عبدالقدوس

کراچی (اسٹاف رپورٹر/ایجنسیاں) پاکستان پیپلز پارٹی کی چیئرپرسن بینظیر بھٹو نے کہا ہے کہ پارٹی امیدوار کاغذات نامزدگی جمع کرائیں اگر تمام سیاسی جماعتوں نے بائیکاٹ کیا تو واپس لے لیں گے،انہوں نے کہا کہ ہم آئندہ عام انتخابات کیلئے احتجاجاً کاغذات نامزدگی جمع کرائیں گے کیونکہ ہم اس بات پر یقین رکھتے ہیں کہ میدان خالی نہ چھوڑا جائے،جبکہ بے نظیر کے ترجمان فرحت اللہ بابر نے کہا ہے کہ مشترکہ حکمت عملی کیلئے دیگر جماعتوں سے مشاورت جاری ہے،بینظیر نے مطالبہ کیا کہ بلوچستان میں فوجی آپریشن فوری روکا جائے اور عام معافی کا اعلان کیا جائے۔ یہ بات انہوں نے معمر بلوچ رہنما اور مری قبائل کے رہنما نواب خیر بخش مری سے ملاقات کے بعد صحافیوں سے گفتگو کرتے ہوئے کہی۔ انہوں نے کہا کہ ملکی یکجہتی کو خطرہ ہے۔بلوچستان میں بہت ظلم ہورہا ہے۔ بلوچستان اور دیگر علاقوں کے مسائل کا حل مذاکرات کے ذریعے تلاش کیا جائے۔ محترمہ بینظیر بھٹو نواب خیربخش مری کے صاحبزادے بالاچ مری کے ایک مسلح کارروائی میں جاں بحق ہونے کی اطلاع پر نواب خیر بخش مری سے ملاقات کیلئے ان کے داماد جاوید مینگل کی رہائش گاہ پہنچیں تھیں۔ نواب خیر بخش مری سے ملاقات کے بعد محترمہ بینظیر بھٹو بزرگ سیاستدان شیر باز مزاری کے گھر گئیں اور ان سے نواب اکبر بگٹی کی تعزیت کی اور دعا کی۔بینظیر بھٹو کے ترجمان فرحت اللہ بابر نے اے ایف پی سے گفتگو کے دوران کہا کہ مشترکہ حکمت عملی کے حوالے سے دیگر جماعتوں سے مشاورت جاری ہے اور بہت جلد اس حوالے سے فیصلہ سامنے آجائے گا،انہوں نے کہا کہ جنرل پرویز کی نگراں حکومت کے تحت شفّاف انتخابات کی امید نہیں ہے۔انہوں نے کہا کہ ہم یہ چاہتے کہ انتخابات کے بائیکاٹ کا فیصلہ تمام جماعتوں کی جانب سے ہونا چاہیے تاکہ اس کی اہمیت ہو۔دریں اثناء پیپلز پارٹی کی چیئر پرسن بے نظیر بھٹو نے بھارتی اخبار کو انٹرویو میں ایک سوال پر کہا کہ جمہوریت کی بحالی، قانون اور آئین کی حکمرانی ہمارا فوری منصوبہ ہے انہوں نے کہا کہ یہاں مزدور، کسانوں، بزرگ شہریوں اور مڈل کلاس لوگوں کو ایسی حکومت کی ضرورت ہے جو کہ ان کے لئے فلاح و بہبود کا نظام لانے کے لئے پُرعزم ہو۔ ایک اور سوال پر بے نظیر نے کہا کہ پاکستان میں امن جمہوریت سے منسلک ہے جمہوریت کے بغیر امن قائم نہیں ہو سکتا انہوں نے کہا مجھے اُمید ہے کہ عالمی برادری پاکستان میں جمہوریت کی بحالی کے لئے اپنا کردار ادا کرے گی اور مجھے محسوس ہو رہا ہے کہ عالمی برادری ہماری بحالی جمہوریت کی جدوجہد کے لئے حمایت کر رہی ہے انہوں نے کہاکہ میرے لئے سب سے بڑا نوبل انعام یہ ہے کہ جنوبی ایشیاء کے تمام لوگوں کے دلوں میں اپنے لئے محبت اور احترام کا جذبہ پیدا کر سکوں۔

__________________