خرم شہزاد خرم

پرویز مشرف کی زیر صدارت اجلاس،انتخابات اور محرم کے دوران قیام امن کے منصوبوں کی منظوری



اسلام آباد (جنگ نیوز) صدر پرویز مشرف نے ملک میں اس اہم موڑ پر امن کی ضرورت پر زور دیتے ہوئے کہا ہے کہ شہریوں کی جان ومال کے تحفظ کو یقینی بنانے کیلئے تمام کوششیں بروئے کار لائی جائیں۔ یہ بات انہوں نے جمعہ کو یہاں ملک میں عام انتخابات اور محرم الحرام میں امن وامان کی صورتحال کے جائزے کیلئے منعقدہ اعلیٰ سطح کا اجلاس کی صدارت کرتے ہوئے کہی۔ اجلاس میں امن وامان کی صورتحال خاص کر18 فروری 2007ء کے عام انتخابات اور محرم الحرام کے دوران ملک کی اندر امن وامان کی صورتحال کا تفصیلی جائزہ لیا گیا۔ صدارتی کیمپ آفس راولپنڈی میں ہونے والے اس اجلاس میں نگراں وزیراعظم محمد میاں سومرو، چاروں نگراں وزرائے اعلیٰ، چیف آف آرمی اسٹاف جنرل اشفاق پرویز کیانی، سیکورٹی و انٹیلی جنس اداروں کے سربراہان، وزیر داخلہ حامد نواز خان اور سیکریٹری داخلہ سید کمال شاہ نے شرکت کی۔ اجلاس میں محرم الحرام اور عام انتخابات کے دوران امن وامان برقراررکھنے کے حوالے سے اہم فیصلوں کی منظوری دی گئی۔ اجلاس کے دوران صدر پرویز نے کہا کہ مفرور قیدیوں کو دوبارہ گرفتار کرنے اور اسکاٹ لینڈ یارڈ کی ٹیم کو بھرپور تعاون فراہم کرنے کی ہدایت کی جبکہ وزیراعظم نے کہا کہ ہنگاموں کے متاثرین کو معاوضہ دیا جائے گا۔ تفصیلات کے مطابق اجلاس کے شرکا کو محرم الحرام کے سکیورٹی پلان سے آگاہ کیا گیا اور بتایا گیا کہ محرم میں امن وامان کو یقینی بنانے کے ساتھ 18 فروری کو ہونے والے عام انتخابات میں بھی امن وامان برقرار رکھنے کیلئے فوج اور رینجرز پوری طرح تیار ہے۔ اس موقع پر خطاب کرتے ہوئے صدر پرویز مشرف نے کہا کہ اس نازک موقع پر ملک میں امن قائم رکھنے کی بہت زیادہ ضرورت ہے اور حکومت عوام کے جان ومال کے تحفظ کیلئے تمام ضروری اقدامات اٹھائے گی۔ انہوں نے اس بات پر زور دیا کہ نگراں حکومتیں بینظیر بھٹو کی شہادت کے بعد جلاؤ گھیراؤ اور ہنگاموں سے ہونے والے نقصان کا جلد اندازہ لگائیں۔ ذرائع کے مطابق صدر پرویز مشرف نے بینظیر بھٹو کی شہادت کو بعض حلقوں کی طرف سے سیاسی رنگ دینے پر افسوس کااظہار کیا۔ انہوں نے کہا کہ اسکاٹ لینڈ یارڈ کی ٹیم کو تحقیقات کے دوران پاکستانی سیکورٹی ادارے پورا تعاون دیں تاکہ بینظیر کے قاتلوں کو بے نقاب کیاجاسکے صدر نے جیلوں سے بھاگے قیدیوں کی گرفتاری کیلئے بھی ہنگامی بنیادوں پر کوششیں کرنے کی ہدایت کی۔