محمد کاشف حبیب

اسے دیکھیے پھر کل اسی تھریڈ پر ملاقات ہو گی

جناب زرداری کی حکومت کو بھی کیسے کیسے صلاح کار‘ مشیر اور وزیر ملے ہیں کہ اس حکومت کو کسی اپوزیشن کی ضرورت ہی نہیں۔ خود زرداری صاحب کی بھی پوری کوشش ہے کہ اپنے آپ کو عوام اور ان کی خواہشات سے دور رکھا جائے۔ امریکی مظالم کے نمائندگان رچرڈ باﺅچر اور جوبائیڈن کو پاکستان کے اعلیٰ ترین اعزازات سے نوازنے پر شاید ہی کسی پاکستان نے خوشنودی کا اظہار کیا ہو۔ حتیٰ کہ پیپلزپارٹی میں بھی اس کی تحسین کرنے والے کم‘ کم ہی ہیں اور جو تائید کرتے ہیں وہ بھی شرماتے ہوئے صرف پارٹی وابستگی نبھانے کے لیے ورنہ ان کے جذبات بھی عوام سے مختلف شاید نہ ہوں۔ اس حوالے سے نیا ستم وزیراعظم صاحب یوسف رضا گیلانی نے ڈھایا ہے۔ انہوں نے پیر کے دن اپنے خطاب میں بائیڈن کو دیے گئے ہلال پاکستان کی زرداری جسارت کی تائیدکرتے ہوئے فرمایا ہے کہ پرویز مشرف کی وردی کسی اور نے نہیں جوبائیڈن نے اتروائی ہے۔ یعنی اس کے صلے میں انہیں ہلال پاکستان دیا گیا۔ یہ وزیراعظم پاکستان کا ایک ایسا اعتراف ہے جس پر خامہ انگشت بدنداں ہے۔ اس کا واضح مطلب ہے کہ امریکا پاکستان کے آرمی چیف کی وردی اترواسکتا ہے اور جب اترواسکتا ہے تو پہنا بھی سکتا ہے۔ تو کیا یہ اس حقیقت کا اظہار نہیں کہ اب تک پاکستان میں جتنے بھی حکمران اور فوج کے سربراہ آئے‘ سب امریکا کی مدد‘ تعاون اور اجازت سے آئے؟

پھر بات پرویز مشرف تک محدود نہیں رہتی‘ اس اعتراف کی زد میں موجودہ حکمران اور فوج کے سربراہ بھی آجائیں گے اور جناب زرداری رچرڈ باﺅچر اور جوزف بائیڈن کو اعزازات سے نواز کر بالواسطہ اعتراف بھی کرچکے ہیں۔ ظاہر ہے کہ اگر جوبائیڈن نے بش انتظامیہ سے باہر رہ کر بھی پرویز مشرف کی وردی اتروادی تو آصف زرداری کو صدر بنوانے میں بھی ان کا کلیدی کردار ہوگا۔ یوں بھی ایک کو ہٹانے کا مقصد ہی یہ ہوتا ہے کہ اس کی جگہ اپنی پسند کا تازہ دم مہرہ لایا جائے۔ جناب وزیراعظم نے جوبائیڈن کو ہلال پاکستان دینے کی وکالت کرتے ہوئے جو دلیل دی ہے وہ تو جناب زرداری اور پوری پیپلزپارٹی کی حکومت کے خلاف جاتی ہے‘ کیا انہیں اس کا احساس تھا؟ وزیراعظم یوسف رضا گیلانی اس کے لیے تو مبارکباد کے مستحق ہیں کہ انہوں نے سرعام یہ اعتراف کرلیا کہ پاکستان کے اہم ترین معاملات بھی پاکستان سے باہر ہی طے ہوتے ہیں اوران میں پاکستانیوں کا کوئی عمل‘ دخل نہیں ہوتا۔ پھر یہ کیسی عجیب بات ہے کہ پرویز مشرف کی وردی اتروانے کا کریڈٹ محترمہ بے نظیر کو دیا جارہا ہے یا وکلا سینہ پھلائے پھررہے ہیں کہ ان کی عظیم الشان ملک گیر تحریک کی وجہ سے قوم کوپرویز مشرف سے نجات ملی۔ نہیں صاحب! یہ تو صرف جوزف بائیڈن تھے یا رچرڈ باﺅچر۔

