ابو کاشان

کراچی (اسٹاف رپورٹر) جماعت اسلامی وسطی کے نائب امیر سید رشید احمد کو نامعلوم افراد نے فائرنگ کر کے شدید زخمی کردیا۔ انہیں چار گولیاں لگیں۔ تفصیلات کے مطابق منگل کو نیو کراچی نالا اسٹاپ کے قریب سے موٹرسائیکل پر رشید احمد جارہے تھے کہ اسی دوران دو موٹر سائیکل پر سوار ملزمان نے ان پر فائرنگ کی جس سے انہیں 4 گولیاں لگیں اور وہ موٹر سائیکل سے گرپڑے، گرنے سے ان کی گردن کی ہڈی ٹوٹ گئی جس سے ان کا نچلا دھڑ شدید متاثر ہوا، انہیں تشویش ناک حالت میں آغا خان اسپتال لایا گیا۔ پولیس نے نامعلوم افراد کے خلاف مقدمہ درج کرلیا ہے ۔ علاوہ ازیں جماعت اسلامی کراچی کے قائم مقام امیر برجیس احمد نے قاتلانہ حملے کی مذمت کرتے ہوئے کہا ہے کہ ظلم اور جبر کے ہتھکنڈوں کے ذریعے ہمارا راستہ نہیں روکا جاسکتا۔ سید رشید احمد پر قاتلانہ حملہ سانحہ12 مئی کا تسلسل ہے شہر میں امن وامان تباہ کرنے والوں کو پرویز مشرف کی سرپرستی حاصل ہے۔ پرویز مشرف کی موجودگی میں ملک میں امن قائم نہیں ہوسکتا۔ ان خیالات کا اظہار انہوں نے آغا خان اسپتال میں جماعت اسلامی ضلع وسطی کے نائب امیر کی عیادت کے موقع پر گفتگو کرتے ہوئے کیا۔ اس موقع پر ان کے ہمراہ جماعت اسلامی ضلع شرقی کے امیر نصر اللہ خان شجیع، ضلع وسطی کے سابق امیر محمد مسلم، مسلم پرویز ، فاروق نعمت اللہ ، ڈاکٹر تبسم جعفری اور نسیم صدیقی سمیت جماعت اسلامی کے دیگر رہنما بھی موجود تھے۔ برجیس احمد نے کہا کہ سانحہ 12 مئی کے ذمہ داروں کی پیٹھ ٹھونکنے والوں کے منہ کو عوام کا خون لگ گیا ہے ۔ انہوں نے کہا کہ ہم پرامن لوگ ہیں اور پرامن سیاسی جدوجہد پر یقین رکھتے ہیں، سید رشید احمد پر قاتلانہ حملہ کر کے ہمیں اشتعال دلانے کی کوشش کی جارہی ہے۔ اس سے قبل جماعت اسلامی سے وابستہ درجنوں افراد کو شہید کیا جا چکا ہے لیکن اب تک کوئی ایک قاتل گرفتار نہیں ہوا۔ انہوں نے کہا کہ قاتلوں کو حکمرانوں کی سرپرستی حاصل ہے۔