جاویداسد

سپریم کورٹ نے 1971 کے بعد مختلف بینکوں اور مالیاتی اداروں میں256ارب روپے کے قرضے معاف کروانے والوں کی تفصیلات طلب کرلی ہیں۔ عدالت نے بینکوں سے ان قرضوں کی عوض رہن رکھی ہوئی جائیداد کے کاغذآت سے متعلق بھی تفصیلی طلب کرلی ہے اس کے علاوہ قرضے واپس نہ کرنے والے افراد کے خلاف کی جانے والی قانونی کاروائی کے بارے میں بھی تفصیلی رپورٹ پیش کرنے کا حکم دیا ہے ۔چیف جسٹس افتخارمحمد چوہدری کی سربراہی میں سپریم کورٹ کے تین رکنی بینچ نے بینکوں اوردیگر مالیاتی اداروں سے قرضے معاف کروانے سے متعلق از خود نوٹس کی سماعت شروع کی تو عدالت نے بتایا کہ 1971 سے 1990 تک مختلف بینکوں سے گیارہ ارب روپے کے قرضے معاف کروائے گئے جبکہ گذشتہ 19برسوں کے دوران 245ارب روپے کے قرضے معاف کئے گئے سلمان راجہ نے عدالت کو بتایا کہ معاف کروائے جانے والوں قرضوں میں 103ارب روپے کے قرضے 99 ارب روپے مارک اپ جبکہ باقی رقم دیگر اخراجات شامل ہیں۔ سماعت کے دوران چیف جسٹس نے ریمارکس دیتے ہوئے کہا کہ کہ بینک قرضے تو دے دیتے ہیں انہیں‌واپس بھی لینا چاہیے۔ انہوں‌نے نیشنل بنک کے صدر کا ذکر کرتے ہوئے کہا کہ وہ سالانہ چھ کروڑ روپے بونس لیتے ہیں اور کوئی پوچھنے والا نہیں چیف جسٹس نے کہا کہ جن لوگوں نے قرضے لئے ہیں انہیں واپس کرنا چاہیے کیونکہ یہ قوم کی امانت ہیں۔ ایک مخصوص گروہ قرضے لیکر معاف کرواتا ہے جس میں سیاسی لوگ بھی شامل ہیں۔ اگر کوئی عام آدمی قرضہ لے لے تو اس کو نوٹس پر نوٹس ملتا جبکہ بااثر افراد سے قرضہ واپس کرنے کےبارے میں پوچھا تک نہیں جاتا۔ بینچ میں شامل جسٹس خلیل رمدے نے ریمارکس دیتے ہوئے کہا کہ بعض خاندانوں نے مختلف مالیاتی ادارے بنا کر لوگوں کا پیسہ لوٹا اور ایسے لوگ بڑے بڑے عہدوں پر بیٹھے ہیں جبکہ جن لوگوں کا پیسہ تھا وہ دربدر کی ٹھوکریں کھا رہے ہیں چیف جسٹس نے سٹیٹ بنک کےوکیل سے مخاطب ہوتے ہوئے کہا کہ عدالت اس معاملے کی سماعت اس لئے کر رہی کہ کیونکہ یہ قومی دولت ہے انہوں نے کہا کہ قرضہ واپس نہ کرنے والوں کو جیل جانا پڑے گا۔ بینچ میں شامل جسٹس خلیل احمد رمدے نے بینک آف پنجاب کی وکیل خواجہ حارث سے کہا کہ وہ قومی مفاد میں آگے آئیں اور بغیر فیس لئے ہوئے یہ مقدمہ لڑیں اس کے علاوہ انہوں نے اٹارنی جنرل مولوی انوارلحق سے کہا کہ وہ بھی عدالت کی معاونت کردیا کریں عدالت نے اس از خود نوٹس کی سماعت دو اگست تک ملتوی کردی
نوٹ یہ خبر آج کے تمام قومی اخبارات کہ شہ سرخی ہے

__________________
جاویداسد