عبدالقدوس

کارکنوں کی قائد تحریک سے اپیل ہے کہ پی پی سے بات نہ کی جائے، طارق جاوید، سلیم شہزاد
لندن ( پ ر) متحدہ قومی موومنٹ کی رابطہ کمیٹی کے سینئر کنوینر طارق جاوید اور رابطہ کمیٹی کے رکن سلیم شہزاد نے ایم کیو ایم کے بارے میں پیپلز پارٹی سندھ کے سیکرٹری اطلاعات نفیس صدیقی کے بیان پر تبصرہ کرتے ہوئے کہا ہے کہ ان کے بقول پیپلز پارٹی کے لوگوں کو ایم کیو ایم کے بارے میں تحفظات ہیں تو ان سے زیادہ ایم کیو ایم کے کارکنوں کے تحفظات پیپلز پارٹی کے بارے میں ہیں کیونکہ پیپلز پارٹی کے دور میں ایم کیو ایم کے 15ہزار سے زائد کارکنوں کو ماورائے عدالت قتل کیا گیا جن میں قائد تحریک الطاف حسین کے بڑے بھائی اور بھتیجے بھی شامل ہیں پیپلز پارٹی کے دور ہی میں ایم کیو ایم کے 28کارکنوں کو گرفتار کرکے غائب کردیا گیا جو آج تک لاپتہ ہیں۔ انہوں نے کہا کہ ہم قائد تحریک الطاف حسین اور پپلز پارٹی کے سربراہ آصف زرداری کے درمیان ہونے والی گفتگو کا خیرمقدم کرتے ہیں لیکن نفیس صدیقی اور پیپلز پارٹی کے دیگر رہنما مسلسل بیانات دے رہے ہیں کہ ایم کیو ایم کے ساتھ اتحاد کرنے میں ان کے تحفظات ہیں۔ طارق جاوید اور سلیم شہزاد نے کہا کہ وہ مسلم لیگ ن جس نے ہمیشہ دوست بن کر پیٹھ میں چھرا گھونپا ہو ذوالفقار علی بھٹو شہید کے قاتلوں کی جماعت ہے جس نے بینظیر بھٹو شہید کو ملک دشمن اور سیکورٹی رسک کہا، جس نے بینظیر بھٹو اور پیپلز پارٹی کے خلاف انتقامی کارروائیاں کیں اس کے ساتھ ملنے کیلئے نفیس صدیقی اور پیپلز پارٹی کے ان جیسے دیگر لوگ راضی ہیں مگر ایم کیو ایم کے کارکنوں کا کہنا ہے کہ وہ اس پر ہر گز راضی نہیں ہیں کہ جنہوں نے ہمارا خون کیا، جنہوں نے بینظیر بھٹواور ان کے والد کا خون کیا ان کے ساتھ معاہدہ کرلیں اور ان کا ساتھ دیں لہٰذا ایم کیو ایم کے کارکنوں کا قائد تحریک سے یہ اپیل ہے کہ پیپلز پارٹی کے ساتھ بات نہ کی جائے۔

__________________