چاچا کمال

سپریم کورٹ آف پاکستان کے دس رکنی لارجر بینچ نے صدارتی امیدوار جسٹس (ریٹائرڈ) وجیہہ الدین کے اس بیان پر برہمی کا اظہار کیا ہے جس میں انہوں نے بینچ کی تشکیل پر اعتراض کیا تھا۔
جمعرات کے روز جب چیف الیکشن کمشنر کی طرف سے جنرل پرویز مشرف کے کاغذات نامزدگی منظور کیے جانے کے خلاف دائر کی گئی آئینی درخواستوں کی سماعت شروع ہوئی تو بینچ کے سربراہ جسٹس جاوید اقبال نے راولپنڈی بار ایسوسی ایشن سے خطاب میں جسٹس وجیہہ الدین نے جو بینچ کی تشکیل سے متعلق جو ریمارکس دیئے ہیں وہ انتہائی ہتک آمیز ہیں اور ان ریمارکس کو دیتے ہوئے انہوں نے تمام حدیں عبور کر لی ہیں۔

جسٹس جاوید اقبال نے کہا کہ اگر بینچ لوگوں کی مرضی کے مطابق بننے لگیں تو اس ادارے کا کیا بنے گا۔ انہوں نے جسٹس وجیہہ الدین کے وکیل حامد خان کو مخاطب کرتے ہوئے کہا کہ کیوں نہ ان کے خلاف توہینِ عدالت کی کارروائی عمل میں لائی جائے۔ اس پر حامد خان نے کہا یہ عدالت کے دائرہ کار میں ہے۔ جسٹس جاوید اقبال نے کہا کہ عدالت کا مذاق اڑانے کا سلسلہ بند ہوتا چاہیے۔

اس موقع پر جسٹس نواز عباسی نے میڈیا کو تنقید کا نشانہ بنایا اور کہا کہ ہر ٹی وی چینل نے ایک علیحدہ عدالت لگا رکھی ہے۔

جسٹس جاوید اقبال نے کہا کہ ہر گیم کے کچھ اصول ہوتے ہیں، چینل عدالت عدالت کھیلنا بند کریں۔

جسٹس خلیل الرحمٰن رمدے نے کہا کہ عوامی مفاد کے معاملات پر بحث میڈیا کا حق ہے لیکن ہر ادارے کو اپنی ذمہ داری کا احساس ہونا چاہیے۔ انہوں نے کہا کہ نو مارچ کو جو کچھ ہوا اس طرح کی انہونیاں ہوتی رہتی ہیں جو لوگوں کو برداشت کرنی چاہیے۔ بینچ میں شامل ججوں نے اٹارنی جنرل کو بھی ٹی وی چینلوں پر دیئے گئے بیانات کی وجہ سے تنقید کا نشانہ بنایا۔

جسٹس جاوید اقبال نے حامد خان کو مخاطب کرتے ہوئے کہا کہ اگر ہم آپ کو سن رہے ہیں تو یہ قومی مفاد میں سن رہے ہیں، جسٹس وجیہہ الدین کی وجہ سے نہیں۔ انہوں نے کہا کہ اگر فریقین کو بینچ پر اعتماد نہیں ہے تو اس کا کارروائی کو آگے چلانا مشکل ہے۔

اس موقع پر نے بینچ نے پندرہ منٹ کے لیے عدالت کی کارروائی روک دیا اور جب جج صاحبان عدالت میں واپس آئے تو انہوں نے کہا کہ وہ قومی مفاد میں عدالت کی کارروائی جاری رکھیں گے۔

بی بی سی