جناب یوسف رضا گیلانی نے بڑی وضاحت سے کہا ہے کہ اگر کوئی اور یہ سمجھتا ہے کہ اس کی وجہ سے پرویز مشرف کی وردی اتری یا ملک میں جمہوریت آئی تو وہ یہ غلط فہمی دور کرلے۔ یہ جو لولی‘ لنگڑی جمہوریت آج نظر آرہی ہے یہ امریکیوں کا تحفہ ہے۔ شکریہ امریکا۔ لیکن یہ جو پاکستان کے اندر قتل و غارت گری نظر آرہی ہے یہ بھی تو امریکا ہی کا تحفہ ہے۔ وزیراعظم صاحب بھی جانتے ہیں کہ محمود علی درانی اور جناب حسین حقانی بھی امریکا ہی کا تحفہ ہیں۔ وزیراعظم نے جرا¿ت کا مظاہرہ کرتے ہوئے محمود علی درانی کو صدر مملکت سے پوچھے بغیر برطرف کردیا اور کسی امریکی نمائندے یا سفیر کی بھی پروا نہیں کی۔ لیکن موجودہ حکومتی ڈھانچے میں ایسے بہت سے درانی ہیں جو درانہ وار اپنے نظریات پاکستان کی قوم پر مسلط کررہے ہیں اور عوام کی نمائندگی کے نام پر ان سے وہ کچھ منسوب کررہے ہیں جس سے عوام مبرا ہیں۔ تازہ ترین شوشا برطانیہ میں پاکستان کے سفیر واجد شمس الحسن نے چھوڑا ہے۔ ان کی قابلیت کا معیار بھی پیپلزپارٹی سے پرانی وابستگی ہے۔ واجد شمس الحسن نے فرمایا ہے کہ ”ہمارا اسرائیل سے کوئی جھگڑا نہیں‘ پاکستان اسے تسلیم کرلے تو وہ مخالفت ترک کردے گا۔“ واجد شمس الحسن اسرائیل سے محبت کا اظہار پرویز مشرف کی طرح جیوش کانگریس کے کسی اجتماع میں نہیں بلکہ بریڈفورڈ میں پیپلزپارٹی کے ایک پروگرام سے خطاب میں کررہے تھے۔ جومحترمہ بے نظیر بھٹو کی برسی کے حوالے سے منعقد کیا گیا۔ حیرت ہے پیپلزپارٹی کے ان شرکاءپر جو اسرائیل کی مخالفت سے بچنے کے لیے اسے تسلیم کرنے اور کسی جھگڑے کے عدم وجود کے اعلان پربھی خاموش بیٹھے واجد شمس الحسن کو وجد میں آتے اور کرنیں بکھیرتے دیکھتے رہے۔ پاکستانی ہونے کے ناتے احتجاج نہ سہی اٹھ کر چلے ہی جاتے۔

کیا سب کے سب اس سے متفق تھے کہ اسرائیل سے ہمارا‘ پاکستانیوں کا ‘ مسلمانوں کا‘ کوئی جھگڑا نہیں ہے چنانچہ اسے تسلیم کرلینا چاہیے۔ جھگڑا نہ ہونے کا مطلب یہ ہے کہ اسرائیل ہمارا خیر خواہ ہے۔ تو کیا یہ خیر خواہی صرف پاکستان اور اہل پاکستان کے لیے ہے اور کیا پاکستان کے مسلمان امت مسلمہ کا حصہ نہیں ہیں؟ کیسی عجیب بات ہے کہ واجد شمس الحسن نے اسرائیل سے اپنی محبت و عقیدت کا اظہار ایسے موقع پر کیا ہے جب نہ صرف پورے پاکستان بلکہ امریکا‘ برطانیہ سمیت دنیا بھر میں اسرائیل سے نفرت کا اظہار کیا جارہا ہے اور وہ فلسطینیوں پر جو وحشیانہ مظالم ڈھارہا ہے اس پر بھرپور احتجاج ہورہا ہے۔ لیکن واجد شمس الحسن کے نزدیک اسرائیل سے دوستی منافع بخش ہے اور پاکستان کا اس سے کوئی جھگڑا نہیں وہ بھلے ہی فلسطینیوں کا قتل عام کرتا رہے‘ بچوںکو ذبح کرتا رہے‘ مساجد کو مسمار کردے اور قبلہ اول پر غاصبانہ قبضہ برقرار رکھے۔ بھلا پاکستان اور اہل پاکستان کا اس سے کیا واسطہ۔ اسے تو اسرائیل سے دوستی کرلینی چاہیے تاکہ وہ پاکستان کی مخالفت ترک کردے۔ لیکن جناب واجد شمس الحسن یہ تو بتادیں کہ پاکستان نے اب تک اسرائیل کے خلاف کیا کیا ہے کہ وہ پاکستان کی دشمنی میں بھارت کا ساتھ دے رہا ہے۔ یہاں تک کہ حملے میں تعاون پر بھی تیار ہے۔ اسرائیل کو تسلیم کرنے کے لیے ذہن سازی کی مہم کوئی نئی نہیں ہے۔ اس سے پہلے بھی کچھ لوگ اس کام میں لگے رہے۔ پاکستان کی سابق سفیر محترمہ عابدہ حسین‘ جو آج کل پیپلزپارٹی میں ہیں‘ یہی پرچار کرتی رہی ہیں۔ لیکن اسرائیل کے سب سے بڑے مداح تو ہمارے سابق صدر اور سابق فوجی سربراہ پرویز مشرف خود تھے جنہوں نے نہ صرف جیوش کانگریس سے خطاب کرنے کا شرف حاصل ہوا بلکہ کانگریس کا صدر ان کا مہمان بھی بنا اور اسرائیلی صدر نے کہاکہ وہ رات کو سونے سے پہلے پرویز مشرف کے لیے دعا کرکے سوتا ہے۔ بعد میں شاید امریکا نے دعا کرنے سے روک دیا ہو۔ لیکن واجد شمس الحسن کی دیدہ دلیری حیرت انگیز ہے کہ وہ نہ تو فلسطینیوں کے قتل عام کو خاطر میں لائے اور نہ انہوں نے پاکستانیوں کے جذبات کو ملحوظ رکھا۔ پھر بھی وہ برطانیہ میں پاکستانیوں کی نمائندگی کررہے ہیں۔ واجد شمس الحسن نے یہ انکشاف بھی کیا کہ ”بے نظیر بھٹو واحد لیڈر تھیں جنہوں نے اعلان کیا کہ وہ قائداعظم کا پاکستان چاہتی ہیں‘ طالبان کا نہیں۔“ محترم کو شاید یہ بھی یاد ہو کہ طالبان کی پشت پناہ محترمہ بے نظیر ہی تھیں اور وہ فخر سے کہا کرتی تھیں کہ ”میں طالبان کی ماں ہوں۔“ تو کیا وہ اس وقت قائداعظم کا پاکستان بھول بیٹھی تھیں؟ ہاں! اس لیے کہ اس وقت طالبان افغانستان میں آگے بڑھ رہے تھے اور محترمہ کے دست راست جنرل نصیر اللہ بابر ہر طرح کی مدد فراہم کررہے تھے۔ واجد صاحب نے مزید فرمایا کہ قبائلی علاقوں میں میزائل حملے طالبان کی وجہ سے ہورہے ہیں‘

