عبدالقدوس

ہم سے بات نہ کرنے کا کہہ کر زرداری نے ہمارا کام آسان کردیا،شجاعت
اسلام آباد (جنگ نیوز) پاکستان مسلم لیگ کے صدر چوہدری شجاعت حسین نے کہا ہے کہ آصف زرداری نے ہمارے علاوہ سب سے بات چیت کرنے کا کہہ کر ہمارا کام آسان کر دیا ہے، پیپلز پارٹی بینظیر کے قتل کے باوجود ہمدردی کا ووٹ نہیں لے سکی اور 2002ء کے مقابلہ میں صرف چھ زائد نشستیں لے سکی ہے، آصف زرداری پہاڑ پر اور نوازشریف شیر پر چڑھے ہوئے ہیں اور اب دیکھتے ہیں کہ وہ کس طرح عوامی توقعات پر پورا اتریں گے؟ جمعرات کو یہاں اپنی رہائش گاہ پر اخبار نویسوں سے بات چیت کرتے ہوئے پاکستان مسلم لیگکے سربراہ نے کہا کہ ہماری جماعت اپوزیشن میں بیٹھے گی اور ہم تعمیری اور مثبت طریقے سے اپوزیشن کریں گے، پیپلز پارٹی اور (ن) لیگ کی طرح ڈیسک نہیں بجائیں گے۔ انہوں نے کہا کہ پاکستان مسلم لیگ ہی حقیقی مسلم لیگ ہے اور اسے چاروں صوبوں میں نمائندگی حاصل ہے اور الیکشن کمیشن نے بھی ہماری جماعت کو ہی پاکستان مسلم لیگ تسلیم کیا ہے جبکہ پیپلز پارٹی کی ”ذیلی تنظیم“ (ن) لیگ تو سندھ اور بلوچستان سے قومی اسمبلی کی ایک نشست بھی نہیں جیت سکی اور وہ تو اب صوبائی پارٹی بن کر رہ گئی ہے۔ چوہدری شجاعت حسین نے کہا کہ فی الحال زرداری پہاڑ پر چڑھے ہوئے ہیں اور جب وہ نیچے اتریں گے تو پھر دیکھا جائے گا۔ انہوں نے کہا کہ آخر آصف زرداری کس بات پر اترا رہے ہیں اور 2008ء کے انتخابات میں ان کی پارٹی نے کونسا بڑا تیر مارا ہے اور پیپلز پارٹی بے نظیر بھٹو کے سانحہ کے باوجود 2002ء کی 82 نشستوں کے مقابلہ میں 2008ء میں 88 نشستیں لے سکی ہے اس طرح اسے صرف چھ زائد نشستیں ملی ہیں ۔ ایک اور سوال پر چوہدری شجاعت حسین نے کہا کہ ہم تو اپوزیشن میں بیٹھیں گے، مسئلہ تو ان لوگوں کا ہے جنہوں نے دلفریب نعروں سے لوگوں سے ووٹ لئے ہیں اور اب دیکھتے ہیں کہ وہ کس طرح لوگوں کی توقعات پر پورا اتریں گے۔

__________________