خرم شہزاد خرم

پیچیدہ حالات میں اندرونی وبیرونی چیلنجز اہمیت اختیار کر گئے،جنرل طارق مجید



کراچی ( اسٹاف رپورٹر) چیئرمین جوائنٹ چیفس آف اسٹاف کمیٹی جنرل طارق مجید نے کہاہے کہ ملک نازک حالات سے گزر رہا ہے۔ اندرونی و بیرونی چیلنجز اہمیت اختیار کر گئے ہیں۔ پاک بحریہ کی پریڈ سے خطاب کرتے ہوئے انہوں نے کہا کہ اندرونی طور پر انتہا پسندی ، سیاسی و سماجی ڈھانچے کیلئے خطرہ ہے اور اس کی وجہ سے ملک کی نظریاتی جڑیں بھی کمزور ہورہی ہیں۔ قوم مسلح افواج کیلئے گرانقدر قربانیاں دے رہی ہے لہٰذا ہم پر لازم ہے کہ اس کے اعتماد پر پورا اتریں۔ ملکی سرحدوں کی حفاظت کے مقدّس فریضے کے ساتھ وطن عزیز کی نظریاتی سرحدوں کی نگہبانی بھی ضروری ہے۔ منوڑہ میں بحریہ کی 88 ویں آفیسرز کمیشن پریڈ کے مہمان خصوصی کی حیثیت سے جنرل طارق مجید نے مزید کہا کہ درپیش بیرونی چیلنجز سے نمٹنے کیلئے ضروری ہے کہ ہم علاقائی اور بین الاقوامی افق پر وقوع پذیر ہونے والی تبدیلیوں سے آگاہ رہیں۔ انہوں نے کمیشن حاصل کرنے والے افسروں پر زور دیا کہ وہ اپنی ذمہ داریاں پوری تندہی سے سرانجام دیں اور پیشہ ورانہ صلاحیتوں میں نکھار پیدا کریں۔ انہوں نے ٹیکنالوجی کے میدان میں ہونے والی تیز رفتار ترقی کے ساتھ ہم قدم رہنے کی ضرورت پر زور دیا کیونکہ مستقبل قریب میں بحری جنگ کا زیادہ تر انحصار جدید ٹیکنالوجی پر ہوگا۔ انہوں نے کہا کہ قوم مسلح افواج کی ضروریات پوری کرنے کیلئے گرانقدر قربانیاں دے رہی ہے لہٰذا ہم پر لازم ہے کہ ہم قوم کے اعتماد پر پورا اتریں اور اپنی ذمہ داریاں بھرپور انداز میں ادا کریں۔ قبل ازیں اپنے خطبہ استقبالیہ میں پاکستان نیول اکیڈمی کے کمانڈنٹ کموڈور محمد طاہر نے افسران کو دی جانے والی تربیت کے نمایاں پہلوؤں سے حاضرین کو آگاہ کیا۔ انہوں نے بتایا کہ اس مرتبہ پاس آؤٹ ہونے والی ٹرم 46افسران پر مشتمل ہے۔ بعدازاں مہمان خصوصی نے نمایاں کارکردگی کا مظاہرہ کرنے والے کیڈٹوں میں انعامات تقسیم کئے۔ مڈشپ مین محمد عدیل نصرت کو ان کی مجموعی بہترین کارکردگی پر اعزازی شمشیر عطا کی گئی۔ کیڈٹ توصیف اشرف کو چیئرمین جوائنٹ چیفس آف اسٹاف کمیٹی گولڈ میڈل دیا گیا جبکہ چیف آف نیول اسٹاف گولڈ میڈل بحرین کے کیڈٹ ابراہیم ناجی نے حاصل کیا۔