راجہ صاحب

قلفہ ایک ملائم، گداز اور موسمی بوٹی ہے۔ اس کا قد 30 سینٹی میٹر یعنی دو فٹ اونچا ہوتا ہے۔ یہ ایک مقبول سبزی ہے اور ساگ کے طور پر پکائی جاتی ہے۔ اس کی شاخیں بہت تھوڑی اور تنا نازک ہوتا ہے۔ تنا ہموار، چمکدار اور رنگ میں ہلکا گلابی ہوتا ہے۔ پتے سادہ، موٹے، ہموار اور رس بھرے ہوتے ہیں۔ پھول زرد اور پھل چھوٹے چھوٹے ہوتے ہیں جن میں بہت سے بیج پائے جاتے ہیں۔قلفہ کا کیمیائی تجزیہ بتاتا ہے کہ اس کے ایک سو گرام میں 90.5 فیصد رطوبت، 2.4 پروٹین، 0.6 فیصد چکنائی، 2.3 فیصد معدنیات، 1.3 فیصد ریشہ اور 2.9 فیصد کاربوہائیڈریٹس پائے جاتے ہیں۔ معدنی اور حیاتینی اجزاء میں کیلشیم، فاسفورس، آئرن، کیروٹین، تھایامین، ریبوفلاوین، نایاسین اور وٹامن سی شامل ہیں۔ اس کی غذائی صلاحیت 27 کیلوریز ہے۔
شفابخش قوت اور طبی استعمال
قلفہ کے پتے ہلکے سے نمکین، ترش اور لیس دار ہوتے ہیں۔ یہ فرحت بخش اور سرد مزاج ہیں۔ ناقص غذائیت کے شکار افراد کو اس کا استعمال صحت مند بناتا ہے۔ اس کے بیج جلد اور نسیحی بافتوں پہ مسکن اثر کرتے ہیں۔ یہ خون کا اخراج روکتے ہیں۔ رطوبتوں میں اضافہ کر کے پیشاب کی مقدار بڑھاتے ہیں۔
پیشاب کی بیماریاں
درد کے ساتھ پیشاب آنے کے مرض میں قلفہ ایک قیمتی غذا ہے۔ اس مرض میں قلفہ کے پتے بھی استعمال کئے جاتے ہیں۔مریض کودن میں دو بار پتوں کا جوشاندہ ایک چائے کا چمچہ مقدار میں دیا جاتا ہے۔ اگر پسینہ زیادہ آنے کی وجہ سے پیشاب کی مقدار کم ہو جائے تو مریض کو قلفہ کے بیج استعمال کرائے جاتے ہیں۔ اس کیفیت میں ایک چائے کا چمچہ بیج کا روغن کچے ناریل کے ایک گلاس پانی میں ڈال کر دن میں تین بار ملانے سے مریض کو پیشاب کی تکالیف سے نجات ملتی ہے۔اس نسخہ سے مثانے کی سوزش میں جلن بھی دور ہو جاتی ہے۔
اسہال اور پیچش
اسہال اور پیچش میں قلفہ کے بیج اینٹھن اور مروڑ کے ساتھ اٹھنے والے درد سے نجات دیتے ہیں۔ ان امراض میں بیج، میتھی کے پتوں، پودینے کے رس اور آم کی گٹھلی کے سفوف جیسی کسی اور دوا کے ساتھ استعمال کرانا چاہئیں۔
ذیابیطس
ایک چائے کا چمچہ قلفہ پانی کے ساتھ روزانہ تین چار ماہ تک کھانے سے جسم کی اپنی انسولین کی پیداوار بڑھ جاتی ہے اور ذیابیطس ختم ہو جاتی ہے۔
خون کا اخراج
معمولی مقدار میں منہ، ناک یا مقعد سے خون آتا ہو تو اس کو روکنے میں قلفہ کے پتے بہت کارگر ہیں۔ پتوں کو نچوڑ کر رس نکالتے ہیں اور پھر اس رس میں ایک چائے کا چمچہ تازہ لیموں کا رس اور شہد ملا کر مریض کو دن میں تین بار پلاتے ہیں۔
جلد کے امراض
قلفہ کے پتوں کا پلٹس جلی ہوئی جلد پر پھوڑے، پھنسیوں، ناسور، زخموں اور کاربنکل پر باندھنا حیران کُن حد تک اچھے نتائج دیتا ہے اور جلد تیزی سے صحت مند ہو جاتی ہے۔ سرخ باد پر اس کا استعمال تسکین دیتا ہے۔ جلد کی خارش اور سوزش میں بھی قلفہ کے پتوں کا استعمال سود مند رہتا ہے۔
گرمی دانے اور حدت
گرمیوں میں جسم کو ٹھنڈا رکھنے کیلئے قلفہ کو ایک دوا کے طور پر استعمال کیا جاتا ہے۔ اس کے تنوں کا رس استعمال کرنے سے گرمی دانے اور گرمی دانوں سے نجات ملتی ہے اور جسم میں ٹھنڈک کا احساس پیدا ہوتا ہے۔ پتوں کا پلٹس کن پٹیوں پر باندھنے سے شدید قسم کا سر درد کافور ہو جاتا ہے۔
٭٭