ابن ضیاء

پشاور۔۔۔۔۔۔۔۔کوہاٹ سے پشاور آنے والی فلائنگ کوچ اور بس کے درمیان کوہاٹ روڈ پر تصادم کے نتیجے میں ایک ہی خاندان کے چھ افراد جاں بحق جبکہ11زخمی ہوگئے۔جاں بحق ہونے والوں میں تین خواتین اور تین بچے بھی شامل ہیں۔بدقسمت خاندان لاچی کوہاٹ سے شادی کی تقریب میں شرکت کے لئے آرہے تھے۔بتایا گیاہے کہ پیرکے روز فلائنگ کوچ نمبر3179لاچی کوہاٹ سے متنی آرہی تھی کہ اسی دوران متنی بائی پاس گلزارچوک کے قریب کراچی سے پشاور آنے والی بس نمبر3577نے اسے ٹکرماردی جس سے فلائنگ کوچ ڈرائیور سے بے قابوہوکر آگے جانے والی موٹرکارسے ٹکراگئی جس کے نتیجے میں فلائنگ کوچ میں موجود سی این جی گیس کا سلنڈر زودار دھماکے سے پھٹ گیا اور گاڑی نے آگ پکڑلی۔تصادم کے نتیجے میں ایک ہی خاندان کے چھ افراد جھلس کر جاں بحق ہوگئے جن میں زینت بی بی،نسیم اختر،مسماة ذرجانہ،بچے محمد جلاخان اور ثاقب شامل ہیں جبکہ ایک بچے کا نام معلوم نہ ہوسکا۔11افراد زخمی بھی ہوگئے۔مقامی افراد اور پولیس کی بڑی تعداد موقع پر پہنچ گئی اور آگ بجھاکرگاڑی سے زخمیوں کو نکالنے کے لئے امدادی سرگرمیاں شروع کردیں۔زخمی افراد کو ایل آر ایچ پہنچادیا گیاہے،متنی پولیس نے تینوں گاڑیوں کو تحویل میں لے کر مقدمہ درج کرلیا۔