وجدان

صدر پرویز مشرف سے متحدہ قومی موومنٹ کے قائد الطاف حسین نے لندن میں ملاقات کی ۔ متحدہ قومی موومنٹ کے رہنما ڈاکٹر عمران فاروق نے ملاقات کی تفصیلات بتاتے ہوئے کہا کہ یہ ملاقات مقامی ہوٹل میں ایک گھنٹہ پندرہ منٹ تک جاری رہی ۔ صدر کے ساتھ جنرل شفقات تھے جبکہ الطاف حسین کے ہمراہ رابطہ کمیٹی کے رکن محمد انور اور عمران شامل تھے۔ ملاقات کے دوران ملک کی موجودہ سیاسی صورت حال اور عالمی امور پر تبادلہ خیال کیا گیا اٹھارہ فروری کے عام انتخابات کے حوالے سے تفصیلی تبادلہ خیال ہوا ۔الطاف حسین نے اس بات پر زور دیا کہ چونکہ یہ انتخابات انتہائی اہم ہیں اس لئے یہ ہر ممکن آزادانہ ،منصفانہ اور شفاف ہوں اور تمام سیاسی جماعتوں کو ان میں حصہ لینے کا بھر پور طریقے سے موقع ملے ۔ صدر نے کہا کہ میں اس بات کی پہلے بھی کئی بار یقین دھانی کرا چکا ہوں اور دوبارہ بھی اعادہ کرتا ہوں کہ یہ انتخابات ہر لحاظ سے آزادانہ ، منصفانہ اور شفاف ہوں گے ۔ صدر نے کہا کہ میرے کسی پارٹی سے کوئی روابط نہیں ہیں ۔آئندہ انتخابات میں جو بھی جماعت اکثریت حاصل کرے گی وہی حکومت بنائے گی ۔ عمران فاروق نے مزید بتایا کہ ملاقات کے دوران بے نظیربھٹو کی شہادت کے بعد سندھ میں جو واقعات رونما ہوئے جن میں لوگوں کا جانی و مالی نقصان ہوا اس پر بھی تبادلہ خیال ہوا۔