ابن آدم

شہاب نامہ کے مصنف لکھتے ہیں:
جس وقت بحری جہاز السودان نے اسماعیلیہ کی بندرگاہ سے لنگر اٹھایا‘ اس میں ساڑھے سات سو عازمین حج سوار تھے۔ محمد نوفل اسکندریہ کے بہت بڑے تاجر‘ صنعت کار اور رئیس تھے۔ کپتان نے مجھے انکے کیبن میں جگہ دیدی۔
بحر احمر میں گرمی اپنے پورے شباب پر تھی‘ سورج کی کرنیں لوہے کی گرم سلاخوں کی طرح لٹک رہی تھیں‘ اسکے باوجود عازمین حج کی ٹولیاں بڑے اطمینان سے عرصے پر جا بجا بیٹھی تھیں‘ کچھ لوگ تلاوت قرآن پاک میں مصروف تھے‘ کچھ تسبیح کر رہے تھے‘ کچھ حج کی دعائیں یاد کرنے میں لگے ہوئے تھے۔ ایک کونے میں محمد نوفل بھی کرسی پر بیٹھے برف کی پوٹلی بار بار اپنے سر پر پھیر رہے تھے۔دھوپ میں اطمینان سے بیٹھے ہوئے عازمین حج کی طرف دیکھ کر محمد نوفل نے آہ سرد بھری اور کہا‘ میں بھی ان لوگوں کا ہم وطن ہوں‘ لیکن ہمارے درمیان بہت بڑا فرق ہے‘ یہ غریب لوگ ہیں‘ انکے سینوں میں قناعت کی اتنی خنکی ہے کہ گرم موسم کی شدت ان پر کوئی اثر نہیں کرتی‘ میں جس کام میں ہاتھ ڈالتا ہوں‘ ہن برسنے لگتا ہے لیکن میرا دل نہیں بھرتا۔ میرے اندر ہر وقت حرص کی بھٹی سلگتی رہتی ہے۔ سردی کے موسم میں بھی برف کے بغیر میری پیاس نہیں بجھتی۔ میرا یہ دسواں حج ہے‘ مگر حضوری کی جو کیفیت مجھے پہلے حج میں حاصل ہوئی تھی‘ وہ پھر کبھی نصیب نہیں ہوئی۔ ان دنوں میں بالکل غریب تھا۔ میرے پاس معلم کی فیس ادا کرنے کیلئے بھی پوری رقم نہ تھی۔ اب طواف کے دوران بھی اللہ تعالیٰ کا گھر مجھ سے ہزاروں میل دور رہتا ہے۔ اگلے روز نماز عشاء کے بعد اعلان ہوا کہ رات کے ساڑھے گیارہ بجے جہاز میقات حرم سے گزرے گا‘ یہ اعلان سنتے ہی مسافروں میں بجلی کی رو دوڑ گئی۔ جہاز کا سائرن بجا اور ساڑھے سات سو حاجیوں نے بیک زبان تلبیہ کا آواز بلند کیا اور اسکے ساتھ ہی یہ سارا مجمع چشم زدن میں خالق کائنات کے حضور جا کھڑا ہوا۔ اس میں پاکباز بھی تھے‘ گناہ گار بھی‘ ہوس کار بھی تھے‘ قناعت شوار ‘ ریا کار بھی تھے‘ عبادت گزار‘ غفلت کا شکار بھی تھے‘ لیکن اس وقت سب بغیر کسی امتیاز کے ایک ہی وردی (احرام) میں ملبوس ایک ہی قطار میں کھڑے‘ ایک ہی کلمہ پڑھتے اپنے پروردگار کی بارگاہ میں بیک وقت حاضر تھے۔ کسی فرشتے نے ان کیلئے رسائی کا دروازہ نہ کھولا تھا۔ کوئی ابلیس انکی راہ میں رکاوٹ نہیں بنا تھا‘ اپنے رسول پاک کے بتائے ہوئے چند کلمات زبان پر لاتے ہی وہ اس شہنشاہ کے دربار میں پہنچ گئے تھے‘ جس کا نہ کوئی ثانی ہے‘ نہ شریک‘ جس کے گیٹ پر نہ کوئی پہرہ ہے‘ نہ دربان‘ تلبیہ کی آواز گونج رہی تھی۔ بحر احمر کا پانی کسی کو نظر نہیں آتا تھا‘ آسمان کے تارے بھی سب کی نگاہوں سے اوجھل تھے‘ ساری کائنات ایک خلاء بن گئی تھی‘ جس میں عبد اور معبود کے علاوہ اور کسی کا وجود باقی نہ رہا۔

__________________

منتظمین

سر ورق کے لیے اپلائی کریں

shafresha

کتاب کے نام کے ساتھ مصنف کا بھی حوالہ دینا مُناسب ہوگا۔
شئیرنگ کا شکریہ!

ابن آدم

بھائی اردو ادب کا شوق رکھنے والا شائد ہی کوئی شہاب نام کے مصنف کا نام ناں جانتا ہو

مصنف کا نام ہے قدرت اللہ شہاب

ابن آدم

بھائی اردو ادب کا شوق رکھنے والا شائد ہی کوئی شہاب نامہ کے مصنف کا نام ناں جانتا ہو

مصنف کا نام ہے قدرت اللہ شہاب

shafresha

میرے بھائی یہ کتاب پرانی ہے اور اب تو بازار سے تقریبا ناپید ہے یقین نا آئے تو جا کر دیکھ لیجیئے۔ یہاں پر لکھے ہوئے تھریڈ کے پڑھنے والوں میں ‌نئے اور پُرانے سبھی قسم کے قارئین ہوتے ہیں لہذا بہتر ہے کے حوالہ دے دیا جائے۔
شکریہ

ام غزل

بہت اچھا پہرہ چنا ہے آپ نے ۔ اور شاہد بھائی اصلاح کردی شکریہ ۔ واقع کچھ قاری تو بہت نئے ہیں عمر کے لحاظ سئ بھی ، اس لئے حوالہ پورا ہی ہو تا بہتر ہے ۔

بھائی شئیرنگ کا بہت بہت شکریہ۔