خرم شہزاد خرم

پیپلز پارٹی نے پہلے بھی ملک توڑا، اب بھی اسی ایجنڈے پر گامزن ہے،پر ویز الٰہی



لاہور (نمائندہ جنگ) پاکستان مسلم لیگ پنجاب کے صدر اور سابق وزیراعلیٰ پنجاب چوہدری پرویز الٰہی نے کہا ہے کہ اگر بے نظیر کو اقتدار کی ہوس نہ ہوتی تو وہ تیسری مرتبہ وزیراعظم نہ بن سکنے کی شرط ختم کرانے کیلئے ہاتھ پاؤں نہ مارتیں۔ پیپلز پارٹی کی لیڈر بے نظیر بھٹو صرف اقتدار حاصل کرنے کیلئے کارکنوں کی قربانیاں دیکر پاکستان واپس آئی ہیں۔ وہ گزشتہ روز مظفر گڑھ، ڈیرہ غازی خان اور ملتان کے مسلم لیگی ٹکٹ ہولڈروں اور پارٹی عہدیداروں کے اجلاس سے خطاب کر رہے تھے،انہوں نے کہا کہ بے نظیر بھٹو ہمیشہ کارکنوں کو دھوکا دیتی آئی ہیں اور آئندہ بھی یہی ہوگا،لیگی کارکن متحد ہو کرانتخابی مہم بھرپور طریقے سے چلائیں ۔ چودھری پرویز الٰہی نے کہا کہ بے نظیر کو اقتدار کا لالچ ہے۔ ان کی پارٹی نے پہلے بھی ملک توڑا اور اب بھی اسی ایجنڈے پر کام کر رہی ہیں۔ بے نظیر بھٹو ہمیشہ سے کارکنوں کو دھوکا دیتی آئی ہیں اور آئندہ بھی یہی ہوگا۔ اس کا ثبوت پیپلز پارٹی کے امیدواران کی حتمی فہرست سے صاف ظاہر ہوتا ہے کہ کارکنوں کا کیا مقام ہے۔ بے نظیر کا یہ کہنا کہ وہ انتخابات میں بطور احتجاج حصہ لے رہی ہیں کیونکہ وہ مفاہمت کی بجائے احتجاجی سیاست پر یقین رکھتی ہیں۔ اب جبکہ انتخابات سر پر ہیں اور وہ راہ فرار اختیار کرنا چاہتی ہیں تاکہ انتخابات میں ناکامی کی خفت سے بچا جا سکے۔ انہوں نے مسلم لیگی ٹکٹ ہولڈروں سے کہا کہ پاکستان مسلم لیگ پاکستان کی بانی جماعت ہے اور ہمارا یہ اولین فرض ہے کہ ہم ملک اور قوم کی خدمت کریں اور معاشی تسلسل کو جاری رکھنے کیلئے انتخابات میں زیادہ سے زیادہ کامیابی حاصل کی جائے۔ تمام امیدوار اپنے اپنے حلقوں میں مسلم لیگی حکومت کے گزشتہ دور کے ترقیاتی کام بشمول تعلیم، صحت، زراعت اور دیگر شعبہ جات میں انقلابی اقدامات عام لوگوں کو بتائیں۔ انہوں نے مزید کہا کہ مسلم لیگی کارکن متحد ہو کر اپنی پارٹی کی انتخابی مہم بھرپور طریقے سے چلائیں تاکہ مسلم لیگ کی حکومت دوبارہ اقتدار میں آ کر عام آدمی کی مزید خدمت کر سکے اور ترقی و خوشحالی کا سفر جاری و ساری رہ سکے۔