راجہ اکرام

کراچی کے علاقے بلدیہ ٹاؤن میں ایک گھر میں دھماکہ ہوا ہے جس کے نتیجے میں سات افراد ہلاک ہوگئے ہیں۔

یہ دھماکہ صبح پونے آٹھ بجے بلدیہ کے علاقے مچھ کو کے سیکٹر آٹھ میں واقع ایک گھر میں ہوا ہے۔ ڈی آئی جی عبدالمجید دستی کا کہنا ہے کہ دھماکے میں گھر منہدم ہوگیا ہے جس میں دب کر سات افراد ہلاک ہوگئے ہیں۔

پولیس نے ملبے سے دو خودکش جیکیٹیں، بیس سے زائد دستی بم، تین کلاشنکوف اورچھبیس میگزین برآمد کیے ہیں۔ دھماکے کی نوعیت کا تعین کرنے کے لیے بم ڈسپوزل سکواڈ پہنچ گیا ہے۔ پولیس کا کہنا ہے کہ گھر کے ملبے سے چھ لاشیں ملی ہیں جبکہ ایک دھڑ ملا ہے۔

یہ گھر ایک سو گز کے رقبے پر بنا ہوا ہے جس کا اگلا حصہ منہدم ہوگیا ہے۔ مقامی لوگوں کا کہنا ہے یہاں کرائے دار رہائش پذیر تھے۔

کراچی پولیس کے سربراہ وسیم احمد کا کہنا ہے کہ جس طرح کا اسلحہ برآمد ہوا ہے اس سے یہ لگتا ہے ہلاک ہونے والوں کا تعلق کسی دہشت گرد گروپ سے تھا اور وہ تخریب کاری کا ارادہ رکھتے تھے۔

پولیس کا کہنا ہے کہ ہلاک ہونے والے تمام افراد نے جاگرز پہن رکھے تھے جب کہ جس فرد کا صرف دھڑ ملا ہے اس نے کالے رنگ کے دستانے بھی پہن رکھے تھے۔ پولیس کا کہنا ہے کہ ہلاک ہونے والوں کے لباس سے ایسا لگتا ہے جیسے کہ وہ کسی کارروائی کرنے کے لیے روانگی کے لیے تیار تھے۔ پولیس نے مزید کہا ہے کہ ملبے سے ایک برقعہ بھی ملا ہے۔ پولیس کو خدشہ ہے کہ ان افراد کا تعلق کالعدم تنظیم سے ہے جو فرقہ وارانہ کارروائیوں میں ملوث ہے۔

انہوں نے بتایا کہ جائے وقوع سے چار مشتبہ افراد کو حراست میں لیا ہے جن کا کہنا تھا کہ اس مکان میں ان کے رشتے دار رہتے تھے۔

وفاقی وزیر برائے داخلہ رحمان ملک نے کراچی میں میڈیا سے بات کرتے ہوئے کہا کہ پولیس نے ملبے سے مذہبی کتابیں، سی ڈی ایز اور کچھ بیگس بھی برآمد کیے ہیں۔

انہوں نے کہا کہ ہلاک ہونے والوں کا تعلق سوات سے ہے اور ریاض نامی شحص نے یہ گھر کرائے پر لیا تھا جس کا تعلق بھی سوات سے ہے۔ ان کا کہنا ہے کہ ریاض خان نے پولیس کو بتایا ہے کہ رات کو کوئی تین بجے ان کے پاس مہمان آئے تھے اور وہ برامدے میں سوئے ہوئے تھے جہاں یہ دھماکہ ہوا ہے۔

بی بی سی اردو

__________________
محتاج اصلاح و دعا

فرحان دانش

اللہ تیرا شکر ہے ۔۔۔۔

naeemuddin

مجھے تو یہ بھی ایم کیو ایم کی چال لگتی ہیں

نیلم خان

اللہ پاک اپنا خصوصی کرم فرمائے اور اس پاک سر زمین کے باسیوں کو اپنی پناہ میں رکھے آمین

منتظمین

چلو بھائی خس کم جہاں پاک۔۔ اگر یہ کہیں‌پھٹتے تو کئی سو کو شہید کرتے۔ یہ اللہ کی خاص رحمت ہوئی ہے کہ اس نے ان سے معصوموں کی جان چھڑوا دی ہے۔

__________________
تم سپاہی نہیں ہو پیشہ ور قاتلو!