ابن جلال

کشمیر پر بیک ڈور مذاکرات جاری ہیں ، شیخ رشید
کراچی: عوامی مسلم لیگ کے سربراہ وزیر شیخ رشید نے انکشاف کیا ہے کہ کشمیر پر لندن میں بیک ڈور مذاکرات جاری ہیں اور آرمی چیف کا بیان پوری قوم کی آواز ہے ۔ کراچی پہنچنے پر میڈیا سے بات چیت میں شیخ رشید نے کہا کہ کشمیر پر کئے جانے والے مذاکرات پر قوم اور کشمیریوں کو اعتماد میں نہیں لیا گیا ۔ شیخ رشید کا کہنا تھا کہ حکومت میں شامل شریف برادران اور پیپلز پارٹی اندر سے ایک ہیں اور پنجاب حکومت کو کئی خطرہ نہیں، نقصان صرف عوام کا ہورہا ہے ۔

شیخ رشید نے کہا کہ امریکی حملوں پر آرمی چیف کا بیان ملک کے سولہ کروڑ عوام کی آواز ہے ۔ انہوں نے خدشہ ظاہر کیا کہ موجودہ حکومت قومی ہیرو ڈاکٹر قدیر تک امریکا کو رسائی دے سکتی ہے ۔ انہوں نے خبردار کیا کہ پیپلزپارٹی کی حکومت نے ایسا کیا تو عوامی مسلم لیگ میدان عمل میں نکل آئے گی ۔ شیخ رشید ایئر پورٹ سے مزار قائد پہنچے اور فاتحہ خوانی کی ۔