عبدالقدوس

لاہور (نمائندگان جنگ) ملک میں ایمرجنسی اور پی سی او کے نفاذکیخلاف وکلاء کااحتجاج جاری ہے،وکلاء نے جمعرات کو عدالتوں کابائیکاٹ کیااوربازوؤں پرسیاہ پٹیاں باندھ کر احتجاج کیا۔ وکلاء نے مطالبہ کیا کہ جیو کی نشریات بحال کی جائے۔ ملک بھر کی طرح آج(جمعہ)کو پنجاب بھر کے وکلاء بھی مکمل ہڑتال اور عدالتی بائیکاٹ کریں گے۔اس بات کا اعلان پنجاب بار کونسل، سندھ بار کونسل اور سندھ ہائیکورٹ بارنے کیا ہے۔ اسلام آباد ڈسٹرکٹ بارایسوسی ایشن کے سیکریٹری جنرل سید محمد طیب ایڈووکیٹ نے بتایا کہ پنجاب بار کونسل کے فیصلہ کی روشنی میں صوبے بھر کے وکلاء ملک میں ایمرجنسی کے نفاذ کے خلاف اور اعلیٰ عدلیہ کے جج صاحبان کی بحالی کیلئے جمعہ کو (آج) مکمل طور پر عدالتی کارروائی کا بائیکاٹ کریں گے اور عدالتوں میں پیش نہیں ہوں گے۔ دوسری جانب لاہورہائیکورٹ بار ایسوسی ایشن کے صدر احسن بھون کی صدارت میں ایمرجنسی کے نفاذ اور وکلاء کی گرفتاریوں اور رہائی کے بعد پہلا غیر رسمی اجلاس ہوا اجلاس میں ملک کی سیاسی صورتحال وکلا کی گرفتاریوں، اسلام آبادہائیکورٹ کے قیام اور بعض وکلاء کو رہا نہ کرنے کے معاملات پر غور کیا گیا۔ اجلاس میں اسلام آباد ہائیکورٹ کے قیام کومسترد کرتے ہوئے اسے حکومت کی جانب سے عدلیہ اور وکلاء کو تقسیم کرنے کی سازش قرار دیا۔ اجلاس میں جیو نیوز سمیت دیگر چینلوں پر پابندیوں کی بھی مذمت کی گئی۔ اجلاس میں فیصلہ کیا گیا کہ وکلا جدوجہد کو مزید موثر بنانے کیلئے ہائیکورٹ بارکے جنرل ہاؤس کا اجلاس پیر26 نومبر کو صبح ساڑھے دس بجے ہوگا جس کے بعد وکلاء احتجاجی جلوس نکالیں گے۔ لاہور ہائیکورٹ میں جمعرات کو بھی پی سی او کے تحت حلف اٹھانے والے ججوں کے سامنے پیش نہ ہونے کا سلسلہ جاری رہا۔علاوہ ازیں چکوال سے نمائندہ جنگ کے مطابق جمعرات کو چکوال کی عدالتوں میں مکمل ہڑتال رہی اورچکوال، چوآسیدن شاہ اور تلہ گنگ کی عدالتوں میں وکلاء نے مکمل بائیکاٹ کیا۔گوجرانوالہ سے نمائندہ جنگ کے مطابق ڈسٹرکٹ بار ایسوسی ایشن گوجرانوالہ کے زیر اہتمام ایمرجنسی کے نفاذ کیخلاف وکلاء نے مکمل ہڑتال کی، عدالتوں کا بائیکاٹ کیا اور ایک احتجاجی ریلی نکالی۔پولیس نے وکلاء کو گوندلانوالہ چوک تک ریلی لے جانے کی اجازت نہ دی ۔ اس دوران وکلاء نے حکومت کیخلاف شدید نعرے بازی کی، وکلاء نے سیاہ پرچم اٹھا رکھے تھے جبکہ بازؤں پر وکلاء نے سیاہ پٹیاں باندھ رکھی تھیں۔ قبل ازیں بار روم میں احتجاجی اجلاس سے صدر بار الیاس ریحان، سابق صدر بار پرویز احمد اوٹھی، سیکرٹری بار عامر باگڑی نے کہا کہ وکلاء آئین کی بحالی عدلیہ کی آزادی کیلئے جدوجہد جاری رکھیں گے۔ساہیوال سے نمائندہ جنگ کے مطابق ڈسٹرکٹ بار ایسوسی ایشن کے وکلاء نے جیو سمیت نجی چینلز پر پابندی، ایمرجنسی کیخلاف ڈسٹرکٹ بار سے قائم مقام صدر بار طارق افضل شاہ کھگہ، جنرل سیکریٹری میاں اسلام الحق، طاہر بشیر چودھری، عبدالمتین چودھری کی قیادت میں جلوس نکالا اور صحافیوں کیساتھ اظہار یکجہتی کیلئے پریس کلب گئے۔ دریں اثناء وکلاء نے مکمل ہڑتال کی بازوؤں پر سیاہ پٹیاں باندھی اور بار روم پر سیاہ پرچم لہرایا ۔پشاور ہائیکورٹ میں منعقد ہونے والے لائرز کنونشن میں متعدد مطالبات کئے گئے جن میں جیوسمیت نجی ٹی وی چینلز سے پابندی ہٹانے کامطالبہ بھی شامل ہے۔کنونشن نے تمام سیاسی جماعتوں سے مطالبہ کیا کہ وہ8 جنوری کو ہونے والے انتخابات کا بائیکاٹ کریں۔

__________________