور تحقیق کیا گیا ہے۔