عبدالقدوس

اسلام آباد (رؤ ف کلاسرا) پیپلز پارٹی نے 7اپریل 05ء میں لیفٹیننٹ جنرل (ر)توقیر ضیاء کے خلاف کرپشن کا ریفرنس دائر کیا تھا جنہیں اب پارٹی لاہور سے قومی اسمبلی کے حلقے 127کا ٹکٹ دینے پر غور کر رہی ہے جب کہ توقیر ضیاء نے اس امر کی کوشش کی ہے کہ وہ آج اتوار کو پیپلز پارٹی پنجاب کے رہنماؤں کی موجودگی میں پیپلز پارٹی میں باقاعدہ شمولیت اختیار کریں گے ۔ پارٹی ذرائع کے مطابق توقیر ضیاء اس اطلاع کے بعد پارٹی میں شمولیت اختیار کر رہے ہیں کہ انہیں این اے 127کا ٹکٹ دیا یا نہیں دیا جا سکتا اور ان سے غیر مشروط طور پر پارٹی میں شمولیت کا تقاضا کیا گیا ہے ۔ پاکستان کرکٹ بورڈ کے سابق چیئرمین توقیر ضیاء کے خلاف ریفرنس کی تفصیلات پیپلز پارٹی کی ویب سائٹ پر اب بھی دستیاب ہیں جب کہ پیپلز پارٹی کے ترجمان فرحت اللہ بابر نے کہا کہ پارٹی اب بھی اس ریفرنس پر قائم ہے اور یہ بات بھی درست ہے کہ توقیر ضیاء نے پارٹی ٹکٹ کے لئے رابطہ کیا ہے، تاہم اس ضمن میں ابھی فیصلہ نہیں کیاگیا اس کے برعکس توقیر ضیاء نے کہا ہے کہ انہیں اس امر پر حیرت ہے کہ پیپلز پارٹی نے ان کے خلاف ریفرنس دائر کیا تھا کیونکہ انہیں اس ریفرنس کے بارے میں کچھ علم نہیں اس لئے اس پر وہ کیا تبصرہ کر سکتے ہیں ۔ یاد رہے کہ پیپلز پارٹی نے اپنے ریفرنس میں موقف اختیار کیا تھا کہ کرکٹ کنٹرول بورڈ کے سابق چیئرمین توقیر ضیاء نے جولائی 03ء میں بورڈ کی گاڑیوں کو بورڈ کے افسروں کے نام منتقل کرنے کی پالیسی بنائی تھی کہ سرکاری پالیسی کے مطابق ان گاڑیوں کا عام نیلام ہونا چاہئے تھا ۔

__________________