عبدالقدوس

پختونوں نے اے این پی کو پہلی بار سندھ اسمبلی کا حصہ بنا دیا، شاہی سید
کراچی( اسٹاف رپورٹر) عوامی نیشنل پارٹی سندھ کے صدر شاہی سید نے کہا ہے کہ ہم نے کراچی میں امن کی خاطر حلقہ 241 کی قربانی دی، تاریخ میں پہلی بار ہم نے پختونوں کو سندھ کی پارلیمنٹ کا حصہ بنایا اب باچا خان کے فکر و فلسفہ کے مطابق تمام مظلوم قومیتوں بشمول پختون، بلوچ، پنجابی، سرائیکی، سندھ اور مظلوم اردو بولنے والوں کے حقوق کیلئے آواز بلند کرینگے، وہ بدھ کو باچا خان مرکز پر اظہار تشکر کیلئے جمع ہونے والے پارٹی رہنماؤں اور کارکنوں سے خطاب کر رہے تھے، اس موقع پر پارٹی کے صوبائی جنرل سیکرٹری امین خٹک، نومنتخب ارکان سندھ اسمبلی امیر نواب، امان اللہ خان محسود ، پارٹی رہنما رانا گل آفریدی اور دیگر نے بھی خطاب کیا شاہی سید نے کہا کہ ہم امن کے داعی ہیں اور کراچی میں امن کے خواہاں ہیں ہم نے انتخابات میں پہلی بار سنجیدگی سے اس لئے حصہ لیا کہ ہم مظلوم طبقات کے حقوق کیلئے آواز بلند کر سکیں۔ انہوں نے کہا کہ ہمارے منتخب نمائندے حقیتا مزدور ہیں یہ نہ وڈیرے ہیں نہ سرمایہ دار اور نا ہی جاگیردار شاہی سید نے کہاکہ ہمارے نمائندے سندھ میں تمام مظلوم قومیتوں کے روز گار، آبادیوں سمیت پانی، لیز، اسکولوں اور صحت کے مراکز کی بہتری کیلئے جدوجہد کریگی امین خٹک نے کہا کہ ہم عوام کا شکر گزار ہیں کہ انہوں نے نہ صرف سندھ بلکہ سرحد میں بھی باچا خان کے فکر کے علمبرداروں کو کامیابی دلوائی ہم عوام کے توقعات پر پورا اترینگے، امیر نواب نے کہا کہ ہم اسمبلی میں پختونوں کے مسائل عام آدمی کے مسائل کے حل کیلئے آئے ہیں اور پختونوں کے روز گار اور انکے بچوں کے مستقبل کیلئے آواز بلند کرینگے۔ انہوں نے کہاکہ سندھ کی دھرتی پر پختونوں نے کبھی ملکیت کا دعویٰ نہیں کیا سندھ کے وارث سندھی ہیں تاہم سندھ کے شہروں کی تعمیر میں پختونوں کا خون پسینہ شامل ہے امان اللہ محسود نے کہا کہ باچا خان کے سپاہی اسمبلیوں میں ظلم کے خلاف آواز اھٹائینگے اور ایسے قوانین بنانے کے حق میں ساتھ رہینگے جو عوام کے فلاح و بہبود کیلئے ہو، قبل ازیں باچا خان مرکز پر ہزاروں افراد نے پہنچ کر شاہی سید کو مبارکباد دی بڑی تعداد میں لوگوں کے جمع ہونے کے باعث باچا خان چوک پر ٹریفک جام ہوگئی عوام کی بڑی تعداد سرخ لباس اور ٹوپیوں میں ملبوس تھی اور وہ پشتو میں نعرے لگا رہے تھے اس موقع پر منوں مٹھائی تقسیم کی گئی جبکہ خواتین کی بڑی تعداد بھی اس موقع پر موجو د تھیں۔

__________________