خرم شہزاد خرم

کُرسی نامہ -- نیاز سواتی

انسان کا ہر عیب چُھپا دیتی ہے کُرسی
بُدھو کو بھی ذیشان بنا دیتی ہے کُرسی

شب بھر میں یہ مُفلس کو بنا دیتی ہے زَر دار
سوئی ہوئی قسمت کو جگا دیتی ہے کُرسی

گاؤں میں ‌جو مشہور ہو گُلّو کے لقب سے
اُس شخص کو گُل شیر بنا دیتی ہے کُرسی

وہ لوگ جو مریل سے نظر آتے ہیں پہلے
اُن لوگوں کی توندوں کو بڑھا دیتی ہے کُرسی

تا عُمر وہ پھر اس کے لئے بھرتا ہے آہیں
اِک بار جِسے جلوہ دکھا دیتی ہے کُرسی

وہ لوگ جو رہتے ہیں کرائے کے مکاں میں
بنگلوں میں اُنہیں لا کے بِٹھا دیتی ہے کُرسی

گر صاحبِ کُرسی ہے فقط تین ہی فٹ کا
اس بونے کو چھ فٹ کا بنا دیتی ہے کُرسی

وہ لوگ جو اِک لفظ ادا کر نہیں سکتے
تقریر کا فن اُن کو سِکھا دیتی ہے کُرسی

نزدیک نہیں آتا نیاز اُس کے کوئی بھی
جس شخص کو اِک بار گِرا دیتی ہے کُرسی

__________________

محمدعدنان

بہت اچھے خرب بھائی
بہت اعلی شاعری ہے