امریکا جانتا ہے کہ پاکستانی عوام اس کے خلاف نہیں ہیں۔ واجد شمس الحسن یہ وضاحت بھی کردیتے تو اچھا تھا کہ طالبان سے امریکا کی کیا لڑائی ہے اور وہ ایک آزاد ملک افغانستان پر کیوں قابض ہے۔ ان کے علم میں تو شاید نہیں لیکن امریکا خوب جانتا ہے کہ پاکستانی عوام اس کے بارے میں کیا خیالات رکھتے ہیں۔ پاکستانی عوام افغانیوں‘ عراقیوں اور فلسطینیوں سے جداگانہ سوچ نہیں رکھتے۔ موجودہ حکومت بھی کیسے کیسے درنایاب اپنی آستین میں رکھتی ہے اور اس پر یہ دعویٰ کہ پانچ سال پورے کرکے رہے گی۔

ام طلحہ

بہت اچھی تحریر ہے۔شکریہ

محمد کاشف حبیب

یہاں میں نے ایک لنک دیا تھا وہا پاکستان کا ایک تقشہ تھا نامکمل نقشہ اس کے جوا میں میں کچھ پیش کرنا چاہتا تھا لیکن اب نہیں شکریہ!

arshad khan

یہ حالت ہے ہمارے سفیروں کی جس کی وجہ سے امریکہ اسرائیل اور ان کے
اتحادی بے گناہ مسلمانوں کو مار رہے ہیں کیونکہ انھوں نے کالی بھیڑیں خریدی ہوئی
ہیں ایسے لوگوں کو مسلماں کہنا بھی ظلم ہے یہ لوگ مجسم شیطان ہیں کیونکہ مسلمانوں
کا دشمن تو وہی ہے
رہی بات گیلانی صاحب کی تو آپ نے سنا ہو گا کہ سچ کو جتنا دبا کر رکھو گے وہ اتنا ہی باہر
آئے گا اب تو لگ بھگ سال ہو گیا ہے سچ نے باہر آکر یہ بتانا تھا کہ یہ سب ڈیلنگ تھی الیکشن
وغیرہ تو ڈرامہ تھا اور یہ حقیقت ہے کہ اگر کوئی بھی ووت ڈالنے نہ جائے تو بھی یہ 70فیصد رزلٹ
نکال لیتے ہیں رہی بات ایوارڈ کی تو حق تو قرزئی اور نورالمالکی کا بنتا تھا کہ وہ بائیڈن اور باوئچر
کو ایوارڈ دیتے کیونکہ ان کا کوئی چانس نہیں تھا صدر اور وزیراعظم بننے کا لیکن انھوں نے ایوارڈ دے کر ثابت کر دیا کہ یہ
قرزئی اور نورالمالکی سے بھی گئے ،،،،،،،، ،،،،،،