عبدالقدوس

12 مئی کی طرح اب پولیس کبھی سڑکوں سے غائب نہیں ہو گی‘ آئی جی سندھ
کراچی (اسٹاف رپورٹر، نجیب احمد ) آئی جی سندھ شعیب سڈل نے کہا ہے کہ پولیس بارہ مئی کی طرح اب کبھی سڑکوں سے غائب نہیں ہو گی اور نہ ہی پولیس جانبداری کا مظاہرہ کرے گی یہ بات انہوں نے جنگ سے بات چیت کرتے ہوئے کہی۔ انہوں نے کہا کہ کراچی میں ماضی میں جو کچھ ہوتا رہا۔ اب نہیں ہو گا۔ پولیس لوگوں کی جان ومال کی مکمل حفاظت کرے گی اور کسی بھی شخص کو قانون کو ہاتھ میں لینے نہیں دے گی۔ ایک سوال کے جواب میں انہوں نے کہا کہ پولیس اب بارہ مئی کی طرح کبھی سڑکوں سے غائب نہ ہو گی اور نہ ہی کسی کی حمایت کرے گی۔ انہوں نے کہا کہ قانون شکن عناصر سے سختی سے نمٹا جائے گا اور جو پولیس اہلکار فرائض سے غفلت برتے گا اس کے خلاف سخت محکمہ جاتی کارروائی کی جائے گی۔ دریں اثناء نیوز ایجنسیوں کے مطابق ڈاکٹر شعیب سڈل نے نئے انسپکٹر جنرل پولیس سندھ کا چارج سنبھالنے کے بعد پولیس فورس کو مزید موثر اور پیشہ ورانہ بنانے کے عزم کا اظہار کیا ہے۔ ہفتہ کو یہاں اپنے ایک انٹرویو میں انہوں نے کہا کہ میری پہلی ترجیح عوام میں پولیس کے اعتماد کی بحالی ہوگی کیونکہ اس مسئلے کو حل کئے بغیر دیگر چیلنجوں سے نمٹنا مشکل ہوگا،انہوں نے کہا کہ پولیس کا تعلق سیاست سے نہیں، جرائم کے خاتمے سے رہیگا۔ ڈاکٹر شعیب سڈل جنہوں نے 90ء کے عشرے میں کراچی میں خدمات سرانجام دیں نے کہا کہ چیلنج کی نوعیت ماضی سے مختلف ہے تاہم وہ ان سے نمٹنے کے لئے اپنی تمام صلاحیتیں استعمال کریں گے۔ انہوں نے کہا کہ بلاشبہ کراچی ایک بڑا شہر ہے جہاں ا سٹریٹ کرائم ‘ ڈکیتیاں ہوئیں اور اندرون سندھ شاہراہیں غیر محفوظ ہیں۔ انہوں نے کہا کہ ہمیں عوام کو یقین دلانا ہوگا کہ حکومت کی عملداری موجود ہے‘ انہوں نے کہا کہ محکمے کی کالی بھیڑوں کا موثر حساب ہوگا، میں زبانی جمع خرچ پر نہیں عمل پر یقین رکھتا ہوں۔ نئے آئی جی سندھ نے کہا کہ وہ زبانی جمع خرچ پر نہیں بلکہ عمل پر یقین رکھتے ہیں۔ عوام کی تجاویز سے پولیس کی کارکردگی بہتر ہوگی۔ انہوں نے ذرائع ابلاغ سے درخواست کی کہ معاشرے سے جرائم کے خاتمے کے لئے پولیس کی مدد کرے۔ ایک سوال پر انہوں نے کہا کہ پولیس کا سیاست سے کوئی تعلق نہیں بلکہ اس کی ذمہ داری جرائم کا خاتمہ ہے۔

__________________