خرم شہزاد خرم

اسلام آباد (نمائندہ جنگ، ایجنسیاں)اٹارنی جنرل جسٹس (ر) ملک محمد قیوم نے کہا ہے کہ صدر کے دو عہدوں سے متعلق سپریم کورٹ کے 3 سابق ججوں کا اختلافی فیصلہ کاغذ کے ٹکڑوں سے زیادہ نہیں، مذکورہ جج ایسے فیصلے جاری کرکے عدالتی روایات کی خلاف ورزی کر رہے ہیں، جنرل پرویز مشرف وضعدار آدمی ہیں اور وہ سابق ججوں کو برداشت کر رہے ہیں، سپریم کورٹ نے دوران سماعت پوچھا تو ایمرجنسی اٹھانے کی تاریخ بتادوں گا۔ ان خیالات کا اظہار انہوں نے گزشتہ روز سپریم کورٹ میں صحافیوں سے بات چیت کرتے ہوئے کیا۔ انہوں نے کہا کہ ملک میں فوج نے اختیارات سے تجاوز کی رسم ڈالی لیکن فوج نے جو بھی تجاوز کیا عدلیہ نے اس کی توثیق کر دی۔ انہوں نے سپریم کورٹ میں صحافیوں سے گفتگو کرتے ہوئے کہا کہ سپریم کورٹ کے تین جج صاحبان جسٹس رانا بھگوان داس، جسٹس سردار محمد رضا خان اور جسٹس میاں شاکر اللہ جان نے ریٹائرمنٹ کے بعد 16 نومبر کو اپنے گھر سے صدر کے دو عہدوں کے کیس میں فیصلہ لکھ کر بھجوایا، اب ان تینوں جج صاحبان کے گھروں سے بھیجے گئے فیصلے کی کوئی حیثیت نہیں ہے کیونکہ یہ تینوں جج ریٹائر ہو چکے ہیں۔ انہوں نے کہا کہ جسٹس خلیل الرحمن رمدے بھی ریٹائر ہو چکے ہیں اب وہ بھی چیف جسٹس کیس کا فیصلہ نہیں لکھ سکتے۔ اٹارنی جنرل نے کہا کہ جنرل پرویز مشرف ایک وضعدار آدمی ہیں جو سابقہ ججز کو برداشت کر رہے ہیں، کسی اور ملٹری کمانڈر کے دور میں جج اس طرح کی حرکتیں نہیں کر سکتے تھے۔ انہوں نے کہا کہ سپریم کورٹ نے ظفر علی شاہ کیس میں کہا ہے کہ آرمی چیف ماورائے آئین اقدام اٹھا سکتا ہے اس لئے ایمرجنسی کا معاملہ تو ظفر علی شاہ کیس میں طے ہو چکا ہے۔ اس مرتبہ بھی ایمرجنسی لگانے کا اقدام مجبوری کے تحت اٹھایا گیا۔

__________________