ابو کاشان

کراچی (اسٹاف رپورٹر) کراچی سے قومی اسمبلی کے حلقہ این اے 251 اور صوبائی اسمبلی کے حلقہ پی ایس 114 سے مسلم لیگ (ق) کے امیدوار اور نائب صدر مسلم لیگ سندھ صابر حسین گولا نے متحدہ قومی موومنٹ کے امیدوار برائے قومی اسمبلی وسیم اختر اور امیدوار برائے صوبائی اسمبلی رؤف صدیقی کے حق میں دستبردار ہونے اور اپنے ساتھیوں نایاب میاں نائب صدر جمشید ٹاؤن‘ شیر محمد عباسی صدر یوسی2 جمشید ٹاؤن اور طاہرحیات صدر یوسی 2 جمشید ٹاؤن سمیت متحدہ قومی موومنٹ میں شمولیت کا اعلان کیا ہے۔ کراچی پریس کلب میں منگل کی شام وسیم اختر اور رؤف صدیقی کے ہمراہ پریس کانفرنس سے خطاب کرتے ہوئے صابرحسین گولا نے کہا کہ میں گزشتہ 18 برسوں سے اس حلقہ کی کچی آبادیوں کے مسائل حل کرنے کی کوششوں میں مصروف رہا لیکن بدقسمتی سے آج تک ان کچی آبادیوں میں پینے کے پانی‘ سڑکوں اور سیوریج سسٹم کے مسائل حل نہیں ہوسکے۔ انہوں نے کہا کہ ماضی میں ہمیشہ لوگوں نے کچی آبادیوں سے ووٹ لیے لیکن پھر پلٹ کر نہیں دیکھا۔ انہوں نے پریس کانفرنس میں کہا کہ متحدہ قومی موومنٹ کے قائد الطاف حسین بلاتفریق متوسط طبقے کیلئے کام کر رہے ہیں‘ آئندہ ہم ان کی تمام کوششوں میں ان کے شانہ بشانہ کھڑے ہوکرکام کریں گے۔ اس موقع پر وسیم اختر نے کہا کہ صابر حسین کی متحدہ میں شمولیت کو اس طرح دیکھا جائے کہ وہ الطاف حسین کے فکر و فلسفے سے متاثر ہوکر ہمارے امیدواروں کے حق میں دستبردار ہو رہے ہیں۔ رؤف صدیقی نے اس موقع پرکہا کہ متحدہ قومی موومنٹ نے گزشتہ5 برسوں میں جوکام کیا اس کی گونج صرف سندھ میں ہی نہیں بلکہ پورے پاکستان میں سنی جا رہی ہے۔ پریس کانفرنس کے آغاز میں رؤف صدیقی نے قائدآباد بم دھماکے کی مذمت کی اور جاں بحق ہونے والوں کیلئے مغفرت کی دعا کرائی۔