ھارون اعظم

اسکول کے زمانے میں قرآن کے ترجمے اور عربی تعلیم کے لئے مسجد میں مولانا صاحب کے پاس جاتا تھا۔ والد صاحب کو بہت شوق تھا کہ بچے دینی تعلیم حاصل کریں۔ اس مقصد کے لئے انہوں نے مجھے ساتھ والے محلے کی مسجد کے امام صاحب کے پاس بھیجنا شروع کیا۔ میں جلدی سیکھ جاتا تھا، اور پابندی سے صبح کی نماز کے بعد امام صاحب کے پاس جاتا۔

کچھ عرصے کے بعد قرآن کے ترجمے کے لئے ایک دوسرے مولوی صاحب کے پاس بھیجھا والد صاحب نے۔ یہ صاحب دیوبندی تھے، جبکہ پہلے والے بریلوی مکتبہ فکر سے تعلق رکھتے تھے۔ جب ان کو پتہ چلا تو کہنے لگے، دونوں میں سے ایک کو سلیکٹ کرلو، یا تو میرے پاس آنا یا پھر ان کے پاس جانا۔ میں نے کہا، میں دونوں سے سیکھنا چاہتا ہوں۔ کہنے لگے، نہیں۔ تم اس دیوبندی کے پاس کیوں گئے، میں ترجمہ نہیں پڑھاسکتا کیا؟ نتیجہ یہ ہوا کہ کچھ دنوں تک اس کشمکش میں رہنے کے بعد میں نے دونوں کے پاس جانا چھوڑ دیا۔

یہ ایک مثال ہے ہمارے معاشرے کی، کہ ہم صرف مسلک کی بنیاد پر ایک دوسرے کے ساتھ بیٹھنا پسند نہیں کرتے۔ حالانکہ مسلمان ہونے کے ناطے کسی سے بھی قطع تعلق کی اجازت اسلام نہیں دیتا۔  ہمارے نام نہاد مولوی صاحبان اسلام کی غلط تصویر پیش کرکے نوجوان نسل کو اسلام سے دور کرنے میں اپنا کردار ادا کر رہے ہیں۔ ہماری پستی کی اس سے بڑی مثال کیا ہوسکتی ہے کہ مساجد پر بھی لکھا ہوتا ہے کہ مسلک حنفی دیوبندی بریلوی سلفی وغیرہ۔ تاکہ نماز کے لئے آنے والے کو پیشگی مطلع کیا جائے، کہ کہیں غلط جگہ نہ آجائے۔

ان حالات میں اتحاد اُمت دیوانے کا خواب لگتا ہے۔ جب بدی کے کاموں میں سب لوگ مسلک کو نہیں دیکھتے، کوئی دیوبندی یہ اعتراض نہیں کرتا کہ میں بریلوی کے ساتھ بیٹھ کر فلم نہیں دیکھ سکتا، تو نماز پڑھنے کے وقت ہی کیوں یہ تفرقہ بازی؟

نوجوان نسل پر بہت بڑی ذمہ داری عائد ہوتی ہے۔ عموماً نوجوان تعصب سے پاک ہوتے ہیں۔ اگر نوجوان یہ عہد کریں کہ ہم کسی بھی تفرقہ بازی کا حصہ نہیں بنیں گے تو ایسے عناصر کے لئے اپنی من مانی کرنا بہت مشکل ہوجائے گا۔ آپس کے اختلافات پر جدا ہونے کی بجائے اپنی قدر مشترک پر اکٹھا ہونے کی ضرورت ہے۔ مسلکی اختلافات کچھ بھی ہو، کلمہ تو ایک ہے، قرآن اور نبی صلی اللٰہ علیہ وسلم تو سب کے ہیں۔ اس کلمے پر تو ہمارا اتحاد ہوسکتا ہے۔ البتہ اس سے ان لوگوں کی ڈیڑھ اینٹ کی مسجدیں ختم ہونے کا خطرہ ہے۔ اور ایسا وہ لوگ ہر گز نہیں ہونے دینگے۔

منتظمین

سرورق کے لیے پیش کریں۔