راجہ صاحب

اب تک یہ سمجھا جاتا رہا ہے کہ جسمانی موٹاپا صرف غذائی بے احتیاطی کی وجہ سے ہوتا ہے۔ بیشتر لوگ بھی ضرورت سے زیادہ کھانے کو ہی موٹاپے کا سبب گردانتے ہیں لیکن اس مضمون میں ہم ان وجوہات کا بھی ذکر کریں گے جن کی وجہ سے آپ موٹاپے کا شکار ہو سکتے ہیں انہیں موٹاپے کی اقسام بھی کہا جا سکتا ہے۔
وراثتی یا جینٹیک موٹاپا
موٹاپے کی یہ قسم والدین سے اولاد میں منتقل ہوتی ہے۔ بعض cases میں لارنس مون بیڈل سنڈروم ہو جاتا ہے۔ انسان کی جسمانی اور ذہنی نشوونما رک جاتی ہے۔ اس موٹاپے میں مبتلا افراد میں اکثر چھ انگلیوں کے حامل لوگ شامل ہوتے ہیں۔
وون گائیرک موٹاپا
یہ ایک ایسا مرض ہے جس کی وجہ سے جسم میں خصوصاً جگر میں گلائیکوجن زیادہ مقدار میں جمع اور اکٹھا ہونا شروع ہو جاتی ہے۔ ساتھ ہی ہڈیوں کی نشوونما رک جاتی ہے اور انسان موٹاپے کا شکار رہتا ہے۔
ہائپوتھیلیمک موٹاپا
انسان کے جسم میں موجود ہائپوتھیلیمک گلینڈ میں خرابی کی وجہ سے بھی انسان موٹاپے سے دوچار ہو سکتا ہے۔ ایسی صورت میں پیشاب میں گلوکوز خارج ہونے لگتا ہے اور بخار بھی ہو جاتا ہے۔
ہارمون کی خرابی
انسان کے جسم میں پائے جانیوالے ہارمون کے نظام میں خرابی کے سبب بھی انسان موٹاپے کا شکار ہو جاتا ہے ۔عموماً خواتین اس موٹاپے میں زیادہ مبتلا نظر آتی ہیں۔ یہ موٹاپا ہارمون کی زیادتی اور کمی سے ہوتا ہے۔
تھائیرائیڈ گلینڈ
جسم میں تھائیرائیڈ گلینڈ کی کمی سے بھی موٹاپے کا مرض لاحق ہو سکتا ہے۔ ایسی صورت میں جسم کی بافتوں میں پانی جمع ہونا شروع ہو جاتا ہے جس کے باعث جسم پھولنے لگتا ہے۔
انسولین کی زیادتی
لبلبے میں انسولین بنانے والے غدودوں میں خرابی کی صورت میں جسم میں انسولین کی مقدار میں اضافہ ہو جاتا ہے اور فالتو چربی جمع ہو جاتی ہے جس سے انسان موٹاپے کے مرض میں مبتلا ہو جاتا ہے۔ ماہرین کے مطابق ہر انسان میں genes کی مختلف اقسام پائی جاتی ہیں۔ اگر ان genes میں موٹاپا پیدا کرنے والے عوامل زیادہ ہوں تو کوئی بھی فرد موٹاپے کا شکار ہو سکتا ہے۔ دراصل یہ ہماری روزمرہ حرکات اور طرز زندگی پر منحصر ہوتا ہے ۔ہم کیا کھاتے ہیں، کتنی دیر آرام کرتے ہیں، ورزش پر کتنا وقت صرف کرتے ہیں، کن امراض کے اثرات موٹاپے میں مبتلا کرتے ہیں، کونسی ادویات موٹاپے کا سبب بن رہی ہیں۔ یہ تمام چیزیں موٹاپے سے جڑی ہوئی ہیں۔ خواتین میں تو موٹاپے کے خطرناک اثرات بھی دیکھنے کو ملے ہیں ۔خواتین کی اکثریت موٹاپے کی وجہ سے بچے پیدا کرنے کی صلاحیت سے محروم ہو جاتی ہے۔ ایام کی بندش اور تکلیف بھی عموماً وزن بڑھنے سے منسلک ہے۔ ٭٭